Read Kahua 1 TESALONIKA 1 Bible Online

1 TESALONIKA 1 - Kahua bible

1 TESALONIKA 1

¹Igami, inê Paulo, o Silasi mo Timoti, kami segesege tangagamu, na haku na enoni i Tesalonika, mu tongesuria o Kirisito. Garu angarigamu God Vaemana mo Jesu Kirisito, na Araha. God ke vategamu na hetamaniha ma na hekomaniha iana.

²Igami kami visia koro God tare renigamu hato, ma kami takusigamu tare, matena mi nunginungi.

³Na ara ni matena mi nunginungi tanga God iaka ma Vaemaka, igami kami takusia, manga i he igamu kamu hagabângenia na tongesuriha iami igê na mêriha iami, ma manga i he igamu kamu tagara bâraha, suria mu takuia o Kirisito, ma manga i he ki nganganihaga na naasiha iami renia na Araha iaka o Jesu Kirisito.

⁴Goamami igê na tongesuriha, igami kami girara, vi God ki takuigamu, ma ki bani ategamu, kamu vora na kariana.

⁵Renia igami kami hagagiraragamu renia na Taroha Koro, ma igami kami pe tamasi purua ma, igami kami katogi nikâ hete na mena igê na raramohana na Higona Apu, ma igami kami hagabâsigamu, vi igami kami tongesuria gatagata, vi na Taroha Koro ki monari. Igamu kamu bani girara na mêriha iamami, matena igami kami oga i pasimi; ma na tarani ngegê ka tamanigamu.

⁶Igamu kamu amaka surigami, igami ma na Araha nikâ. Ma ki henaka igamu kamu hatamia bâraha na mamasiaganiha, na Higona Apu ki vategamu, kamu vagevage, suria mu tongesuria na taroha renia o Jesu Kirisito.

⁷Tahema ki araria, vi ngaira hato na enoni i Masetonia me Agaia, ga tongesuri, ka amaka surigi na parongami koro ngekana.

⁸Suria na Taroha renia na Araha ki râ me tenigamu tangara na enoni i Masetonia me Agaia, ma nikâ na enoni hato i na ara ni agua ga rongoa, vi manga i he kanimu tongesuria God. Manga ngekê, ki pe ararigami, vi gami visia nikâ ta na marâ tangagamu.

⁹Ngaira hato na enoni ngegana ka tarohenigamu, manga hanana igamu unigami banu, matena mi vatugigamu moramora igê, ma manga hanana igamu nakara vê na ataro, ma kamu maatia God, hanana mu rongoa na tamasinga iana God monari ma mamauri, ma kamu rahesia,

¹⁰ma kamu naasia o Karena, i page arâ me tenia God Vaemana. Na Karena ngekê ngaia ki no Jesu, i mêri aporo tenira na enoni, ga me, ma ki hagatahigia tenia na hagaitangiha iana God, i page arâ me.