Read Kahua JOSUA 14 Bible Online

JOSUA 14 - Kahua bible

JOSUA 14

¹Ikê ka na sihonga renia na voasiana i Kanani i na apanena bêso i Jotano tangara na Isiraelita. O Eleasare na mane ni vogasiha, o Josua karena o Nune ma na bêni na hagosi ninuni tenigi na varo ninuni hehegitigi iata na Isiraelita ka katoa na voasiana tangara na enoni.

²Manga na Araha i bani bonasia o Moise, ngaira ka atani tavotavo mavê na atani na mako i na apanena bêso i Jotano tangara na varo ninuni gi siva hehegitigi ma na apapana na varo ninuni iana o Manase.

³O Moise ki bani haganahunira na varo ninuni iaterua hegitigi o Rubeni mo Gata ma na apapana na varo ninuni iana o Manase renia na agua i na apanena bêkê i Jotano. Na raraha iana o Josepo ka na varo ninuni gi rua: tani iana o Manase ma tani iana o Eparaimi. Ma o Moise ki pe haganahunira rârâ na varo ninuni iana o Levi renia ta agua ma ki haganahunira ma hete renigi na hinua ka oga igê henigi na bena ni go tangara na togoha na puruka, na sipi ma na goti iata.

⁵Na Isiraelita ka tongania na agua suria na bonasiha iana na Araha tanga o Moise.

⁶I ta na tangiana tani na enoni tenia na varo ninuni iana o Juta ka râ tanga o Josua i Gilegale. Ta na hitangita o Kalebe karena o Jepune na Kenisita ki vi tanga o Josua, ki vi: “Igo ko bani girara na tamasinga iana na Araha tanga o Moise na kariana koro na Araha renigerua igo menê i Katesi Baranea.

⁷Inê ki tonga na 40 na harisi iaku, matena o Moise na kariana koro na Araha i hagatorangeniê tenia i Katesi Baranea, hanana gê râ bâbâ me ikê i Kanani. Inê kê meaporo râ me tanga na morana na tamasinga.

⁸Ma na tamaku mi tage râ, ka hagamagusira na Isiraelita ma inê kê toto suria hete na Araha God iaku.

⁹Ngekana o Moise ki tohe tangê, vi inê ma na raraha iaku kami nahunia hagahu na agua gê râ bâbâ igê.

¹⁰Ma ku bâ! I vora noga na 45 na harisi na Araha i tamasi vikana tanga o Moise. Igê na matena ngekana na Isiraelita ka aharêvoro igê na bagamasusu raha ma na Araha ki nakê kê tahitahi mênga mataro me i ngekê manga i bani surua tangê. Ma ku bâsiê! Inê ki tonga na 85 na harisi iaku.

¹¹Inê kê ramoramo mênga manga na matena o Moise i hagatorangeniê igê. Inê kê araria mênga na hearihatana se na anima na marâ.

¹²Hoita gu haganahuniê nga renia na agua huhunganiga, na Araha i bani surua tangê, matena igami, inê ma na tamaku, mi migiaporo râ me na rongoha. Igami kami hagarongogo vi na Anakimi, na enoni ga borahu ma ka bagararaha, ka ogasigi na hinua raha ga pararihigi. Vari inê kê girara gê tarigenira hura manga vi na Araha ma ki tamaniê, manga i bani surua tangê.”

¹³O Josua ki nungia God ki ngahisia o Kalebe karena o Jepune ma ki haganahunia renia na hinua raha i Heberone.

¹⁴Tariha me i ngekê na raraha iana o Kalebe karena o Jepune na Kenisita ka nahunia mênga i Heberone, suria o Kalebe ki toto suria na Araha God iata na Isiraelita.

¹⁵I nago i Heberone ka hêtana vi Kiriata Araba, i vi hinua iana o Araba, na ani i raha i berarogata na Anakimi. I ngekana ki kahu oga na marapeha i Kanani.