Read Kahua EPESO 3 Bible Online

EPESO 3 - Kahua bible

EPESO 3

¹Tahema inê Paulo kê nungia God tangagamu, mu pe Siu. Inê kê oga igê na ruma ni hagaitangiha, suria inê kê tarohenia o Kirisito Jesu tangagamu.

²Igamu kamu bani girara, vi God ki koro era, i bani ateê tanga na tagaraha ngekê tangagamu.

³God ki rangania na katoha pinihi iana, ma ki hagagirarê renia. Inê kê bani sege sisite râ renia na tarana ngekana.

⁴Ma ki manga mu obania, vi gamu tomania nikâ na marâ, gê bani segea so, igamu kamu page tahe tara renia na giraraha iaku renia na katoha pinihi iana o Kirisito.

⁵I nago God ki pe hagagirarara na enoni renia na katoha pinihi ngekana, ma i ngekê God ki bani rangania tangara na aposotolo koro iana ma na poropete iana renia na Higona Apu.

⁶Na katoha pinihi i manga ikê: renia na Taroha Koro na enoni, ga pe Siu, ma na Siu ka nahunia tagenata na mahatana God. Ngaira ka hegoata igê na haku gi tage, ma ka nahunia tagenata na marâ, God ki bani surua renia o Kirisito Jesu.

⁷God ki bani ateê, kê tagara renia na Taroha Koro, suria ngaia ki mahata tangê, ma na raramohana ki tagara i pasiku.

⁸I monari, i pe arariê, suria na ara ni kariana hato God ka koro tehariê. Henaka i manga ngekana, ma God ki mahata tangê, ma ki ateê, hanana gê ateate tangara na enoni, ga pe Siu, renia na Taroha Koro renia na ruruguha raha teha ngavê iana o Kirisito,

⁹ma kê hagagirarara na enoni hato renia, vi manga i he God ki tagarahia na katoha pinihi iana. God, i hagavorara na ara ni marâ hato, ki pe rangania na katoha pinihi iana igê na bevoana i nago,

¹⁰hanana vi na matena ngekê renia na haku na enoni, ga tongesuri, ngaia ki hagagirarara na ani ga araha, ma na ani raramohaga i bevoa purua renia na takotako mataha iana igê na ara ni tarani.

¹¹God ki kato vikana suria na katoha iana, i bani oga me i nago kere vê noga. God ki bani katoa na katoha ngekana renia o Kirisito Jesu, na Araha iaka.

¹²Suria igia ka obahaku henia o Kirisito, ma ka tongesuria, igia ka pe magu, vi ge râ i maana God, suria igia ka hagêguritogo renia.

¹³Tahema inê kê nungigamu nga, siana kamu makumakusiga, suria inê kê hatamigi na mamasiaganiha tangagamu. Mu ageage renigi hete.

¹⁴Tahema inê kê susure, ma kê nunginungi tanga God Vaemaka.

¹⁵Ma renia ngaia na ara ni haku hato i pasina ma i maveta ka tonga hunani.

¹⁶Inê kê nungia God, i ruruguha raha teha, hanana i hagaramonigamu renia na Higona Apu, mu gatagata igê na aitangihami.

¹⁷Vikana o Kirisito ki gâga i pasimi, suria mu tongesuria. Inê kê nunginungi, hanana mu nganganihaga igê na hetakuiha, i hunasigamu.

¹⁸Ma kê nunginungi, hanana henira na kariana hato God igamu kamu girara mu rongorongogirara, vi na hetakuiha iana o Kirisito ki raha ngavê. Ngaia ki buhira na enoni hato i maveta hagenani. Ngaia ki gâga tare, ki teha, ma ki nganganihaga.

¹⁹Inê kê nunginungi, hanana mu girara, vi na hetakuiha iana ki raha teha ngavê, ma ki asa na enoni, vi ge girara hagenani. Inê kê nunginungi, hanana vi God marena ki angarigi nga na aitangihami hagenani.

²⁰Ge visia raha God. Renia na raramohana i tagara i pasika, na mahatanga iana ki raha teharigi na ani mavê na marâ, ga girara ga nungigi, se ga takusigi.

²¹Igê na haku na enoni, ga tongesuri, ma ka obahaku henia o Kirisito Jesu, ka visia raha God tare ma tare ma, mareha vige page hato. Monari.