Read Kahua JOSUA 24 Bible Online

JOSUA 24 - Kahua bible

JOSUA 24

¹O Josua ki hagahakura na varo ninuni hato iata na Isiraelita i Sigeme. Ngaia ki unira me na enoni raha, na bêni na ahemata, na mane ni hagaotonga ma na ani ga bâsurira hegitigi na haku na enoni. Ngaira ka haku me i maana na ruma na gahu iana na Araha.

²O Josua ki tamasi tangara na Isiraelita hato, ki vi: “Na Araha God iata na Isiraelita ki vi vikê, ‘I nago kerevê noga na êvarimi ka oga i na apanena tarê na ve i Uparatesi ma ka rahesira na ataro. Na hitangita na êvarimi ngegana ka no Teraga o vaematerua o Abarahamo mo Nagore.

³Hoi, inê kê torea o Abarahamo na êvarimi tenia na apanena tarê i Uparatesi, ma kê merârâ suria i Kanani. Inê kê hagarakonira na raraha iana.

⁴Inê kê katoa ki apara o Isako. Inê kê katoa o Isako ki aparerua o Jakobo mo Esau. Inê kê haganahunia o Esau renia i Etome na agua i huhunganiga. Ma na êvarimi o Jakobo ma na karena ka râ i Esipito.

⁵Hemuri inê kê hagatorangenirerua o Moise mo Aroni. Inê kê hagaitangia ngavê i Esipito, ma kê bêngenigamu hura igamu.

⁶Inê kê bêngenira hura na êvarimi tenia i Esipito. Ma na ai ni Esipito ka tarigenira igê na kati ni me ma igê na hosi iata. Ma na matena na êvarimi ka ata râ igê na Asi Memera,

⁷ngaira ka avarasiê, ma inê kê katoa na mengo ki susu i berarogata na êvarimi ma na me ni Esipito. Inê kê katoa na asi ki marupi hetaku hunira ma ka tono ka me na me ni Esipito. Igamu kamu bani giraragi na tarani, gê bani katogi tanga i Esipito. “Igamu kamu bani oga arihu igê na bagamasusu raha.

⁸Inê kê bêngenigamu tanga na apanena iata na Amorita, ga oga kerekê i Jotano. Ngaira ka megamuheariha ma inê kê katogamu, kamu teharira. Igamu kamu parênia na apanena iata ma kê mutera tarami.

⁹Hemuri na maneraha i Moaba o Balaka karena o Sipore ki megamuheariha. Ngaia ki kasi tamasinga tanga o Bileama karena o Beore, ma ki nungia, hanana vi kuasigamu.

¹⁰Ma inê kê pe hagamarumungenia o Bileama hanana vige kuasigamu, ma kê katoa ki nungiê hete kê koro tangagamu. Inê kê hagatahigamu vikana tenia o Balaka.

¹¹Igamu kamu tarêhia i Jotano ma kamu tariha i Jeriko. Na me i Jeriko ka megamuheariha mangara na Amorita, na Perisita, na Kananita, na Hitita, na Girigasita, na Gavita ma na Jebusita. Ma inê kê katogamu kamu teharira hato.

¹²Inê kê katora ka tugupu ma kê tarigenira hura tarami, manga gê bani katorerua noga na maneraha gi rua iata na Amorita. Inênga kanigê teharira, mareha vi surigi na tatapa borahu ma na epage iami.

¹³Inênga kanigê haganahunigamu renigi na mu ma na hinua iata, mu pe tagarahigi maremi. I ngekê igamu kamu oga i ngekana ma kamu ngêgi na guani na vaini ma na olive, mu pe hasigi maremi.’”

¹⁴O Josua ki uria na ateateha, ki vi: “Hoita, mu hagarahasia na Araha. Mu hagahigasia maninga ma kamu tototo suria. Mu kasira vê na ataro, na êvarimi ka hagarapera i Mesopotamia, se na ataro iata na Amorita, na apanena iata mu oga igê i ngekê.

¹⁵Tangagami igami, inê ma na ahemata iaku, igami kami toto suria ma na Araha.”

¹⁶Na enoni ka arami, ka vi: “Igami ki asa, vigami pania na Araha, hanana vigami tototo suria na ataro.

¹⁷Na Araha God iaka ki bêngenigia hura na êvarika ma igia tenia i Esipito, na agua ga vora re igê na kare rakuraku. Igia ka bani bâsigi na marâ i katogi. Ngaia ki anumasigia tare, matena ga tavoraha me surigi na apaneni iata na apaneni me rako.

¹⁸Na Araha ki tarigenira hura taraka na Amorita hato, ga oga ikê. Tahema igami nogamami kami page tototo suria na Araha, suria ngaia getea ma kani God iaka.”

¹⁹O Josua ki vi tangara na enoni, ki vi: “Siana kamu takusia vi mataku ma, vigamu tototo suria na Araha. Na Araha ki apuna ngavê. Ngaia ki pe maratorata na ataro. Ngaia ki asa vige bonotenigi na tasi iami, manga vi igamu ma kamu pe tototo suria maninga.

²⁰Manga mu murisigea ma kamu tototo surira na ataro iata na enoni getera, ngaia ki page mangariaga tangagamu ma ki page hagaitangigamu. Ngaia ki page mutegamu ngavê, henaka ngaia ki bani koro me tangagamu i nago.”

²¹Na enoni ka aramia o Josua, ka vi: “Henaka i manga ngekana, igami kami togeaga nga kami tototo suria na Araha.”

²²O Josua ki vi tangara, ki vi: “Hoi, igamu maremi nga kani hagatanga monari renigamu maremi, vi igamu kamu atea, vigamu tototo suria na Araha.” Ngaira ka arami, ka vi: “I monari. Ngaia ngekana, igami maremami.”

²³Vikana o Josua ki bonasira, ki vi: “Mu kasigi râ na nunuta na ataro iata na enoni getera, mu migioga. Mu tohe, vigamu tototo suria na Araha God iata na Isiraelita.”

²⁴Na enoni ka aramia o Josua, ka vi: “Igami kami page tototo suria na Araha God iaka. Igami kami page marupegi na ramata iana.”

²⁵Vikê o Josua ki naka na suruheri henira na enoni igê na tangiana ngekana ma ki vatera renigi na ramata ma na hagesuringa, hanana viga arâ surigi.

²⁶O Josua ki segegi so ramata ngegana igê na buka na ramata iana God. Ngaia ki hagêrasia na bagahê raha i ruguhana na apinige raha hagarangia na agua apuna iana na Araha i Sigeme.

²⁷Ngaia ki vi tangara na enoni, ki vi: “Na hê ikê ki hagatanga monari renigia. Ngaia ki bani rongogi na ara ni tamasinga hato iana na Araha tangagia. Ngaia ki page hagatakusigamu, vi siana kamu haritohea God iami.”

²⁸Hemuri ki nakara vê na enoni ka aporo hegetigi i pasita.

²⁹I murina ngekana na kariana koro na Araha o Josua karena o Nune ki tonga 110 na harisi iana ma ki kahu me.

³⁰Ngaira ka bagia igê na mako iana marena i Timinate Seraga igê na apanena i huhunganiga i Eparaimi hagarangia na hungana i Gasi.

³¹Matena i goga mênga o Josua na Isiraelita ka toto suria na Araha. Ma i murina i me, ngaira ka ama ni katokato nga vikana, suria na enoni raha iata ga bâsigi re maata na tauhana na Araha tangara na Isiraelita, ngaira ka gâga mêngara.

³²Na Isiraelita ka bani tora na surina o Josepo tenia i Esipito ma ka bani bagi i Sigeme igê na mako o Jakobo ki bani vuria renigi na maani tangarê na siliva tenira o karena o Hemore, i haganega na hinua i Sigeme. Na raraha iana ka nahunia na mako ngekana.

³³O Eleasare karena o Aroni ki me ma ka bagia i Gibea, na hinua igê na hungani i Eparaimi. O Pinegasi ki nahunia na hinua ngekana.