Read Kahua EPESO 6 Bible Online

EPESO 6 - Kahua bible

EPESO 6

¹Igamu na kare, ki tuguhigamu, mu têtê viteata na enami, manga i marisimi igê na hagesuringa iana o Kirisito.

²“Kenamu ma vaemamu ko takuirerua.” Na ramata ngekê ki hagenago tangagamu, ma ki suru tangagamu nikâ, ki vi,

³“Mu katokato vikana, hanana na ara ni marâ ka korokoro tangamu, ma kamu gâga arihu i maveta.”

⁴Igamu na enani kare, siana kamu hagamangarira na karemi. Mu hagesurira, ma kamu hagaotora hete suria na hagesuringa iana o Kirisito.

⁵Igamu na enoni vurivuri, mu têtê viteata na araha iami ikê i maveta. Mu hanetasira, ma kamu magutenira. Mu tagara tangara igê na mêrihami hagenani, tagenana manga mu tagara tanga o Kirisito.

⁶Siana kamu katokato vikana, suria ma vi ngaira ka gâga henigamu, hanana vi igamu kamu obanira, vi ga visigamu koro. Ma suria igamu ka na enoni vurivuri iana o Kirisito, mu katogi hete i maurihami hagenani na marâ, God i obanigi.

⁷Vikana mu vagevagesigi na tagaraha iami, manga i marisimi na kare vurivuri. Mu tagara, manga mu tagara tanga na Araha, mareha vi tangara ma na enoni.

⁸Mu bani girara, vi na Araha ki page vuria na ara ni enoni meni na tagaraha koro, i tanugi, he naka vi ngaia ki na kare vurivuri, se mareha.

⁹Igamu na araha, mu katokato nogami vikana tangara na kare vurivuri iami. I hato, vi gamu hagamakukura. Mu takusia maninga na tarana ikê: igamu ma na kare vurivuri iami, igamu hato ki na kariana na Araha God, i katora na ara ni enoni igê na tarana, i tage tora ma.

¹⁰Hoita, mu obahaku henia na Araha, ma kamu naka, ki hagaramonigamu tare renia na raramohana raha hunia.

¹¹Mu tangaru renigi na ara ni tangaruha, God i vategamu renigi, hanana mu girara mu rêra pusia Satana, i uhungia, vi hagabekasigia tare.

¹²Suria igia ka pe henahunahu henira na enoni, ma henira hete na ataro era i bevoa purua, henira na ani ga araha, ma na ani ga ramata, ma na ani i tonga na raramohata, hanana ga tihigia igê na bagabevoana ngekana.

¹³Tahema i ngekê mu tangaru renigi na tangaruha, God i votogi! Hanana, matena i arâ me na bagabevoana, igamu kamu page girara mu rêra pusia na merongami, i sugarigamu, ma i murina na matena mu uhungigi bâraha na ara ni tarani, igamu kamu page rêra nganganihaga mênga igê na bani peregami.

¹⁴Tahema mu nanê. Mu hogotenia na monariha igê na kâmi. Mu hagatugunigamu maremi renia na paronga koro ma oto, manga na mane ni me i ngahingahi renia na kapa i matona.

¹⁵Na marumuha iami, hanana mu tarohenia na taroha koro ni marapeha, ki mangagi na buti i ugami.

¹⁶Mu taua tare na tongesuriha manga na bêata. Renia ngaia igamu kamu page girara mu ragaraga hunigi na mage rarata, i hanatenigi Satana.

¹⁷Mu taua na tahinga manga na rarasê na kapa, ma kamu taua na tamasinga iana God manga na tatapa borahu, na Higona Apu i vategamu renia.

¹⁸Igê na ara ni marâ ngegê mu nunginungi, ma kamu avarasia God. Mu nunginungi tare igê na raramohana na Higona Apu. Tahema mu bâbâ maninga tare, ma siana ki meme na apemi. Mu nungia tare God tangara na kariana hato.

¹⁹Ma kamu nungia God tangê inê nikâ, hanana i tamaniê igê na tamasinga, matena gê tamasi, hanana inê kê tamasi tatahura, ma kê rangania na Taroha Koro.

²⁰Inê ki na mane tora tamasinga renia na Taroha Koro ngekê, ma i ngekê inê kê oga i ruma ni hagaitangiha. Tahema mu nunginungi, hanana inê kê tamasi tatahura nga renia suria i tuguhiê.

²¹O Tigiko, na goaka hetakui igê na tongesuriha ma ki tamanigami bâkoro igê na tagaraha tanga na Araha, ngaia ki page hagarongogamu renigi na ara ni tarohaku, hanana igamu kamu page girara, vi manga i he na ogaha iaku.

²²Tahema inê kê hagatorangenia vê tangagamu, hanana i hagarongogamu renigi na ogaha iamami hato, ma ki hagaramonigamu.

²³Inê kê nungirerua God Vaemana ma na Araha o Jesu Kirisito tangagamu, na goaku hato igê na tongesuriha, hanana garu vategamu, kamu marape ma kamu hetakui heri, ma kamu nganganihaga igê na tongesuriha.

²⁴Inê kê nungia God, ki korokoro tangara na enoni hato, ga takuia na Araha iaka o Jesu Kirisito tare ma tare ma.