Read Kahua JOSUA 3 Bible Online

JOSUA 3 - Kahua bible

JOSUA 3

¹Ki tangi me, ma o Josua ma na Isiraelita hato ka bani rite, ka hagarurugu tenia na tênga i Sitimi ma ka râ tanga i Jotano. Ngaira ka tênga i ngekana mataro me na matena ga tarê igê.

²Ngaira ka oga i ngekana surigi na tangiani gi oru, matena na enoni raha iata ka râhia na tênga,

³ma ka vi tangara na enoni, ka vi: “Matena mu bâsira na mane ni hagarahenga ga tugia na bokesi na suruheri iana na Araha God iami, mu hagarurugu tenia na tênga ma kamu mumurira.

⁴Ngaira ka page hagabâsigamu renia na tara, suria igamu kamu kahu râ me ikê. Siana kamu purupuru i murina na bokesi na suruheri. Mu kasikasi bevoa na kilomita gi tage.”

⁵O Josua ki bonasira na enoni, ki vi: “Mu hagamatarotarogamu maremi, suria i gomaha na Araha ki page katogi na mena i berarogami.”

⁶Ma hemuri ngaia ki vi tangara na mane ni hagarahenga, ka tugia na bokesi na suruheri ma ka nanago tarata na enoni. Ngaira ka kato vikana.

⁷Na Araha ki vi tanga o Josua, ki vi: “Na tarana gê page katoa i ngekê, ngaia ki page katora na Isiraelita hato, ka hagahigasigo, vi igo ka na maneraha iata. Ngaira ka page tahetara, vi inê kê ngahisigo manga gê bani ngahisia o Moise.

⁸Go bonasira na mane ni hagarahenga, ga tugia na bokesi na suruheri, vi matena ga mataro râ i ve i Jotano, ki tuguhira, viga soso igê ma ka rêra hagarangia na akerena.”

⁹Hoi, o Josua ki vi tangara na enoni, ki vi: “Râ me kamu karinga na tamasinga iana na Araha God iami.

¹⁰Ngaia ki page tarigenira hura na Kananita, na Hitita, na Givita, na Perisita, na Girigasita, na Amorita ma na Jebusita tarami. Igamu kamu page tahetara, vi God Mamauri ki ngahisigamu,

¹¹matena i nanago tarami ki tarêhia i Jotano na bokesi na suruheri iana na Araha, i marungia na maveta haganani.

¹²Hoi, mu atera na mane tangahuru matarerua tenira na varo ninuni hegitigi iana o Isiraele.

¹³Matena na mane ni hagarahenga, ga tugia na bokesi na suruheri iana na Araha i marungia na maveta hagenani, ka pupu so i ve i Jotano, na ve ki page hato vige ogogo. Na ve i arâ me ki birobiro susu ma i na agua gi tage.”

¹⁴Na enoni ka pania na tênga, hanana ga tarêhia na ve i Jotano. Na mane ni hagarahenga, ga tugia na bokesi na suruheri, ka nanago tarata.

¹⁵Ngaia ki na matena ni hagahisi. Na ara ni matena vikana na ve i Jotano ki maganu. Pusina ma na mane ni hagarahenga ka pu so i ve,

¹⁶na ve ki kahu hato vige ogogo. Na ve ki râ me ki biro susu i hinua i Atame na hinua hagarangia i Saretane. Na ve ki ogogo ki so tanga na Asime, ki ruka ngavê. Vikana na enoni ki kahu mataku tangara ka tarêhia i Jotano tanga i Jeriko.

¹⁷Matena na enoni ka râ igê na agua i mamata ka tarê, na mane ni hagarahenga, ga tugia na bokesi na suruheri, ka ura igê na agua i mamata i gupuna na ve i Jotano, mataro me na enoni ka pane tarê hato.