Read Kahua PILIPI 3 Bible Online

PILIPI 3 - Kahua bible

PILIPI 3

¹Goaku igê na tongesuriha, na hagahatongina na tamasinga iaku: inê kê nungia na Araha, ki hagakoro obami nga. I arariê, vi ve segegi so nikâ na marâ, gê bani segegi i nago, ma na tarana ngekana ki hagaraha nga na hinarunga iami.

²Mu hinarura na enoni, ga katogi na tarani ga pe koro. Ngaira ka mangara na o era. Na mane ngegana ka gatagata igê na reteani râ na gavoni na varata na enoni.

³Renia igia nga ki na ani, ga nahunia na morana na reteani râ na gavona na varana na enoni, ma ngaira ki mareha. Renia igia ka rahesia God igê na raramohana na Higona Apu, ma ka ageage, suria igê na mêriha iaka igia ka obahaku henia o Kirisito Jesu. Igia ka pe hagêguritogo renigi na marâ na apena na enoni.

⁴Ma inê, inê be girara ve hagêguritogo renigi na marâ ngegana. Manga vi ta na enoni, ma ke vi, vi ngaia ki girara i hagêguritogo renigi na marâ na apena na enoni, ki ototo tangê ngavê, vi gê hagêguritogo renigi.

⁵Ga retea râ na gavona na varaku igê na varuta na tangiana, i murina gê vora me. Inê na Isiraelita, matena gê vora me, tenia na varo ninuni iana o Benamino, ma na enaku ma na êvariku ngaira nga ka na Siu. Inê kê râ surigi na ara ni ramata igê na Buka Apuna iata na Siu, suria inê ki na Pariseo.

⁶Ma kê obanira bâraha na enoni hato, vi ge râ surigi na Ramata igê na Buka Apuna. Tahema inê kê merongasira na enoni, ga tongesuria o Jesu. Manga mu takusia, vi na enoni ki girara i korokoro ma ki ototo i maana God, suria vi ngaia ki râ surigi na Ramata i na Buka Apuna, hoi, inê nga, gê pe tasi.

⁷I nago inê kê takusia ma, vi na marâ hato ngegana ka tamaniê, ma i ngekê inê kê kasigi râ renia o Kirisito.

⁸Ma ki mareha vi ngaigi ma na marâ ngegana. Inê kê kasigi râ na ara ni marâ hato renia na tarana, i koro ngavê: hanana gê girara, vi o Kirisito ki na Araha, ma kê obâbahaku henia. Renia ngaia o Jesu inê kê bani kasigi râ na ara ni marâ. Inê kê takusigi, vi ngaigi hato ka manga na roro, hanana gê voravora re na kariana o Kirisito,

⁹ma kê obâbahaku henia. I ngekê ki asa iaku, vi ve koro, ma vi ve oto i maana God renigi ma na tagaraha iaku mareku, suria vi inê kê râ surigi na Ramata i na Buka Apuna. I ngekê inê kê koro ma kê oto i maana God, suria inê kê tongesuria hete o Kirisito. God ki na ani i katoê, kê koro ma kê oto i maana, renia gê tongesuri.

¹⁰Na marâ ma, gê obania, kani ve girara o Kirisito, ma be hatamia na raramohana o Kirisito, i mêri aporo; ma kê obania, gê hatamia na mamasiaganiha, manga ngaia, ma kê maratorana nga ngaia igê na mera iana.

¹¹Manga ngekê, inê kê tongesuria, vi God kani page hagamêriê tenia na mera.

¹²Inê kê pe vi, vi inê kê bani tarahua na tarana ngekana, se vi ve bani koro teha. Ma kê ama ni uhungia nga hete, vi gê nahunia, suria o Kirisito Jesu ki bani gariê, kê vora na tamana.

¹³Goaku igê na tongesuriha, i monari, inê kê pe takusia, vi inê kê bani tarahua. Hoi, na marâ gi tage ma, gê katoa, ngaia kani ikê: inê kê pe tako renigi na marâ, gê murisigegi, ma kê uhungia nga hete, hanana vi gê tarahua na tarana i mamênga.

¹⁴Tahema inê kê tango ototo râ tanga na marâ, gê tuguhia, hanana vi gê nahunia na mêriha henia God, suria God ki uniê tanga na mêriha ngekana renia o Kirisito Jesu.

¹⁵Igia hato, ka girara maninga na mêriha suria na tongesuriha. I tuguhigia, viga tagenaka igê na tarana ngekana. Ma ki manga tani na hitangimi, ma ka nahunigi na takotakoha getigi, God ki page hagagiraragamu renigi na ta kani ararigamu.

¹⁶Henaka i manga ngekana, ma na tarana i raha, kani manga ikê: nikâ, ge arâ tare surigi na ramata, igia ga bani râ surigi me, mataro me i ngekê.

¹⁷Goaku igê na tongesuriha, mu ama ni amaka suriê nga, igamu hato. Igami kami bani hagabângenia na tarana koro tangagamu. Mu bâsira maninga na enoni, ga râ suria na tarana ngekana.

¹⁸Na marâ, inê gê kahu visigi tangagamu, inê kê bani visigi tangagamu hagarako i nago, ma i ngekê inê kê visigi aporo, ma kê angi: ga rako na enoni, ga oga erasia na mera iana o Kirisito igê na kuruse.

¹⁹Ngaira ka arâ tanga na agua ni hagaitangiha. Ngaira ka obanigi ma na marâ, na apeta ga tenigi. Ngaira ka paroparo renigi na marâ, i ararira, vi ge maki renigi. Ma ngaira ka takusigi ma na marâ ni maveta.

²⁰I pasika nga kani pasina God, ma igia ka naasia bâraha, vi arâ me tenia God, na Hagamauri iaka, na Araha o Jesu Kirisito.

²¹Na apeka ka pe ramo, ma ka girara ga meme, ma ngaia ki page hagariariagagi, ma ki katogi, ka bâbâ manga na apena ngaia marena, i mêri aporo. Ngaia ki katokato vikana, suria i tonga na raramohana, hanana vi marungira na ara ni marâ hato.