Read Kahua JOSUA 20 Bible Online

JOSUA 20 - Kahua bible

JOSUA 20

¹Na Araha ki vi tanga o Josua, ki vi:

²“Gu vi tangara na Isiraelita ke ategi na hinua ni rukuha, gê hagatora o Moise ki bani hagarongora renigi.

³Na enoni i bagara râme ki nahuia ki meme ta na enoni, ngaia ki girara ki gavagava tanga na hitangini ma ki rukuruku igê tenia na mane i obania vi marabaru.

⁴Manga i gava ki rukuruku igê na hitangini na hinua ni rukuha ngegana, ngaia ki arâ nga tanga na agua ni suriha i maani para na hinua ma ki ramatenia nga tangara na meraha ni hinua, vi manga i he kani tarahua na tarana vikana. Manga vi ngaira ma ka naka ki bêbanu i hinua, ki tuguhira viga vatea nga na ruma ki gâga igê.

⁵Manga vi na mane i obania vi marabaru ma ki arâ suria i ngekana, siana na me i hinua ka tagarenia tanga. Ngaira ka anumasia nga hete, suria ngaia ki bagara râ me ki nahuia ki me na enoni, mareha vi suria i mangariaga tanga.

⁶Ngaia ki gâga nga i hinua ngekana, manga na hagatamasinga ma ki tarahua vi ngaia ki vi monari, mataro me ki meme na mane ni vogasiha i teha i na matena ngekana. I murina ngekana ngaia ki kahu girara i aporo i pasina i gava me tenia.”

⁷Hoita, i na apanena bêso i Jotano ngaira ka ategi i Ketesi i Galilea i rarona na apanena huhunganiga iata na raraha iana o Napatali; i Sigeme i rarona na apanena huhunganiga iata na raraha iana o Eparaimi; i Kiriata Araba ga hêtana nikâ vi i Heberone i rarona na apanena huhunganiga iata na raraha iana o Juta.

⁸I na apanena bêkê i Jotano igê na bena na bagamasusu raha i na apanena bêkê i Jeriko ngaira ka ategi i Besere i rarona na apanena iata na raraha iana o Rubeni; i Ramote i Gileata i rarona na apanena iata na raraha iana o Gata; ma i Golani i Basani i rarona na apanena iata na raraha iana o Manase.

⁹Ngaigi nga ka na hinua ni rukuha ga ategi tangara na Isiraelita hato ma tangara nikâ na ani ga oga mamahuara i berarogata. Na enoni i bagara râme ki nahuia ki meme ta na enoni, ngaia ki girara i rukuruku i ngekana tenia na mane i obania vi marabaru. Manga vi na hagatamasinga ma ki tarahua, vi ngaia ki vi monari, ki apu tanga na mane ngekana vige marabaru.