Read Kahua 1 TESALONIKA 5 Bible Online

1 TESALONIKA 5 - Kahua bible

1 TESALONIKA 5

¹Goamami igê na tongesuriha, i asa, vi igami kami sege tangagamu renigi na bevoani ma na mateni, ga page atata me igê na tarani ngegana.

²Suria igamu maremi kamu bani girara bâkoro, na Tangiana iana na Araha i page arâ me igê, ma ki arâ me manga na mane hanago igê na bungiana.

³Matena na enoni ka pe hinaru igê ka vi, vi “Na ara ni marâ ki koro ma. Siana ka hinaru,” ki paraparama, ma ki tarahura na hagaitangiha! Ma ki asa hagetage, vi ge gavatenia. Ma ki hagakakangi me manga na mamasiaganiha iana na gete, i riki na gerina, matena i sugia vige apara.

⁴Ma igamu, goamami igê na tongesuriha, kamu pe oga igê na mengo ma na Tangiana, i arâ me igê na Araha, ki asa, vi ge hagakangigamu manga na mane hanago.

⁵Igamu hato ka na enoni igê na marara, igê na mavetana. Igia ka pe oga igê na bungiana, se igê na mengo.

⁶Hoita, manga ngekê, siana igia ka gâga purupuru mangara na enoni, ga pe tongesuri. Ma ki tuguhigia hete, viga nanê, ma ka bâbâsurigia mareka.

⁷Suria nga na bungiana na enoni ka mauru nga, suria nga na bungiana na enoni ka totono nga igê, ma ka bekabeka.

⁸Ma igia ki na enoni igê na mavetana, ma ki tuguhigia, viga bâbâsurigia mareka. I tuguhigia, viga ama ni tongesuria nga o Kirisito, ma ka ama ni hetakuiheri nga, ma ka ama ni naasia nga God, i page hagatahigia. Na tarani ngegana ka na tarure, ga anumasigia pusia Satana.

⁹God ki pe ategia tanga vi ge hagaitangigia, ma ki ategia hete, vi hanana igia ka tahitahi renia na Araha iaka o Jesu Kirisito.

¹⁰Ngaia ki me renigia, hanana vi igia ka mauri henia, henaka vi igia ka tahitahi mênga, se viga bani meme, matena i aporo me.

¹¹Tahema mu hagagatagatanigamu heri, ma kamu hetamaniheri, manga hanana i na matena i ngekê akê.

¹²Goamami igê na tongesuriha, igami kami nungigamu nga, kamu hanetasira maninga na enoni, ga tagara bâraha i pasimi, suria na Araha ki bani atera, hanana vi ngaira ka hagaotogamu, ma ka hagesurigamu.

¹³Mu hanetasira ngavê, ma kamu takuira ngavê, renia ngaira ka tamanigamu bâraha. Mu hekomaniheri.

¹⁴Goamami igê na tongesuriha, igami kami nungigamu nga, hanana vigamu ramonira na enoni, ga marusi, vi ge tagara; gamu hagaramonira na enoni, ga magu; gamu tamanira na enoni, ga pe ramo, ma kamu piringiape henira na enoni hato.

¹⁵Siana kamu hagamarumungenia ta na enoni, ki barua na eraha renia na eraha, ma kamu uhungia tare nga hete, kamu hetamaniheri, ma kamu tamanira na enoni hato.

¹⁶Mu vagevage tare.

¹⁷Mu nunginungi tare.

¹⁸Mu visia koro God tare igê na ara ni marâ. God ki obanigamu, vi gamu katogi na tarani ngegana igê na mêriha iami, suria igamu ki na kariana o Kirisito Jesu.

¹⁹Siana kamu rêrapusia na Higona Apu.

²⁰Siana kamu haritohegi na tamasinga iata na enoni, ga vi, vi God ki tamasi i harata.

²¹Mu tahetara maninga i nago renigi na marâ hato. Mu taugi gatagata na marâ, ga koro,

²²ma kamu kasigi râ na ara ni marâ, ga era.

²³Igami kami nungia God, ki hagakorogamu maninga, suria ngaia ki vategia na marapeha iana, ma ki hagatahigamu, na aitangihami, na ataromi, ma na apemi tenigi na ara ni tasi, matena i arâ me nikâ igê na Araha iaka o Jesu Kirisito.

²⁴God, i bani unigamu, ki page katogi na tarani ngegana, suria ngaia ki hagamonarigi tare na tamasinga iana.

²⁵Goamami igê na tongesuriha, mu nunginungi tangagami nikâ.

²⁶Mu harite henira na goami hato igê na tongesuriha, ma kamu siginira, suria mu vagevage renira.

²⁷Inê, na urusina na Araha, kê bonasigamu, kamu tomania na leta ngekê tangara na goami hato igê na tongesuriha.

²⁸Inê kê nungia na Araha iaka o Jesu Kirisito ke takuigamu, ma ke korokoro tangagamu.