Read Kahua JOSUA 10 Bible Online

JOSUA 10 - Kahua bible

JOSUA 10

¹O Atoniseke na maneraha i Jerusaleme ki rongoa, vi o Josua ki henahuraua i Ai, ki su hagamakaka ma ki nahuia ki me na maneraha igê, manga i bani katoa noga vikana i Jeriko ma na maneraha igê. Ngaia ki rongo nikâ, vi na ai ni Gibeone ka naka na suruheri ni marapeha henira na Isiraelita ma ka oga i berarogata.

²Na ai ni Jerusaleme ka kone ma ka magu ngavê, suria i Gibeone ki na hinua raha mangagi na hinua raha ga tonga renira na maneraha. Ngaia ki na hinua i raha teharia i Ai, ma na mane ni me igê ka manisingenia na hearihatana.

³Vikê o Atoniseke ki kasi tamasinga tangara o Hohame na maneraha i Heberone, o Pirama na maneraha i Jaramuti, o Japia na maneraha i Lakesi, mo Tebire na maneraha i Egelone.

⁴Na tamasinga tangara ki manga ikê: “Râ me, kamu tamaniê, ke taharia i Gibeone, suria na ai ni Gibeone ka naka na suruheri ni marapeha henira na Isiraelita.”

⁵Hoi, na maneraha gi rima ngegana i Jerusaleme, i Heberone, i Jaramuti, i Lakesi me Egelone ka na Amorita. Ngaira ka hakura na mane ni me hato iata, ka oga rihia i Gibeone ma ka taharia.

⁶Na me i Gibeone ka kasi tamasinga tanga o Josua, i oga igê na tênga i Gilegale, ka vi: “Gu râ me nga ku tamanigami. Gu tako renigami. Gu hagatahigami. Na maneraha hato iata na Amorita igê na hungani ngaira ka pane haku ma ka taharigami.”

⁷Vikana o Josua henira na mane ni me hato iana ma henira na mane ni me ga manisingenia ngavê na hearihatana, ngaira ka tavoraha tenia i Gilegale.

⁸Na Araha ki vi tanga o Josua, ki vi: “Siana ko magutenira. Inê kê bani nakago, vigo page teharira. I bara ngavê na hitangita vige teharigo.

⁹Suria na bungiana hagenani o Josua ma na mane ni me iana ka tavo uga i Gilegale tanga i Gibeone. Ngaira ka hagagasuga ka taharira na Amorita.

¹⁰Na Araha ki katora na Amorita ka bagatatako, matena ga bâsira na mane ni me iata na Isiraelita. Na Isiraelita ka teharira, ka nahuira ma ka tarigenira vato igê na tara i Bete Gorone. Ngaira ka ama ni sugarira nga mataro me i Aseka me Maketi i Negeve.

¹¹Matena na Amorita ka gava vato suria na tara ngekana tenira na mane ni me iata na Isiraelita, na Araha ki katogi na êsusu na rangi ga rate mangagi na hê ki rangisira, matena ga gava tanga i Aseka. Na êsusu ngegana ka nahuhunira rako na Amorita teharira na ani na Isiraelita ka nahuhunira.

¹²Igê na tangiana na Araha ki katora na Isiraelita, ka teharira igê na Amorita, o Josua ki tamasi tanga na Araha. I maata na Isiraelita ngaia ki vi: “Arito, gu oga tonge i avorana i Gibeone. Hageha, gu oga tonge i avorana na maruguna i Aialone.”

¹³Vikê na arito ma na hageha karu oga tonge, mataro me na Isiraelita ka teharira na merongata. Na tarana ngekê ki bani oga igê na buka iana o Jasare. Na arito ki oga tonge igê na ritovagana suria na tangiana hagenani.

¹⁴Na Araha ki pe tê viteana rârâ na enoni vikana i nago na tangiana ngekana se vi i murina na tangiana ngekana. Na Araha ki tamanira na Isiraelita igê na hearihatana.

¹⁵I murina ngekana o Josua ma na mane ni me iana ka aporo tanga na tênga iata i Gilegale.

¹⁶Na maneraha gi rima iata na Amorita ka gava ma ka ahi igê na vaba i Maketa.

¹⁷Ta na enoni ki tarahura ma ki hagarongoa o Josua renia na agua ga ahi igê.

¹⁸O Josua ki bonasira na mane ni me iana, ki vi: “Mu purisigi na hê raha ma kamu purusia na vaba renigi. Mu kasira tani na me ka bâbâsuria na vaba.

¹⁹Siana kamu bâbâsuria igamu. Mu ama ni tarigenira nga na merongaka ma kamu taharia na murina na raoha. Siana kamu nakara ka arâ i hinua iata. Na Araha God iami ki katogamu kamu teharira.”

²⁰O Josua ma na mane ni me iana ka mutera. Ta kereani ma na merongata ka girara ga tarahua na hinua nganganihaga iata ma ka tahitahi igê.

²¹Hemuri na mane ni me hato ka aporo me bâkoro ma i pasina o Josua igê na tênga i Maketa. Na enoni hato i na agua ka magu ngavê, vige katoa tangara na Isiraelita ta na tarana, se vi na kere tamasinga.

²²Mo Josua ki vi: “Mu tangahia na vaba ma kamu merarâ me na maneraha gi rima ngegana tangê.

²³Ngekana ngaira ka tangahia na vaba ma ka torera hura na maneraha: tani tenia i Jerusaleme, tani tenia i Heberoni, tani tenia i Jaramuti, tani tenia i Lakesi, ma tani tenia i Egelone.

²⁴Ngaira ka merarâ tanga o Josua. O Josua ki hagahakura me na mane ni me hato iata na Isiraelita ma ki bonasira na araha iata na mane ni me iana, ka purigi so na riota na maneraha, ka tâ i ano. Ngaira ka kato vikana.

²⁵Hemuri ngaia ki vi tangara nikâ, ki vi: “Siana kamu magu se vigamu bagahagêguri. Mu togeaga nga ma kamu ramoramo, suria na Araha ki page katoa na tarana ngekê tangara na merongami hato.”

²⁶Hemuri o Josua ki nahuhunira na maneraha ma ki kuharenigi na gahuata tonganigi na apinige gi rima. Ngaira ka kuku rârâ mataro me ki su noga na arito.

²⁷Matena i su na arito, o Josua ki bonasira na me iana ka rupasigi vato na gahuata ma ka kasigi banu i rarona na vaba, ga merahura me tenia. Ngaira ka purusia na vaba renigi na bagahê raha, ga gâga mêngagi i ngekê.

²⁸Igê na tangiana ngekana o Josua ki taharia ma ki henahuraua na hinua i Maketa henia na maneraha igê. Ngaia ki mutera ngaira hato i hinua ngekana. I mareha rârâ tani vige tahi. Na tarana i katoa noga tanga na maneraha i Jeriko, kani katoa tanga nikâ na maneraha i Maketa.

²⁹Hemuri o Josua ma na mane ni me hato iana ka pania i Maketa ma ka râ tanga i Libina ma ka taharia.

³⁰Na Araha ki katora na Isiraelita ka henahuraua na hinua ngekê henia na maneraha igê nikâ. Ngaira ka mutera ngaira hato i hinua ngekana. I mareha rârâ tani vige tahi. Na tarana ga katoa noga tanga na maneraha i Jeriko, kaniga katoa tanga nikâ na maneraha i Libina.

³¹Hemuri o Josua ma na mane ni me hato iana ka pania i Libina ma ka râ tanga i Lakisi. Ngaira ka rihuia ma ka taharia.

³²Na Araha ki katora na Isiraelita ka teharia i Lakisi igê na ruata na tangiana ga heariha igê. Tagenana ma manga i Libina, ngaira ka mutera ngaira hato i hinua. I pe tahi rârâ tani.

³³O Horame na maneraha i Gesere ki râ me ki tamania i Lakisi, ma o Josua ki teharira o Horame ma na mane ni me iana ma ki mutera hato.

³⁴Hemuri o Josua ma na mane ni me hato iana ka pania i Lakisi ma ka râ tanga i Egelone. Ngaira ka rihuia ma ka taharia.

³⁵Ngaira ka henahuraua i rarona na tangiana gi tage. Ngaira ka mutera na enoni hato igê, manga ga katoa noga i Lakisi.

³⁶Hemuri o Josua ma na mane ni me hato iana ka pania i Egelone ma ka tagere i Heberoni igê na hungani. Ngaira ka taharia

³⁷ma ka henahuraua. Ngaira ka mutera na maneraha ma na enoni hato igê. Ngaira ka katogi vikana nikâ na hinua hagarangia i Heberoni. O Josua ki bonasira na me iana, ka ruhuruhua ngavê na hinua i Heberoni, manga ga bani katoa i Egelone. I mareha rârâ tani vige tahi.

³⁸Hemuri o Josua ma na mane ni me hato iana ka apariri tanga i Tebire ma ka taharia.

³⁹Ngaira ka henahuraua henia na maneraha igê ma henigi na hinua hato hagarangia. Ngaira ka mutera ngaira hato igê. O Josua ki katoa tanga i Tebire henia na maneraha igê na tarana, i bani katoa noga i Heberoni me Libina henia na maneraha igê.

⁴⁰O Josua ki henahuraua na apanena hagenani. Ngaia ki teharira na maneraha igê na barani, i hungani kerekê ma kereso ma i Negeve. Ngaia ki mutera na enoni hato igê suria na tamasinga iana na Araha God iata na Isiraelita tanga. I mareha rârâ tani vige tahi.

⁴¹Na hearihatana iana o Josua ki haganega i Katesi Baranea i Negeve, ki tariha i Gasa igê na tarasini, henia na apanena hagenani i Gosene, ki râ ki tariha i Gibeone.

⁴²O Josua ki henahuraura na maneraha hato ngegana henigi na apaneni iata igê nga na hearihatana ngekana, suria na Araha God iata na Isiraelita ki heariha pusira na Isiraelita.

⁴³Hemuri o Josua ma na mane ni me hato iana ka aporo tanga na tênga iata i Gilegale.