Read Kahua JOSUA 2 Bible Online

JOSUA 2 - Kahua bible

JOSUA 2

¹O Josua ki hagatorangenirerua na vererua tenia na tênga i Sitimi, hanana garu arârâhia pinihi i Kanani ma karu arâ bâbâ nga i hinua i Jeriko. Matena garu banu vê i hinua, ngairerua karu banu i pasina ka Ragaba na êra, hanana vigaru mauru i ngekana.

²Igê na bungiana ngekana na maneraha i Jeriko ki rongoa, vi tani na Isiraelita karu râ me, hanana vigaru arâ bâbâ.

³Tahema ngaia ki kasi tamasinga tanga ka Ragaba, ki vi: “Na vererua i ruma iamu karu râ bâbâ me ikê hagenani. Kasirerua hura tangagami.”

⁴Ka Ragaba ki pinihirerua, ma ki kahu arami, ki vi: “I monari, tani na mane karu râ me i pasiku. Ma inê kê pe girara, vi i he kani pasiterua.

⁵Matena i bungi me, ngairerua karu bani râ, matena na maani para ni hinua ki tahataha mênga. Inê kê pe girara, vi i he karu râ igê. Ma ki manga mu hatani rêrête surirerua, igamu kamu girara ma mu page tarahurerua.”

⁶Ka Ragaba ki bani mererâ tagere igê na gerina aberabera na ruma ma ki bani pinihirerua i ruguhani na asire, i hagasina i ngekana.

⁷Na kariana na maneraha ka hura tenia na hinua, ma na maani para ni hinua ki kahu purupuru. Ngaira ka garirerua rârâ na Isiraelita, garu râ bâbâ ngegana mataro me ka tariha i tara reke tarê i Jotano.

⁸Matena na mane garu râ bâbâ ngegana karu tâ ni mêruha, ka Ragaba ki tagere igê na gerina aberabera na ruma,

⁹ma ki vi tangarerua, ki vi: “Inê kê girara vi na Araha ki bani haganahunigamu renia na agua ikê. Na enoni hato i na agua ka magutenigamu ngavê.

¹⁰Igami kami bani rongoa, vi na Araha ki hagamamataria na Asi Memera kamu râ igê, hanana mu pania i Esipito. Igami kami bani rongoa nikâ, vi igamu kamu nahuirerua karu me o Sigone mo Ogo, na maneraha gi rua iata na Amorita kerekê i Jotano.

¹¹Igami kami bubununuga ngavê, matena mi rongo vikana. Igami kami tata renigamu. Na Araha God iami ngaia ki na God i marungirerua na vavearo ma na ano.

¹²Hoi, muru tohe renia God iami, vi igamurua kamuru katoa maninga na ahemata iaku, manga inê gê katogamurua maninga. Muru hagatanga monari tangê hanana gê tongesurigamurua.

¹³Muru tohe nga, vi igamurua kamuru page hagatahira o vaemaku, kenaku ma na goaku henira na ahemata hegitigi iata. Muru hagatahigami, siana kami meme!”

¹⁴Ngairerua karu aramia, karu vi: “God ke hagamesigamirua manga muru pe vivi monari. Manga go pe hagarongoa ta na enoni renia na tarana muru katoa ngêke, hoi, igamirua kamuru kahu tohetohe, vi igamirua kamuru page katogamu maninga, matena na Araha ki haganahunigami renia na agua ikê.”

¹⁵Ta apanena na apê na ruma iana ka Ragaba ki na para ni hinua. Na apê na para ni hinua ngekana ki tonga igê na mabaha. Vikê ngaia ki kunirerua vato igê na mabaha renia na varo.

¹⁶Ngaia ki vi tangarerua, ki vi: “Muru tagere igê na hungani, i era ma na kariana na maneraha ka tarahugamurua. Muru ahiahi i ngekana surigi na tangiani gi oru, mataro me na matena ga aporo me ngaira. Ma hemuri kamuru kahu aporo asitatara i pasimurua.”

¹⁷Ngairerua karu vi tanga, karu vi: “Hoi, igamirua kamuru page hagamonaria na suruha go nungia tenigamirua.

¹⁸Hoita, go katokato vikê. Matena mi bêbanu me igê na apanena iami, go baroa nga na varo memera ikê igê na mabaha, go kunigamirua vato igê ikê. Go hagahakura me i ruma iamu o vaemamu, kenamu, na goamu ma na ruma hato iana o vaemamu.

¹⁹Manga na hitangimi i huhura tenia na ruma ma ki meme, ngaia ki na tarihana marena, mareha vi igami. Ma ki manga viga nahuia ki meme ta na hitangimi i rarona na ruma iamu, hoi, ngaia ki na perenga iamirua igamirua.

²⁰Ma ki manga vi igo ma ko hagarongoa ta na enoni renia na tarana muru katoa ngekê, hoi, na tohenga go nungia tenigamirua ki mareha vê.”

²¹Ka Ragaba ki aganaria na tamasinga iaterua ma ki kasirerua vê karu râ. Matena ngairerua karu bani râ, ngaia ki baroa na varo memera igê na mabaha.

²²Na vererua ngegana karu tagere karu ahi igê na hungani. Na kariana na maneraha ka garirerua makira igê na ara ni agua i bemu surigi na tangiani gi oru. Ngaira ka pe tarahurerua. Vikê ngaira ka aporo ma i hinua i Jeriko.

²³Hemuri ngairerua karu aporo vato tenigi na hungani, karu tarêhia na ve i Jotano ma karu aporo i pasina o Josua. Ngairerua karu hagarongoa renigi na ara ni marâ hato garu tarahugi i ngekana.

²⁴Hemuri karu vi: “Igamirua kamuru girara nga, vi na Araha ki tagarenia na agua hagenani tangagia suria na enoni hato ngekana ka magutenigia ngavê.”