Read Kahua KOLOSE 3 Bible Online

KOLOSE 3 - Kahua bible

KOLOSE 3

¹Igamu kamu bani mêri aporo henia o Kirisito. Tahema ki tuguhigamu, vi gamu barigigi na marâ i pasina God, ma i ngekana o Kirisito ki oga so igê na atohana na araha i otona God.

²Ki tuguhigamu, vigamu takusigi tare na marâ i pasina, ma siana vi na marâ ikê i maveta.

³Renia igamu kamu bani me, ma na morana na mêriha iami ki pinihi mênga henia o Kirisito i pasina God.

⁴Na morana na mauriha iami ki no Kirisito, ma na matena ngaia ki page aporo me nikâ, igamu nikâ kamu page oga henia, ma kamu page nahunia na arahanga henia.

⁵I tuguhigamu, vigamu hagamagahurugi na teniha era, ga oga i pasimi, na ani manga na gamogamoha, ma na tagatagaraha bera, na teniha ni mane se ni gete, na obaniha era, ma na vanasiha, (renia na enoni, i vanavanaga, ngaia ki manga na enoni, i vogasia na ataro).

⁶Renigi na tarani ngegana God ki page hagaitangira na enoni, ga pe tê viteana.

⁷I ta na matena i nago igamu maremi nikâ kamu râ surigi na teniha era ngegana, i na matena ga aharêsigamu.

⁸Ma i ngekê ki tuguhigamu, vigamu kasigi râ na tarani igê. Siana kamu mangariaga. Siana kamu bagamangamangariaga. Ma siana kamu merongasira na enoni. Siana hagetage kamu guhaguha, se vigamu tamasi bera.

⁹Siana kamu hagaparu, suria igamu kamu bani kasigi râ na bani ogaha iami ma na bani tauhami,

¹⁰ma kamu bani tê na ogaha haoru. Igamu kamu hâhâruga renia na ogaha haoru, ma God, i hagavoragamu, ngaia ki hagakorogamu nga, kamu matorana ngavê manga ngaia, hanana i hagagiraragamu ngavê renia marena.

¹¹Tahema ngaira ka tagenata ma na enoni, ga pe Siu, ma na Siu, na enoni, ga bani retegi râ na gavoni na varata, ma na ani, ga pe retegi, na mahuara ma na enoni i na agua getigi, na enoni vurivuri, ma na araha iata. Ma na ani gi tage ma na marâ i teha: ngaia ki no Kirisito, renia o Kirisito ki angarigamu hato.

¹²Igamu ki na kariana God. Ngaia ki takuigamu, ma ki bani ategamu tanga marena. Tahema ki tuguhigamu, vi gamu mamasiagaheri, kamu hekomaniheri, kamu haritagi, kamu hemarupegi, ma kamu piringiape.

¹³Kamu hepiringiape, ma kamu hebonotenigi, matena mu hevisigi. Gamu hebonotenigi tagenana manga na Araha, i bonotenigi na tasi iami.

¹⁴Ma henigi na tarani hato ngegana igamu kamu hagatongania na hetakuiha, renia na hetakuiha ki katogamu, kamu obâbahaku ngavê.

¹⁵Na marapeha i vategamu o Kirisito ke hagaotogi na aitangihami. Renia God ki bani unigamu haku igê na haku gi tage, hanana mu hatamia igê na marapeha ngekana. Ma kamu visia koro God.

¹⁶Na taroha renia o Kirisito ke raramohaga ngavê i pasimi. Igamu kamu hehagesurigi, ma kamu hekanukanu renigi na takotako, ga mataha ngavê. Igamu kamu kirigi na ki i na Buka Apuna, na ki na rotu, ma na ki apuna. Igamu kamu kiki tanga God, ma kamu visia koro God i mêrihami.

¹⁷Hoi, na ara ni marâ, mu tanugi, ma kamu visigi, ki tuguhigamu, vi gamu katogi ma kamu visigi igê na raramohana na Araha o Jesu, ma renia ngaia igamu kamu visia koro God Vaemana.

¹⁸Igamu na gete êragi, mu têtê viteata na mane iami, renia na tarana ngekê ki marisimi, suria igamu ka na kariana o Kirisito.

¹⁹Igamu na mane êragi, mu takuira na gete iami, ma siana kamu rabahira.

²⁰Igamu na kare, ki tuguhigamu, vigamu têtê viteata tare na enami, suria igamu ki na enoni kirisitiano. Renia na tarana ngekana ki hagakoro obana God.

²¹Igamu na enani kare, siana kamu ramonira tare na karemi, suria igê na tarana ngekana ki pe asa, vi ngaira ke page takotako hagetage.

²²Igamu na enoni vurivuri, mu têtê viteata na enoni, ga araha tangagamu, igê na ara ni marâ, ma siana kamu katogi suria ma vi ngaira ka onosurigamu, suria ma mu obanira, vi ge visigamu bâkoro, ma siana kamu nakanaka igê na tagaraha iami, renia mu hanetasia na Araha o Jesu Kirisito.

²³Na ani mavê na marâ mu tanugi, mu tanugi i mêrihami hagenani, manga nogana mu tagara tanga na Araha o Kirisito Jesu, mareha vi tanga na enoni.

²⁴Mu takusia na Araha o Kirisito Jesu, ki page vurigamu renia na marâ, i bani surua tangara na kariana. Renia na morana na Araha, mu tagara tanga, ngaia ki no Kirisito.

²⁵Na ara ni enoni, i bagatauhana ngaia ki page tarahua na hagaitangiha, meni na marâ era, i tanugi. Renia tanga God na ara ni enoni ka tagenata ma, matena ngaia i surira.