Read Kahua PILIPI 1 Bible Online

PILIPI 1 - Kahua bible

PILIPI 1

¹Inê Paulo, henia o Timoti, igamirua na kariana o Kirisito Jesu. Inê kê sege tangagamu na enoni hato, mu oga i hinua i Pilipi henira na enoni raha igê na rotu, ma henira na enoni getera, ga tamanigamu igê na rotu. Igamu hato ki na kariana God, ma kamu tongesuria o Kirisito Jesu.

²Inê kê nungirerua God Vaemaka ma na Araha o Jesu Kirisito, karu takuigamu, ma karu korokoro tangagamu, karu vategamu na marapeha.

³Inê kê visia koro God, gê rahesia renigamu hato igê na ara ni matena, inê kê takusigamu igê.

⁴Ma igê na ara ni matena gê nungia God, ki tamanigamu, inê kê vagevage, matena gê nunginungi,

⁵renia igamu kamu tamaniê bâkoro igê na taroheniana na Taroha Koro, haganega tenia na matena, gê râ me moramora i pasimi, mataro me i ngekê.

⁶Inê kê girara bâkoro na tarana ngekê: God ki bani haganega na tagaraha koro ngekê i pasimi, ma ngaia ki page uria na tagaraha ki bê ki arâ, mataro me ki hagahatongia bâkoro igê na Tangiana, i arâ me igê o Kirisito Jesu.

⁷Inê kê takusigamu tare, ma kê vagevage bâraha i obaku. Tahema ki arariê, vi gê hatahata vikana renigamu. Renia mu tamaniê bâraha igê na tagaraha, God i ateê tanga, i ngekê, matena gê oga igê na ruma ni hagaitangiha, ma nikâ i nago, matena gê asitatara mênga, hanana gê ramoramo pusia na Taroha Koro, ma kê hagagatagatania i pasita na enoni, ga tongesuri.

⁸God ki girara, vi inê kê pe hagaparu, matena gê vi, vi inê kê takuigamu bâraha, tagenana ma manga o Kirisito Jesu i takuigamu.

⁹Na nunginungiha iaku tangagamu ki manga ikê: inê kê nunginungi, hanana na hetakuiha iami ki ama ni raharaha nga, ma kamu girara na ta ki monari, ma kamu hagakitagi bâkoro, hanana mu girara, vi na ta ki oto ngavê.

¹⁰Ma kamu girara mu atea na ta kani koro teha. Tahema igê na Tangiana, i page arâ me igê o Kirisito, ki asa ta na marâ, i pe koro, vi ge gâga i pasimi, se ta na marâ vi ge hagamakigamu.

¹¹Ma kê nunginungi, hanana mu tanugi ma na marâ, ga korokoro monari ngavê. O Jesu Kirisito, ngaia getea ma, kani girara i katogamu, kamu paronga vikana, hanana mu kasia akê ma kamu visia raha God.

¹²Goaku igê na tongesuriha, inê kê obanigamu, vigamu girara na tarana ikê: na marâ, ga tarahuê, ka katora na enoni, ka tongesuria ngavê na Taroha Koro.

¹³Tahema ngaira hato na mane ni me, ga bâsuria na ruma iana na Gavumane, ma na enoni getera hato ikê ka girara, vi inê kê oga igê na ruma ni hagaitangiha, renia inê ki na kariana o Kirisito.

¹⁴Ma suria inê kê oga igê na ruma ni hagaitangiha, tahema ga rako era na goaka igê na tongesuriha ka ama ni hagêguritogo nga renia na Araha, ma ngekana ngaira ka ama ni ramoramo nga, ma ka pe magu, vi ge ateate renia na tamasinga iana God.

¹⁵I monari, tani na hitangita ka tarohenia o Kirisito, suria ngaira ka hengari, ma ka hemangari; ma tani ka tarohenia o Kirisito ototo ma.

¹⁶Na ani ngegê ka tarohenia o Kirisito, suria ngaira ka takuiê maninga, renia ngaira ka bani girara, vi God ki bani ateê, kê ramoramo pusia na Taroha Koro.

¹⁷Na ani getera ka pe tarohenia ototo ma o Kirisito, renia ngaira ka takusira mareta ma, vi ga tehateha. Ngaira ka obania ma, vi ge ama ni hagaerasiê nga, matena gê oga igê na ruma ni hagaitangiha.

¹⁸Naka ma ga manga ngegana! I koro ma tangê. Inê kê vagevage, renia na marâ, i teha, i manga ikê: ga tarohenia o Kirisito igê na ani mavê na tarana, naka ma ga tarohenia ototo, se pe oto. Ma inê kê page vagevage tare,

¹⁹renia inê kê girara, ga page rupasiê, renia igamu kamu nunginungi tangê, ma suria i tamaniê na Higona Apu iana o Jesu Kirisito.

²⁰Inê kê tangasia bâraha, ma kê hagêguritogo, vi inê kê page katogi tare na marâ, ga tuguhiê, ma kê ramoramo nga, kê tarohenia o Kirisito i ngekê nga ma igê na ara ni mateni, ma ngekana inê kê page kasia akê o Kirisito igê na mêrihaku hagenani, henaka vigê mauri, se vigê meme.

²¹Suria na mêriha ki na ta? Tangê inê, na mêriha ki no Kirisito. Ma na mera ki na marâ koro era tangê.

²²Manga gê mauri nga ki bê ki arâ, hanana vi gê girara gê ama ni tagara koro nga, manga ngekana, inê kê pe girara, vi na ani ta na hitangiterua kanigê atea.

²³Inê kê tê ruarua. Inê kê obania bâraha, vi gê meme, ma kê gâga henia o Kirisito, suria na marâ ngekana ki na tarana koro teha tangê.

²⁴Ma ki koro teha tangagamu, manga vi inê ma kê ama ni mauri nga i maveta.

²⁵Na tarana ngekana inê kê girara, ma ngekana inê kê girara, vi inê kê page gâga nga. Inê kê page gâga nga henigamu hato, hanana gê tamanigamu, kamu ama ni gatagata nga igê na tongesuriha, ma kamu ama ni vagevage nga, suria mu hagêguritogo renia o Kirisito.

²⁶Tahema matena gê page vatugigamu nikâ igê, igamu kamu page ageage nga reniê, matena mu obâbahaku henia o Kirisito Jesu.

²⁷Hoita, igê na ogaha iami ki tuguhigamu, vigamu mauri suria na Taroha Koro renia o Kirisito. Manga ngekana, henaka vi inê kê girara gê vatugigamu, se i mareha, inê kê page rongoa, vi igamu kamu ura gatagata igê na tongesuriha, ma kamu obahaku, ma kamu tagara haku nga tanga na tongesuriha, i marisina na Taroha Koro.

²⁸Siana kamu magutenira na merongami. Mu ramoramo tare. Manga ngekana, igamu kamu hagagirarara, vi ngaira ki asa, vi ge page teharigamu, ma igamu kamu page teharira ngaira, suria ngaia nga God kani katogamu, kamu teha.

²⁹Renia God ki bani ategamu, kamu vora re na kariana o Kirisito, mareha vi suria ma vi igamu kamu tongesuria, ma suria nikâ hete mu hatamia na mamasiaganiha igê na tagaraha iami tanga.

³⁰Hoi, igia ka heariha pusia na marâ gi tage ma. Mu bani girara, i nago inê kê heariha, ma i ngekê igamu kamu rongoa, vi inê kê heariha mênga.