Read Kahua JOSUA 11 Bible Online

JOSUA 11 - Kahua bible

JOSUA 11

¹Matena o Jabini na maneraha i Hasore ki rongoa, vi na Isiraelita ka teha, ngaia ki kasi tamasinga tanga o Jobaba na maneraha i Matone, tangara na maneraha i Simirone, i Akasapa,

²igê na hungani i Galilea, i na maruguna i Jotano, hagarangia na rano i Galilea, igê na bena ma na tarasini, i oga igê na hinua i Tore.

³Ngaia ki kasi tamasinga nikâ tangara na Kananita ga oga hetangenia i Jotano, tangara na Amorita, na Hitita, na Perisita ma na Jebusita igê na hungani, ma tangara nikâ na Givita ga oga igê na gunitara na hungana i Heberoni igê na apanena i Misipa.

⁴Ngaira ka merarâ me na mane ni me hato iata. Ngaira ka gahu mangagi na one i one. Ngaira ka nahunira nikâ rako na hosi ma na kati ni me.

⁵Na maneraha hato ngegana ka hakura na mane ni me hato iata ma ka tênga hagarangia na ve i Merome, hanana ga meraheariha na Isiraelita.

⁶Na Araha ki vi tanga o Josua, ki vi: “Siana ko magutenira. Inê nga na Araha kê page mutera. I gomaha i manga i ngekê ma ngaira ka bani meme. I murina na hearihatana mu raharaharugugi na êgata na hosi iata ma kamu sungigi na kati ni me iata.”

⁷Hoi, o Josua ma na mane ni me hato iana ka hagagasuga ka taharira i ve i Merome.

⁸Na Araha ki katora na Isiraelita ka teharira. Na Isiraelita ka taharira ka tarigenira rârâ ma ka tariha i Misirepote Maimi me Sitone igê na tarasini, ma ka tariha igê na maruguna i Misipa. Ngaira ka meraheariha rârâ na merongata, mataro me ka mutera hato ngavê.

⁹O Josua ki râ suria na tamasinga iana na Araha. Ngaia ki raharugugi na êgata na hosi ma ki sungigi na kati ni me.

¹⁰Hemuri o Josua ki apariri ki henahuraua i Hasore ma ki nahuia ki me na maneraha igê. I na matena ngekana na maneraha i Hasore ki raramohaga ngavê teharira na maneraha getera ngegana.

¹¹Ngaira ka hagamesira hato na enoni igê. I mareha rârâ tani vige tahi. Ngaira ka su hagamakaka na hinua.

¹²O Josua ki henahuraugi na hinua hato ngegana henira na maneraha igê. Ngaira ka hagamesira hato ngavê, manga o Moise na kariana koro na Araha ki bani bonasira renia.

¹³Na Isiraelita ka pe su hagamakakagi na hinua nganganihaga igê na boteni, nga noga ma i Hasore o Josua ki su hagamakaka.

¹⁴Na Isiraelita ka torera na togoha ma na marâ koro tenigi na hinua ngegana tangara mareta ma ka mutera ngavê na enoni igê. I mareha rârâ tani vige tahi.

¹⁵Na Araha ki bani bonasia vikana o Moise na kariana koro. Ma o Moise ki bonasia vikana nogana o Josua. Mo Josua ki kato vikana. Ngaia ki râ surigi na ramata hato iana na Araha tanga o Moise.

¹⁶O Josua ki henahuraua na apanena hagenani, i ta bogona tanga i ta bogona: i Negeve, na apanena hagenani i Gosene, na bena i Sepela, na maruguna i Jotano, na hungani ma na bena.

¹⁷Na apanena i henahuraua o Josua ki haganega i hungana i Kele i Negeve, ki tariha i Balagata hagarangia na hungana i Heremone igê na maruguna i Libanone. O Josua ki meraheariha na maneraha igê na apaneni ngegana arihu era. Henaka, ma ngaia ki henahuraura ngaira hato ma ki mutera.

¹⁹Na Isiraelita ka henahuraugi na hinua hato ngegana, nga noga ma i Gibeone ta na hinua iata na Hivita. Na ai ni Gibeone ka katoa na suruheri ni marapeha henira na Isiraelita.

²⁰Na Araha ki katora na merongata na Isiraelita ka togeaga ka meraheariha, hanana vi na Isiraelita ka nahunahu erasira ngavê. Ngaira ki asa vige takira ma ka mutera ngavê hete.

²¹Suria na matena ngekana o Josua ki râ ki mutera na Anakimi. Ngaira ka na enoni ga borahu ngavê ma na ramo ngavê. Ngaira ka oga i Heberoni, i Tebire me Anaba igê na hungani, ma surigi na hungani hato i Juta ma i Isiraele. O Josua ki mutera ngavê ma ki ruhuruhugi na hinua iata.

²²I mareha rârâ ta na hitangita na Anakimi vige hita so i Isiraele. Ta kereani ma ka hita so i Gasa, i Gata ma i Asetote.

²³O Josua ki henahuraua na apanena hagenani, manga na Araha i bani bonasia o Moise renia. O Josua ki haganahunira na Isiraelita renia ma ki votoa tonganira na ara ni varo ninuni iata hehegitigi. Hoi, ngekana na enoni ka kahu oga igê na marapeha.