Read Kahua JOSUA 13 Bible Online

JOSUA 13 - Kahua bible

JOSUA 13

¹O Josua ki kahu merahaga ngavê. Na Araha ki vi tanga, ki vi: “Igo ko merahaga ngavê ma ka rako mêngagi na agua ga page parênigi.

²Ngaigi kani igê: i Pilisita hagenani, i Gesure haganani

³ma i Avimi hagenani, i haganega igê na kere ve i Sigore igê na pereperegana i Esipito ma ki râ ki tariha i Ekerone. Ngaia kani ta apanena i Kanani. Na maneraha i Pilisitia ka nahunigi hehegitigi na hinua igê: i Gasa, i Asetote, i Asekelone, i Gata me Ekerone.

⁴Nikâ i Kanani hagenani ki mamênga: haganega i Ara na hinua iata na ai ni Sitone, ki râ ki tariha i Apeke igê na perperegana na apanena iata na Amorita:

⁵nikâ na agua iata na Gibilita; na apanenana bêkê hagenani i Libanone, haganega i Balagata igê na taritarihana na hungana i Heremone ki râ ki tariha igê na teha i Hamata:

⁶nikâ na apanena hagenani iata na ai ni Sitone, ga ogasia na agua huhunganiga i Libanone ki râ ki tariha i Misirepote Maimi. Inê be taringenira hura na enoni hato ngegana, matena na Isiraelita ga gâga parera. Go votogi nga na agua ngegana tonganira na Isiraelita, manga gê bonasigo renia.

⁷Hoita, go votogi nga na agua ngegana tonganira na varo ninuni gi siva hehegitigi ma ta apanena na varo ninuni iana o Manase, hanana ga nahunigi hagahu.”

⁸O Moise na kariana na Araha ki bani haganahunira na varo ninuni iaterua hegetigi o Rubeni mo Gata ma ta apanena na varo ninuni iana o Manase renia na agua i na apanena bêkê na ve i Jotano.

⁹Na agua iata ki manga ikê: i haganega i Aroere i na akerena na maruguna i Aranone henia na hinua raha igê, na bena hagenani igê na hungana i Meteba ki râ ki tariha i Tibone;

¹⁰na hinua hato i marungigi o Sigone na maneraha iata na Amorita i oga i Gesebone, ki râ ki tariha igê na pereperegana i Amone;

¹¹nikâ i Gileata; na agua tonganirerua i Gesure me Maka; na hungana i Heremone hagenani; i Basani hagenani ki râ ki tariha i Salaka;

¹²nikâ na agua hagenani iana o Ogo na maneraha i Basani, i nahunirerua na ruma raha gi rua: tani i Asatarote ma tani i Eterei. Ngaia ka na hagahatungina na varo ninuni iata na Repaimi. O Moise ki bani teharira na enoni hato ngegana ma ki bani ogasugarira.

¹³Na Isiraelita ka pe tarigenira hura na ai ni Gesure me Maka. Ngaira ka gâga mênga mataro me i ngekê akê.

¹⁴Na varo ninuni iana o Levi ka pe nahunia rârâ na mako, suria o Moise ki pe vatera renia, ma ngaira ka page nahunigi ma hete na apaneta na vogasiha tanga na Araha God iata na Isiraelita, manga na Araha i bani bonasia vikana o Moise.

¹⁵O Moise ki bani haganahunira na hagosi ninuni tenia na varo ninuni iana o Rubeni renia na agua tangara.

¹⁶Na agua iata ki haganega i Aroere i na akerena na maruguna na ve i Aranone henia na hinua i gupu igê ma henia na bena hagenani i Meteba igê na hungani;

¹⁷henigi i Gesebone ma na hinua hato igê na bena ngekana: i Tibone, i Bamote Bala, i Bete Balameone, i Jasa, i Ketemote, i Mepata, i Kiriataimi, i Sibima, i Serete Hasagare igê na hungana igê na maruguna, i Betepeore, na taritarihani na hungana i Pisiga ma i Bete Haiesimote.

²¹Ngaia ki vi, vi na hinua hato igê na bena ngekana ma na apanena hagenani, o Sigone na maneraha iata na Amorita i bani marungia i nago. Na ruma raha iana ki oga i Gesebone. O Moise ki meraheariha ma ki teharira ngaia ma na maneraha ga oga i ruguhana na maneraha o Sigone: o Evi, o Rekeme, o Sure, o Gure mo Reba.

²²I bererogata na ani na Isiraelita ga mutera, ka no Bileama karena o Beore. Ngaia ka na mane ni girarasiha.

²³Na pereperegana bêso na agua iana na varo ninuni iana o Rubeni ka na ve i Jotano. Ngaigi ka na hinua, na ani raha ma na ani sisite, o Moise i bani haganahunia na varo ninuni iana o Rubeni renigi.

²⁴O Moise ki bani haganahunira na hagosi ninuni tenia na varo ninuni iana o Gata renia na agua tangara.

²⁵Na apanena iata kani i Jasere, na hinua hato i Gileata, na apanena i Amone ki râ ki tariha i Aroere i na apanena bêkê i Raba.

²⁶Na apanena iata ki haganega i Gesebone tanga i Ramata Hamisipe me Betonimi, ma tenia i Maganaimi tanga na pereperegana i Litibire.

²⁷Henigi na hinua igê na maruguna na ve i Jotano: i Bete Harama, i Betenimira, i Sukote me Sapone, ma ta apanena na agua i marungia i nago o Sigone na maneraha i oga i Gesebone. Na pereperegana bêso na apanena iata ka na ve i Jotano ki tariha igê na rano i Galilea.

²⁸Ngaigi nga ka na hinua, na ani raha ma na ani sisite, o Moise i bani haganahunira na hagosi ninuni tenia na varo ninuni iana o Gata renigi.

²⁹O Moise ki bani haganahunira na hagosi ninuni tenia na apapana na varo ninuni iana Manase renia na agua iata.

³⁰Na apanena iata ki râ ki tariha i Maganaimi henia i Basani hagenani, na maneraha o Ogo i bani marungia i nago, ma henigi na 60 na hinua i Jairi i Basani;

³¹henia ta apanena i Gileata henirerua na hinua raha i Asatarote me Eterei, garu oga igê na ruma raha iana o Ogo na maneraha i Basani. Na agua ngekana o Moise ki bani haganahunia na apapana na hagosi ninuni na raraha iana o Makire karena o Manase renia.

³²Ngaia nga hanana o Moise i voasia na agua i na apenaterua bêkê i Jeriko me Jotano, matena i oga igê na bena i Moaba.

³³O Moise ki pe haganahunia rârâ na varo ninuni iana o Levi renia ta agua. Ngaia ki vi tangara, vi na nahuninga iata ka na apaneni na votovoto, na Isiraelita ga tagarenigi tanga na Araha God iata.