Read Kahua 1 TESALONIKA 4 Bible Online

1 TESALONIKA 4 - Kahua bible

1 TESALONIKA 4

¹Hoita, goamami igê na tongesuriha, igami kami bani hagesurigamu, manga hanana i tuguhigamu, vi gamu mauri, hanana mu hagakoro obana God. Ma inê kê girara, igamu kamu bani mêri suria na tarana ngekana. Ma i ngekê igami kami nungigamu, ma kami kanukanugamu igê na raramohana na Araha o Jesu, hanana mu hagarahagi nga na parongami koro.

²Renia igamu kamu bani giraragi na hagesuringa, mi bani vategamu renigi igê na raramohana na Araha o Jesu.

³Ikê nga ka na marâ, God i obania tangagamu: i tuguhigamu, vi gamu mauri suria na tamasinga iana, ma siana hagetage kamu gamogamo.

⁴Na ara ni hitangimi na mane ki tuguhia, i torea na hehene iana, ma ki mauri henia, ma ki hanetasia igê na tarana, i hagakoro obana God renia, ma ki hagakoro obata na enoni renia.

⁵Ma siana ki tenia ma na apena, mangara na enoni ahuroto, ga pe toto suria God.

⁶Igê na tarana ngekana ki apu hagetage ta na mane, vi ge oga erasia na goana igê na tongesuriha, se vi ge hagahagaparua. Igami kami bani hagarongogamu renia na tarana ngekê, ma igami kami bani haganunugamu bâraha, renia vi na Araha ki page hagaitangira na enoni, ga katogi na tarani era ngegana.

⁷God ki pe unigia, vi ge gamogamo, ma ki unigia, hanana vi ga mauri suria hete na tamasinga iana.

⁸Hoita, manga vi na anima na enoni, ma ki usisitenia na hagesuringa ngekana, ngaia ki pe usitenia na enoni ma ki usitenia hete God, i vategamu na Higona Apu.

⁹I asa, vigami tamasi tangagamu renia na hetakuiha, suria igamu kamu bani takuira noga na tamami, ga tongesuri. Renia God marena ki bani hagesurigamu, hanana vigamu hetakuiheri.

¹⁰Ma igamu kamu bani takuira na goaka hato igê na tongesuriha i Masetonia hagenani. Tahema igami kami nungigamu, na goamami igê na tongesuriha, hanana mu hagaraha na hetakuiha iami.

¹¹Mu uhungia nga, kamu haritagi, ma siana kamu totora vero, ma kamu mauri surigi na tagaraha iami maremi. Na tarani ngegana igami kami bani visigi tangagamu, matena mi oga i pasimi.

¹²Igê na tarana ngekê na enoni, ga pe tongesuri, ka page visigamu koro, ma igê na tarana ngekê nikâ ki asa iami, vi gamu page oga hagêguria na anima na enoni.

¹³Goamami igê na tongesuriha, igami kami obanigamu, vi gamu girara na tarana i tarahura na enoni, ga bani magahuru, hanana siana igamu ki rugurugu na obami mangara na enoni, ga pe naasia na mêriha i pasina God.

¹⁴Igia ka tongesuria, vi o Jesu ki me, ma ki mêri aporo. Tahema igia ka tongesuria, vi God ki page votoa na mêriha henia o Jesu tangara na enoni, ga tongesuria, ma ka bani me.

¹⁵Hoi, na hagesuringa ngekê iana na Araha igami kami visia tangagamu: igia na enoni, ga tahitahi mênga igê na tangiana, i page arâ me igê na Araha, ki asa iaka, vi ge hagenago tarata na enoni, ga bani me.

¹⁶God ki page unini, ki page tamasi na angelo raha, ki page rongo raha na ringena na ahuri iana na Araha, ma na Araha, ngaia marena, ki page soso me tenia na vavearo! Na enoni, ga tongesuria o Kirisito, ma ka bani me, ngaira ka page mauri aporo hagenago.

¹⁷Ma hemuri igia, ga tahitahi mênga i na matena ngekana, God ki page hakugia henira i haha igê na vaha, hanana igia ka arâ vurusia na Araha igê na bevoa tatara. I manga ngekana igia ka page gâga tare henia na Araha.

¹⁸Tahema igamu kamu hagamanapugamu heri renigi na tamasinga ngegana.