Read Kahua JOSUA 22 Bible Online

JOSUA 22 - Kahua bible

JOSUA 22

¹Hoita, o Josua ki unira haku me na raraha iaterua o Rubeni mo Gata ma tapanena na raraha iana o Manase.

²Ngaia ki vi tangara, ki vi: “Igamu kamu bani katogi na marâ i bani hagatoragamu renigi o Moise na kariana koro na Araha, ma igamu bani râ surigi na ramata hato iaku.

³I na ara ni mateni na goami na Isiraelita ka avarasigamu, ma igamu kamu tamanira. Igamu kamu bani marupegi maninga na ramata iana na Araha God iami.

⁴I ngekê na Araha God iami ki bani haganahunira na goami na Isiraelita renia na marapeha, manga i bani surua. Hoita, mu aporo i pasimi igê na apanena mu visia, vigamu nahunia, igê na mako i kerekê i Jotano, o Moise na kariana koro na Araha, ki bani haganahunigamu renia.

⁵Mu marupegi nga na ramata, i bonasigamu renigi o Moise. Mu takuia na Araha God iami. Mu arâ surigi na obaniha iana. Mu marupegi na ramata iana. Mu tototo suria ma kamu tagara tanga i mêrihami hagenani.”

⁶O Josua ki nakara vê ka aporo i pasita ma ki vi: “Na Araha ke ama ni ngahisigamu nga. I ngekê igamu kamu aporo i pasimi ma ki aharêsigamu ngavê na ruruguha: ga rakorako na togoha, na siliva, na golo, na kapa i higa, na aiani ma na gahu. Mu meratongani na goami i pasimi na marâ mu henahuraugi tenira na merongami.” Ma ngaira ka aporo i pasita. O Moise ki bani haganahunia tapanena na raraha iana o Manase renia na mako, i Basani, ma tapanena na raraha o Josua ki bani haganahunia renia na mako kereso i Jotano, mangara na Isiraelita getera ga bani tongani.

⁹Hoi, na raraha iaterua o Rubeni mo Gata ma tapanena na raraha iana o Manase ngaira ka aporo i pasita. Ngaia ka panira so na Isiraelita getera i Silo i Kanani, ma ka tavoraha tanga i pasita, tangagi na mako iata i Gileata, ga bani henahuraua, manga na Araha i bani bonasira renia, matena i tamasi i harana o Moise.

¹⁰Matena na varo ninuni iaterua hehegitigi o Rubeni mo Gata ma tapanena na varo ninuni iana o Manase ka ata vê i Gelilote i na apanena so mênga i Jotano, ngaira ka tagarahia na bea ni vogasiha hagarangia na ve. Na bea ni vogasiha ngekana ki raha ma ki bâ hahaneaga.

¹¹Na Isiraelita getera ka hetamatamasi ka vi: “E, pe rongoa? Na raraha iaterua o Rubeni mo Gata ma tapanena na raraha iana o Manase ka tagarahia na bea ni vogasiha i Gelilote i Jotano i na apanena iaka

¹²Matena na Isiraelita kereso i Jotano ka rongo vikana, ngaira hato ka haku i Silo, hanana viga meraheariha na varo ninuni ngegana i kerekê i Jotano.

¹³Na Isiraelita ka hagatorangenia o Pinegasi karena o Eleasare na mane ni vogasiha tangara na raraha iaterua o Rubeni mo Gata ma tapanena na raraha iana o Manase, ga oga i Gileata.

¹⁴Na enoni raha tangahuru gi tage ka râ henia o Pinegasi, na ani gi tage tenia na ara ni varo ninuni kereso i Jotano. Ngaira ka na bêni na ahemata.

¹⁵Ngaira ka tavoraha ka ata i Gileata tangara na raraha iaterua o Rubeni mo Gata ma tapanena na raraha iana o Manase.

¹⁶Ngaira ka vi tangara, ka vi: “Igami kami tamasi urusira na Isiraelita hato, ga toto suria na Araha. Tanu hega kamu pe tê viteana na Araha? Tanu hega mu murisigea God? Igamu kamu haritohea God, suria mu tagarahia na bea ni vogasiha tangagamu maremi. Na tarana ngekana ki erataga ngavê.

¹⁷Mu pe takusia vari na bagatauhaka i Peore, matena na Araha ki hagaitangira na kariana renia na ringa? Mataro me i ngekê igia ka mamasiaga mênga renia na tarana ngekana. Na bagatauhaka ngekana ki arari noga.

¹⁸Tanu hega kamu murisigea kê nikâ? Manga igamu ma kamu haritohea na Araha i ngekê, i gomaha ngaia ki page mangariaga tangagia igia hato na Isiraelita.

¹⁹Manga mu takusia, vi na apaneni iami ki pe araria vige rahesia igê na Araha, hoi, mu tarê me igê na agua iana na Araha, suria i ngekana ki oga igê na ruma na gahu iana. Mu arâ me nga, kamu nahunia tagua na mako i berarogamami. Siana kamu guguruga tanga na Araha, se vigamu hagaguguruganigami nogamami. Siana ka tagarahia na bea ni vogasiha i tagua râ nikâ tanga na Araha God iaka.

²⁰Mu takusia o Agane karena o Seraga, i pe tê viteana na Araha, suria i pe su hagamakakagi na marâ i henahuraugi, manga i bani bonasia na Araha renia. Na Araha ki mangariaga tangara na ara ni Isiraelita hato. Mareha vi ngaia getea ma o Agane kanige me renia na bagatauhana.”

²¹Na raraha iaterua o Rubeni mo Gata ma na tapanena na raraha iana Manase ka aramira na bêni na hagosi ninuni tenia kereso i Jotano, ka vi:

²²“Na Araha raramohaga hunia ngaia nga ki God. Na Araha raramohaga hunia ngaia nga ki na God i teha! Ngaia ki bani girara, vi tanu hega kanimi katoa vikana. Ma igami kami obanigamu, vigamu girara nogami. Manga vi igami ma kami haritohea na Araha ma kami pe tototo suria, hoi, mu girara ma vigamu nahuigami kami meme.

²³Manga vi igami ma kami haritohea na Araha ma kami tagarahia na bea ni vogasiha tangagami maremami, hanana vigami susu igê se mi vogasi igê renigi na koni, se renigi na ngauha mi merangê renigi, hoi, na Araha marena ki koro ma ge hagaitangigami.

²⁴Ma ki mareha! Igami kami kato vikana, suria mi magu, i era ma na raraha iami i hemuri me ka page vi tangara na raraha iamami, ka vivi: “Igamu ki mareha vi na kariana na Araha God iata na Isiraelita,

²⁵suria ngaia ki naka na ve i Jotano ki panegia heri. Tahema igamu ki mareha vi na kariana na Araha.” Vikana na raraha iami ka page manimanira vari na raraha iamami, hanana siana ka rahesia na Araha.

²⁶Tahema mi tagarahia na bea ni vogasiha, mareha tanga vigami susu igê, se vigami vogasia igê.

²⁷Igami kami kato vikana hete, hanana mi hagabângenia tangara na raraha hehegitigi iaka, ma tangara na apaparaha iaka i muri me, vi igami kami rahesia na Araha i maana ma na ruma na gahu apuna iana. I ngekana ma kanimi susu tanga igê ma kami vogasi igê ma kami ngaua haku igê na ngauha mi vogasia renigi. Igami kami kato vikana, hanana vi siana na raraha iami ka visira na animami, vi ngaira ki mareha vi na kariana na Araha.

²⁸Na takotako iamami ki manga ikê: Manga vi na raraha iami ma ka tamasi vikana, hoi, na raraha iamami ka page girara ga arami, ka vivi, ‘Bâ, na êvarimami ka tagarahia na bea ni vogasiha iana na Araha i maratorana na bea ni vogasiha iana na Araha. Ngaia ki mareha vi tanga vigami susu igê se vigami vogasia igê, ma ngaia hete ki na girarana, vi igami nikâ ka na kariana na Araha.’

²⁹Igami kami pe kato, vigami haritohea na Araha, se vigami pe toto suria. Igami kami pe tagarahia na bea ni vogasiha, hanana vigami susu igê, se vigami vogasia igê renigi na koni se vi renigi na marâ getigi. Igami kami pe takusia, vigami tagarahia na ani getea râ na bea ni vogasiha, i urusia na bea ni vogasiha iana na Araha, i oga i maana na ruma na gahu iana.”

³⁰O Pinegasi na mane ni vogasiha ma na enoni raha tangahuru gi tage tenira na varo ninuni kereso i Jotano ngaira ka rongoa na aramiha iata na raraha iaterua o Rubeni mo Gata ma tapanena na raraha iana o Manase. Ngaira ka vi: “I koro ma.”

³¹O Pinegasi karena o Eleasare na mane ni vogasiha ki vi tangara, ki vi: “Hoi, i ngekê igia ka girara, vi na Araha ki ngahisigia ma ki pe hagaitangigia, suria igamu kamu pe haritohea.”

³²Hemuri o Pinegasi ma na enoni raha ka panira na raraha iaterua o Rubeni mo Gata i na apanena i Gileata ma ka aporo i Kanani tangara na Isiraelita ma ka hagarongora.

³³Na Isiraelita ka agana ma ka hagarahasia God. Ngaira ki hato vige tamasi renia nikâ na hearihatana, hanana viga ruhuruhua na apanena, ga ogasia na raraha iaterua o Rubeni mo Gata.

³⁴Na raraha iaterua o Rubeni mo Gata ka vi: “Na bea ni vogasiha ngekê ki hagatakusigia igia hato, vi na Araha ngaia kani God.” Tahema ga hêtana na bea ni vogasiha ngekana renia vi Hagatakusiha.