Read Kahua KOLOSE 2 Bible Online

KOLOSE 2 - Kahua bible

KOLOSE 2

¹Inê be hagagiraragamu renia na tagaraha raha iaku tangagamu, ma tangara na enoni i Laotisea, ma tangara na enoni hato, gê pe vatugira noga.

²Inê kê kato vikê, hanana gamu ramoramo, ma kamu obâbahaku igê na hetakuiha, ma kamu girara bâkoro ngavê, ma kamu rongorongogirara ngavê na katoha pinihi iana God. Na katoha ngekê ngaia ki no Kirisito.

³Ma i pasina ka oga pinihi igê na ara ni ruruguha na takotako mataha ma na giraraha iana God, ma ngaia ki hagagiraragia renigi.

⁴Hoita, be vi tangagamu: siana kamu hagamarumungenia ta na enoni ki hagabekasigamu renigi na hagaparunga, henaka vi ga rongo manga na tamasinga ga monari.

⁵Renia, henaka vi inê kê pe goga henigamu, inê kê takusigamu tare, ma kê vagevage, suria gê giraragamu, mu tongesuria gatagata o Kirisito, ma kamu ramoramo, ma kamu ura nganganihaga haku igê na tongesuriha iami.

⁶Renia igamu kamu bani hagamarumungenia noga o Kirisito Jesu, ki marungigamu, ki tuguhigamu, vigamu mauri, manga na Araha i obanigamu, vi gamu mauri.

⁷Ga bani hagesurigamu vikê: mu vagavagaraga i Kirisito, ma ngaia ki na hagêguringana na mêriha iami, ma ki tuguhigamu, vigamu ama ni gatagata nga igê na tongesuriha iami, ma kamu visia koro ngavê God tare.

⁸Mu hinaru, siana ta na enoni ki tugamu renigi na takotako purua ma na hagaparunga iata na enoni, ga arâ me tenigi na hagesuringa tenira na enoni, ga hagatarêngenigi, ma tenira na ataro, ga marungigi na marâ hato, ma ka pe râ me tenia o Kirisito.

⁹Renia o Kirisito, i vora enoni, ki God monari.

¹⁰Ma God ki bani vategamu na morana na mauriha, suria mu obahaku henia o Kirisito. Mo Kirisito ki marungira na ara ni ataro, ga ramata ma ka tonga na raramohata.

¹¹Renia mu obahaku henia o Kirisito, ka bani retegamu. I pe vi, vi na enoni ka bani retegi râ na gavoni na varami, ma ki vi hete, vi igamu kamu bani têa na reteha iana o Kirisito. Na reteha ngekana ki vi, ga bani retegamu râ tenia na raramohana na eraha i pasina na enoni.

¹²Renia na matena mu batesimo igê, ka bani ahunigamu henia o Kirisito, ma igê na batesimo nikâ God ki bani hagamêrigamu aporo henia o Kirisito tenira na enoni, ga me.

¹³Igamu kamu me renigi na tasi iami tanga God i nago, ma renia igamu kamu mareha vi na Siu, ma kamu pe râ surigi na Ramata iata na Siu. Ma i ngekê God ki bani hagamêrigamu aporo henia o Kirisito! God ki bani bonotenigi na ara ni tasi hato iaka.

¹⁴Ngaia ki naka vê na pepa, i bonasigia, vi ga arâ surigi na marâ, ga visigi na Ramata. Na pepa ngekana ka oga igê na tasi iaka. Ma ngaia ki bonotenia hagetage, suria ngaia ki rapusia igê na kuruse.

¹⁵Ma igê na kuruse, ngekana ngaia ki hatongia na raramohata na ataro, ga ramata ma ka araha. Ngaia i rakura, ma ki raura, ma ki hagabâbângenira, matena ngaia i atata me henia na mahe i bêna, na girarana, vi ngaia ki teha.

¹⁶Manga ngekana, siana ta na enoni ki nakagi na ramata tangagamu renigi na marâ, mu ngaugi se tonomigi, se renigi na tangiana ni hagarahenga i na ara ni harisi, se renigi na tangiani raha na hageha haoru, se renia na Tangiana ni Mamaroha.

¹⁷Na ara ni marâ ngegana ka nununigi na marâ i na matena i hemuri me; na morana ngavê ki no Kirisito.

¹⁸Ga oga na enoni, ga vi, vi ngaira ka vora koro teharigamu, renia vi ga bâsigi tani na marâ igê na maruteha, ma ka ruhira mareta hagaparu ma, ma ka barigira na enoni, ga rahesira na angelo. Na enoni ngegana ka hagarahasira mareta purua ma. Ngaira ka hagahagaparu ma, suria ngaira ka pe takusia God. Siana kamu hagamarumungenira ka hagaparugamu.

¹⁹Ngaira ka bani kasia vê o Kirisito, na bêna na haku na enoni, ga tongesuria. O Kirisito ki bêngenia na haku hagenani na enoni, ga tongesuria, ki marupea, ma ki têa haku, manga na surina ma na varogina ga têa haku na apena na enoni, ma ki raharaha suria na katoha iana God.

²⁰Igamu kamu bani me henia o Kirisito, ma kamu bani tahi tenira na ataro, ga marungigi na marâ hato. Hoi, tanu hega kanimu paronga mangara na enoni, i nahunira na maveta? Tanu hega kanigamu râ surigi na ramata manga ngegana.

²¹“Siana kamu taura tani na marâ,” “Siana kamu ngaua tani na marâ,” “Siana kamu hataria tani na marâ”?

²²Na marâ ngegana ka tamasi renigi na marâ, ga hatohato râ, matena ga katogi. Na marâ ngegana ka na ramata ma na hagesuringa iata ma na enoni.

²³I monari, na ramata ngegana ka bâ manga vi na takotako mataha, suria vi ngaira ka vi, vi na enoni ki tuguhira, vi ga rahesira na angelo, ma suria ngaira ka vi, vi ngaira ka ruhira mareta, ma hete ga hagaparu ma, ma suria vi ngaira ka kasi mena tanga na apeta. Ma ki mareha. Na ramata ngegana ki asa, vi ge hagaotogi na teniha na apena na enoni.