Read Kahua JOSUA 17 Bible Online

JOSUA 17 - Kahua bible

JOSUA 17

¹Ga haganahunia na apapana na varo ninuni iana o Manase, i oga bêso i Jotano renia na agua tangara. O Manase ka na bêbê ni kare mane iana o Josepo. O Makire i apara o Gileata ka na bêbê ni kare mane iana o Manase. Ngaia ki manisingenia ngavê na hearihatana. Ngaia ki henahuraurerua i Gileata me Basani i na apanena bêkê i Jotano ma ki nahunirerua.

²Na agua i na apanena bêso i Jotano ga haganahunira na raraha iana o Tane o karena o Manase renia: ngaira ka na hagosi ninuni iata hehegitigi o Abiesere, o Geleki, o Asariele, o Sekeme, o Gepere mo Semita. Ngaira ka no karena o Manase karena o Josepo ma ka bêni na hagosi ninuni.

³O Manase ki apara o Makire. O Makira ki apara o Gileata. O Gileata ki apara o Gepere, mo Gepere ki apara o Selopegata. O Selopegata ki pe aparara na kare mane rârâ, nga noga ma na kare hehene: ka Magala, ka Noa, ka Gogola, ka Milika ma ka Tirisa.

⁴Ngaira ka râ tangara o Eleasare na mane ni vogasiha, mo Josua karena o Nune ma na meraha ma ka vi: “Na Araha ki bani bonasia o Moise hanana viga haganahunigami nogamami igami na gete renia na mako, mareha ngaira ma na mane.” Hoi, suria na Araha ki bani haribona vikana ngaira ka haganahunira ngaira nogata renia na mako.

⁵Tahema ga haganahunia na varo ninuni iana o Manase i bani nahunirerua i Gileata me Basani i na apanena bêkê i Jotano renigi kê nikâ na tangahuru na agua na mako,

⁶suria ga haganahunira tagenata na gete ma na mane na raraha iana o Manase renia na mako. Tani na raraha iana o Manase ka bani nahunia i Gileata.

⁷Na pereperegana na apanena iana na apapana na varo ninuni iana o Manase i oga bêso i Jotano, ki haganega i Asere, ki râ tanga i Mikimetate i na apanena bêkê i Sigeme ma tanga i Jasibine me Tapuaga.

⁸Na mako rihia i Tapuaga kani iana na varo ninuni iana o Manase ma na hinua i Tapuaga igê na pereperegana kani iata na raraha iana o Eparaimi.

⁹Tenia i Tapuaga na pereperegana ki râ tanga na ve i Kana. Ngaigi na hinua raha i na apanena tarê na ve i Kana kani iana na varo ninuni iana o Eparaimi, henaka viga oga igê na agua iana na varo ninuni iana o Manase. Na pereperegana ki râ suria na akerena bême na ve ma ki râ ki hato i Asi.

¹⁰Na agua na varo ninuni iana o Eparaimi ka na apanena bêtarê na ve ma na anina na varo ninuni iana o Manase kani bêtarê me. Na pereperegana bêso kani i asi. Ta na pereperegana ki bêhetanga henirerua na agua iaterua na varo ninuni iaterua hegitigi o Asere mo Isakare.

¹¹Na raraha iana o Manase ka nahunigi tani na hinua nikâ: tani i rarona na apanena iana na varo ninuni iana o Isakare ma tani i rarona na agua iana o Asere. Ngaigi kani i Bete Seane ma i Ibileama henigi na hinua sisite hagarangirerua, i Tore igê na tarasini, i Enetore, i Tanaka me Megito henigi na hinua sisite hagarangigi.

¹²Na raraha iana o Manase ki bara tangara vige tarigenira hura na Kananita ga ogasigi na hinua ngegana. Tahema ngaira ka ama ni oga gatagata nga i ngekana.

¹³Henaka vi na Isiraelita ka ramoramo i hemuri, ma ki bara vige tarigenira hura na Kananita hato ma ka hagatagarahira raha nga hete tangara so mareta.

¹⁴Na raraha iana o Josepo ka vi tanga o Josua, ka vi: “Tanu hega kanigo haganahunigami renia ma na agua gi tage na mako? Igami kami gahu ngavê, suria na Araha ki koro tangagami.”

¹⁵O Josua ki arami, ki vi: “Manga vi igamu ma kamu gahu ngavê ma na agua huhunganiga iami na raraha iana o Eparaimi ki pe ararigamu, hoi, mu arâ igê na vapuni iata na Perisita ma Repaimi ma kamu sugasugagi tangagamu maremi.”

¹⁶Ngaira ka arami, ka vi: “Na agua i huhunganiga ki pe raha ke ararigami ma na Kananita ka ogasigi na bena. Ngaira ka nahunigi na kati ni me na aiani i hinua hato iata: i Bete Seane henigi na hinua sisite hagarangia ma igê na maruguna i Jiserele nikâ.”

¹⁷O Josua ki vi tangara na raraha iana o Josepo, na varo ninuni iana o Eparaimi ma na apapana na varo ninuni iana o Manase, ki vi: “I monari, igamu kamu gahu ma kamu raramohaga ngavê. I monari, na agua gi tage na mako ki pe ararigamu.

¹⁸Na agua i huhunganiga ka na animi gê vategamu kê nikâ. Henaka i vapuga, igamu kamu girara ma mu sugasuga. Mu girara mu parênia hagenani tenira na Kananita. Mu girara mu tarigenira hura. Henaka vi ngaira ka nahunigi na kati ni me na aiani, igamu kamu page ramo ngavê teharira.”