Read Kahua EPESO 5 Bible Online

EPESO 5 - Kahua bible

EPESO 5

¹Igamu ka na kariana God. Ngaia ki takuigamu. Tahema i tuguhigamu, vi gamu uhungia, kamu amaka suria.

²Na hetakuiha ki tuguhia i marungia na mêrihami, tagenana manga o Kirisito, i takuigia, ma ki me tangagia. Ngaia ki tagarenia tanga God na mêrihana manga na votovoto koro na vogasiha, i hagakoro obana God.

³Renia igamu ka na kariana God, tahema i pe ararigamu, vi gamu tamasi renia na paronga era, se vi renia na ani mavê na tauha era, se vi renia na maongoha.

⁴Ma nikâ i pe ararigamu, vi gamu tamasi bera, se vigamu tamasi bekabekaga, se vigamu hagatara bera. Ki tuguhigamu hete, mu visia koro God.

⁵Mu takotako maninga: i asa hagetage, vi ge oga igê na Arahanga iaterua o Kirisito ma God na enoni, i paronga i era, se i tanu era, se i maongo, suria na maongoha ki manga na vogasiha tanga na ataro.

⁶Siana ta na enoni ki hagaparugamu renigi na tamasinga bekabekaga ngegana. Surigi na tarani nga ngegana God ki page hagaitangira surigi na enoni, ga guguruga tanga.

⁷Tahema mu hinarura nga na enoni ngegana.

⁸I nago igamu kamu oga igê na mengo, ma suria igamu ki na kariana na Araha, igamu kamu oga igê na marara.

⁹Suria ngaia nga na marara kani hagarahagi na ani mavê na koroha, ma na otoha, ma na monariha.

¹⁰Mu uhungia nga, hanana mu giraragi na marâ, ga hagakoro obana God.

¹¹Mu hinarura nga na enoni, ga oga igê na mengo ma ka mangara na apinige era. Mu ranganira mave hete.

¹²Manga ga tamasigi na marâ, ngaira ka tanugi pinihi, na tarana ngekana ki na agua ni makiha.

¹³Ma ki manga ga ranganigi mave na marâ hato ngegana, ngekana ngaira ka bâsigi maninga, vi ga manga i he.

¹⁴Suria na marâ, ga bani rangania mave, ngaia ki voravora renia na marara. Tahema igê na ki ka vi, “Gu rite tenia na mêruha! Gu mêri aporo tenira na ani ga me! Mo Kirisito ki page mavesigo.”

¹⁵Mu bâbâ maninga, manga i he kanimu mauri. Siana kamu mauri mangara na enoni, ga bonobonoga. Ma kamu mangara hete na enoni, ga takotako.

¹⁶Siana kamu gâga purua ma, ma kamu gâga maninga tare hete, suria i ngekê ki na tangiani ni heuhungiha.

¹⁷Vikê siana kamu gâga bonobono, ma kamu uhungia hete, hanana mu tarahugi na marâ, na Araha i obanigamu, vi gamu tanugi.

¹⁸Siana ka ruguhigamu na tonoha, renia na tarana ngekana ki page aerasigamu. I araria vige angarigamu ngavê hete na Higona Apu.

¹⁹Mu kiki tangagamu heri igê na ringe apuna, na ki apuna, ma na ki ni rotu. Mu kirigi na ki apuna ma na ringe apuna tanga na Araha, matena mu visia raha igê na aitangihami.

²⁰Igê na raramohana na Araha iaka o Jesu Kirisito mu visia koro tare God Vaemana renigi na ara ni marâ.

²¹Enoni êragi, mu hanetasigamu heri, suria mu hanetasia o Kirisito.

²²Igamu na gete êragi, mu têtê na viteata na mane iami, tagenana manga mu tê viteana na Araha.

²³Renia na mane êragi ki bêngenia na gete iana, tagenana manga o Kirisito ki bêngenia na haku na enoni, ga tongesuri. Ma nikâ o Kirisito ki na Hagamauri iana na haku na enoni, ga tongesuri. Na haku ngekê ki manga na apena na enoni, mo Kirisito ki manga na bêna.

²⁴Tahema na gete êragi ki tuguhira, ga têtê viteata na mane iata igê na ara ni marâ, tagenana manga na haku na enoni, ga tongesuri, i tê viteana o Kirisito.

²⁵Igamu na mane êragi, mu takuira na gete iami, tagenana manga o Kirisito i takuia na haku na enoni, ga tongesuri, ma ki kasi manavana ki me tanga.

²⁶Ngaia ki kato vikana, hanana i tagarenia na haku na enoni, ga tongesuri, tanga God. Renirerua na manuha apuna ma na tamasinga na tongesuriha ngaia ki tanania, ki matarotaro,

²⁷hanana i naka tanga ngaia marena na haku na enoni, ga tongesuri, i bâkoro era tanga ngaia marena, i matarotaro, ma ki pe makoraga, i pe tongotongoga, se vi ge herurumi, se vi na ani mavê na marâ, i pe koro, renia.

²⁸Na mane êragi ki tuguhira, ga takuira na gete iata, tagenana manga ngaira ga takuira so na apeta mareta. Na mane êragi, i takuia na gete iana, ngaia ki takuia so marena.

²⁹(I asa ta na enoni, vi ge kitenia so na apena marena. Ngaia ki hagangêa, ma ki marupea hete, tagenana manga o Kirisito i marupea na haku na enoni, ga tongesuri,

³⁰suria na haku ngekana ki manga na apena, ma igia ka na agua igê na apena.)

³¹Na Buka Apuna ki vi, “Tahema na mane ki page panirerua o vaemana ma kenana, ma ki page gâga haku henia na gete iana, ma ngairerua karu page vora manga na vere tage togo ma.”

³²Igê na tamasinga ngekê ki tâ pinihi ta na girarana raha. Inê mareku kê takusia, na girarana ngekê ki tamasi renirerua o Kirisito ma na haku na enoni, ga tongesuri.

³³Ma nikâ ngaia ki tamasi renigamu nogami: na ara ni mane êragi ki tuguhia, i takuia na gete iana manga ngaia so marena, ma na ara ni gete êragi ki tuguhia, i hanetasia na mane iana.