Read Kahua JOSUA 18 Bible Online

JOSUA 18 - Kahua bible

JOSUA 18

¹I murina na Isiraelita ga bani parênia i Kanani, ngaira hato ka haku i Silo ma ka hagêrasia igê na ruma na gahu apuna iana na Araha.

²Na varo ninuni gi pi iana o Isiraele ka mamênga vige nahunigi na agua tonganira hegitigi.

³Tahema o Josua ki vi tangara na Isiraelita, ki vi: “Na Araha God iata na êvarimi ki bani vategamu renigi na mako. Mu hagarihu tanga na ta? Mu râ nga kamu parênigi!

⁴Mu kasira me na vera oru na mane tenigi na ara ni varo ninuni hehegitigi iami. Inê be hagatorangenira ke rârâhia na agua hagenani, hanana ga tarahua, vi manga i he kaniga voasia na agua ka voravora na apaneni gi pi. Hato vikana ngaira ka aporo nga me i pasiku. Na varo ninuni iana o Juta ki bani nahunia na agua, ki hato vê tangara. Na varo ninuni iana o Josepo ka bani nahunia na agua ki hato vê tangara. Mu segesegegi na peperegani na ara ni apaneni gi pi hehegitigi na agua ma ka bâ mara ta ma kamu vateê renigi. Hemuri inê kê hagate tarana i pasina na Araha God iaka tangagamu ma kê kahu kangikangi vi ti kani page nahunia na apanena ta na agua.

⁷Na raraha iana o Levi ki pe oto tangara rârâ vige nahunia ta na apanena na agua i berarogami, suria na apaneta kaniga tagara tanga na Araha mangara na mane ni vogasiha ma ni hagarahenga. Na varo ninuni iata hehegitigi o Gata, o Rubeni ma na apapana na varo ninuni iana o Manase bêkê ka bani tonganigi na agua i na apanena bêkê i Jotano, suria o Moise na kariana koro na Araha ki bani haganahunira renigi.”

⁸Na mane ka râ suria na tamasinga iana o Josua tangara. Ngaira ka râ ka rârâhia na agua ma ka segea vi manga i he kaniga takusia viga voasi na agua ngekana ki voravora gi pi. Ngaira ka segegi so nikâ na atani na hinua igê. Hato vikana ma ngaira ka aporo me i pasina o Josua igê na tênga i Silo.

¹⁰O Josua ki hagate tarana i pasina na Araha tangara ma ki kahu kangikangi vi ti kani page nahunia tagua na apanena na mako. Vikana ngaia ki haganahunia na ara ni varo ninuni iana o Isiraele ga hita râ renigi na apaneni na agua hehegitigi.

¹¹Hagenago ki akê me na varo ninuni iana o Benamino. Na agua iata na hagosi ninuni tenia na varo ninuni iana o Benamino ki oga i berarogaterua na agua iaterua hegitigi na varo ninuni iatarerua hegitigi o Juta ma o Josepo.

¹²Na perepergana na agua iata i bêhetanga henia na agua iata na raraha iana o Josepo, i haganega i Jotano, ki tagere igê na hungana hagarangia i Jeriko, ki hane suria na tarahane, ki arigu bêso tanga na agua huhunganiga ma ki râ ki tariha igê na bagamasusu raha i Betavene.

¹³Tenia i ngekana na pereperegana ki râ tanga i Lusi, ga hêtana nikâ vi i Betele, ki hane suria na tarahane na hungana i ngekana ma ki râ tanga i Atarote Atara igê na hungana hagarangia i Bete Gorone i kere vato.

¹⁴Igê na apanena bêso na hungana ngekana na pereperegana ki arigu bêrâ tanga na agua iata na raraha iana o Juta ma ki râ tanga i Kiriata Bala, ga hêtana nikâ vi Kiriata Jearimi. Na hinua ngekana kani iata na raraha iana o Juta. Ngaia nga ka na pereperegana bêso.

¹⁵Na pereperegana i bêhetanga henia na agua iata na raraha iana o Juta, ki haganega tarege râ tenia i Kiriata Jearimi, ki râ tangagi na ve banga i Menepetoaga.

¹⁶Tenia i ngekana ngaia ki vato tanga na gusigana na hungana i na apanena bêkê na maruguna i Bene Hinome tanga râ na maruguna i Repaimi. Ngaia ki râ suria na maruguna i Bêni Hinome i na apanena râ na tarahane na hungana i Jebusa tanga i Enerogele.

¹⁷Tenia i ngekana ngaia ki arigu ki râ tanga i Enesemesi, tanga i Gelilote i maatia akê na teha i Atumimi ma tanga na hê hungana i Bohane. O Bohane ka no karena o Rubeni.

¹⁸Tenia i ngekana ngaia ki hane suria na tarahane i maatia i Bete Araba ma ki râ tanga na maruguna i Jotano. Ngaia ki bêrere igê na maruguna i Jotano,

¹⁹ki niha ki rihu igê na hungana i Golola ma ki hato i maana na ve i Jotano igê na Asime. Ngaia nga ka na pereperegana i bêhetanga henia na agua iata na raraha iana o Juta.

²⁰Na pereperegana bêkê kani i Jotano. Ngaigi nga ka na pereperegana na agua tangara na hagosi ninuni tenia na varo ninuni iana o Benamino.

²¹Na hinua raha tangara na hagosi ninuni tenia na varo ninuni iana o Benamino kani igê: i Jeriko, i Bete Gogola, i Emeke Kesisi, i Bete Araba, i Semaraimi, i Betele, i Avimi, i Para, i Opera, i Kepara Hamoni, i Openi me Geba. Ngaigi hato haku na hinua raha ngegana ka 12, henigi na hinua sisite hagarangigi. Nikâ i Gibeone, i Rama, i Berote, i Misipa, i Kepira, i Mosa, i Rekeme, i Irepele, i Tarala, i Sela, i Elepe, i Jebusi, ga hêtani nikâ vi i Jerusaleme, i Gibato, me Kiriata Jearimi. Ngaigi hato haku na hinua raha ngegana ka 14 henigi na hinua sisite hagarangigi. Ngaia nga ka na apanena tangara na hagosi ninuni tenia na varo ninuni iana o Benamino.