Read Kahua JOSUA 4 Bible Online

JOSUA 4 - Kahua bible

JOSUA 4

¹Matena na Isiraelita hato ka tarêhia hato i Jotano, na Araha ki vi tanga o Josua,

²ki vi: “Gu atera na mane tangahuru matarerua, na ani gi tage tenia na ara ni varo ninuni.

³Gu bonasira ka toregi na hê tangahuru matarerua i gupuna na ve i Jotano, igê na agua ga ura igê na mane ni hagarahenga. Go vi tangara, ka migirâ me na hê ngegana tanga na agua, mu taunga kamu mauru igê.”

⁴Hoi, o Josua ki atera na mane tangahuru matarerua ma ki unira me.

⁵Ngaia ki vi tangara, ki vi: “Mu soso i rarona na ve i Jotano ma kamu nanago tarana na bokesi na suruheri iana na Araha God iami. Na ara ni hitangimi ki totora gapararenia na hê. Na ara ni hê ki tonganira na varo ninuni iana o Isiraele.

⁶Na hê ngegana ka page hagatakusira na enoni renigi na marâ, ki bani tanugi na Araha. I na matena i muri me na karemi ka page hagategamu renia na girarani na hê ngagana.

⁷Igamu kamu page hagarongora renia na ve i Jotano i mamata, matena na bokesi na suruheri iana na Araha ki tarêhia igê na ve. Na hê ngegana ka page hagatakusira tare na Isiraelita renigi na marâ, ga vora me ngegana.”

⁸Na mane ka kato, manga i vi o Josua surigi na tamasinga iana na Araha tanga. Ngaira ka toregi na hê tangahuru matarerua i gupuna na ve i Jotano. Na ara ni hê ki tonganira na varo ninuni iana o Isiraele. Ngaira ka toragapara renigi tanga na tênga ma ka nakagi igê.

⁹O Josua ki hagêrasigi nikâ na hê tangahuru matarerua i gupuna na ve i Jotano igê na agua ga ura igê na mane ni hagarahenga, ga tugia na bokesi na suruheri. Tariha me i ngekê na hê ka gâga mêngagi i ngekana.

¹⁰Na mane ni hagarahenga ka ura i gupuna na ve i Jotano, mataro me ka hato na ara ni tarani, na Araha ki hagatora o Josua, ki bonasira na enoni renigi, ka katogi. Ma nikâ o Moise ki bani bonasia o Josua renigi. Na enoni ka hatani tarêhia rêrê na ve.

¹¹Matena ngaira hato ka pane tarê, na mane ni hagarahenga henia na bokesi na suruheri iana na Araha ka nanago tarata.

¹²Na mane ni me tenira na varo ninuni iaterua hehegitigi o Rubeni mo Gati ma tenia na apanena na varo ninuni iana o Manase, ngaira ka tangaru ma ka tarêhia na ve i nago tarata na enoni, manga i bani bonasira vikana o Moise.

¹³Matena na Araha ki ngahisira, na 40, 000 na mane ni me ka tangaru ma ka reke tarê tanga na bena hagarangia i Jeriko.

¹⁴Tahema igê na tangiana ngekana na Araha ki katora na Isiraelita ka hagahigasia ngavê o Josua. Ngaira ka hagahigasia ngavê suria na ogaha iana hagenani, manga ga bani hagahigasia noga o Moise.

¹⁵Hemuri na Araha ki hagatora o Josua,

¹⁶ki bonasira na mane ni hagarahenga ga tugia na bokesi na suruheri, ka me akê me tenia na ve i Jotano.

¹⁷O Josua ki kato vikana.

¹⁸Matena na mane ni hagarahenga ka bani pane tarê, na ve ki kahu ogogo ma ki maganu aporo.

¹⁹Na enoni ka tarêhia na ve i Jotano igê na tangahuruta na tangiana igê na hageha hagenago ma ka tênga i Gilegale i na apanena akê i Jeriko.

²⁰I ngekana nga o Josua ki hagêrasigi igê na hê tangahuru matarerua, ga migirâ me tenia i Jotano.

²¹Ngaia ki vi tangara na Isiraelita, ki vi: “I hemuri me na karemi ka page hagategamu renia na girarani na hê ngegana.

²²Ma igamu kamu page hagarongora renia na matena na Araha ki hagamamataria na ve i Jotano, hanana na Isiraelita ka tarêhia.

²³Mu hagarongora, vi na Araha God iami kani hagamamataria na ve i Jotano tangagamu, hanana mu tarêhia, manga i nago i bani hagamamataria noga na Asi Memera tangagia.

²⁴Vikana na enoni hato i maveta ka page tahetara, vi na Araha ki raramohaga hunia ngavê, ma igamu kamu page hagahigasia tare na Araha God iami ki bê ki arâ.”