Read Kahua JOSUA 23 Bible Online

JOSUA 23 - Kahua bible

JOSUA 23

¹I arihu me noga na Araha ki katora na Isiraelita ka oga igê na marapeha ma ka asitatara tenira na merongata. O Josua kahu gemêa ngavê.

²Tahema ngaia ki uni hakura me na Isiraelita hato: na bêni na ahemata iata, na enoni raha iata, na mane ni hagaotonga iata ma na ani ga bâsurira hegetigi na haku na enoni. Ngaia ki vi tangara, ki vi: “Inê kê gemêa ngavê.

³Igamu kamu bani bâsigi na ara ni tarani hato, na Araha God iami ki bani tamanigamu me igê, pusira na merongami. Ngaia ki meraheariha na merongami pusigamu.

⁴Inê kê bani haganahunira na raraha iami renigi na mako iata na apaneni me, ga hita râ mêngara ma na anita na apaneni me hato, gê bani henahuraura, haganega kerekê i ve i Jotano tanga na asi kereso.

⁵Na Araha God iami ki bani surua tangagamu, ki vi, ‘Inê be katora na merongami ke gava panigamu. Inê be tarigenira râ tarami, ma igamu kamu page parênia na agua iata.’ Na Araha God iata ki page hagamonaria na suruha iana. Ngaia ki page tarigenira hura na apaneni me, ga hita so igê na agua.

⁶Hoita, mu marupegi maninga ma kamu arâ surigi na ara ni marâ i rarona na buka na ramata iana o Moise. Siana kamu hagêrahusia na hitangini.

⁷Vikana igamu ki asa, vigamu page hakunira na apaneni me ngegana, ga hita so i berarogami, se vigamu tohetohe renira na ataro iata, se vigamu surusuru igê na atata, se vigamu vogasira, se vigamu bêtuhira.

⁸Mu tototo suria nga hete na Araha, manga bani hanana mataro me i ngekê.

⁹Na Araha ki bani tarigenira hura tarami na apaneni me gahu ma ka raramohaga. I asa ngavê ta na hitangita vige teharigamu.

¹⁰Na ani mavê na hitangimi ki girara, i katora na rehagaro na mane ni me ka gavagava, suria na Araha God iami ki meraheariha pusigamu, manga i bani surua.

¹¹Tahema mu takuia maninga na Araha God iami.

¹²Manga mu murisigea na Araha ma kamu hakunira na apaneni me, ga hita so i berarogami ma kamu auragi hetarê nge, hoi,

¹³na Araha ki asa, vige tarigenira hura tarami na apaneni me ngegana. Ngaira ka page hagamamaguraga hete tangagamu, manga na etu se na sutasuta, ma ka page hagamamasiagagamu manga na mata igê na gerimi, se mangagi na sutagani i maami. Na tarana ngekana ki page gâga rârâ, mataro me igamu kamu mutemute hato tenia na agua ni mako koro, na Araha God iami ki bani haganahunigamu renia.

¹⁴Hoita, inê ki sugia ve meme. Na ara ni hitangimi ki aitangisia maninga, vi na Araha God iami ki bani haganahunigamu renigi na ara ni marâ koro, i bani surugi. Ngaia ki bani hagamonarigi na suruha hato iana. I mareha vige hita râ tani.

¹⁵Tagenana ma ngaia ki bani hagamonarigi na ara ni suruha iana tangagamu, ngaia ki page hagamonarigi na ara ni haganunuha iana tangagamu.

¹⁶Manga igamu ma kamu pe marupea na suruheri, na Araha God iami ki bani bonasigamu renia hanana vigamu marupea, ma ki manga mu hagarapera ma kamu rahesira na ataro, hoi, ngaia ki page mangariaga tangagamu ma ki page hagaitangigamu. Manga ngekana ki page arihu ma igamu hato kamu page mutemute tenia na agua ni mako koro ngekê, God ki bani haganahunigamu renia.”