Read Kahua JOSUA 7 Bible Online

JOSUA 7 - Kahua bible

JOSUA 7

¹Ta na Isiraelita ki pe tê viteana na Araha, i bonasira na Isiraelita vi hagamakakagi na ara ni marâ hato i hinua i Jeriko, ma siana ka toregi tangara mareta tani na marâ igê. Na Isiraelita ngekana ki no Agane. Ngaia ki aharê igê na ramata ngekana. Tahema na Araha ki mangariaga ngavê tangara na Isiraelita. O Agane ka no karena o Karami ma o vesina o Sabati. Ngaia ki na mane tenia na hagosi ninuni iana o Seraga tenia na varo ninuni iana o Juta.

²O Josua ki hagatorangenira tani na mane tenia i Jeriko tanga i Ai, na hinua i na apanena akê i Betele, hagarangia i Betavene, hanana ga râ bâbâ i ngekana. I na murina ngekana,

³ngaira ka aporo i pasina o Josua ma ka hagarongoa, ka vi: “I pe arari vi na mane ni me hato ke taharia i Ai. Gu hagatorangenira râ ma na rehagaro gi rua se gi oru na mane ni me. Siana ko hagatorangenira râ hato na mane mi me tanga na hearihatana, suria na hinua i Ai ki pe raha.”

⁴Vikê na ararina na rehagaro gi oru na Isiraelita ka taharia na hinua i Ai, ma na ai ni hinua ka sugarira bê aporo.

⁵Na mane ni Ai ka tarigenira na Isiraelita tenia na maani para ni hinua, ka rere rârâ mataro me igê na tarihu ga totora hê igê, ma ka nahuira ka me na tangahuru gi oru matare ono. Vikana na Isiraelita ka magu ma ka bubununuga renira.

⁶O Josua ma na mane ni hagaotonga iata na Isiraelita ka tarisigi na gahu iata, suria ga hetaki. Ngaia ka tubê so i ano i maana na bokesi na suruheri iana na Araha, ma ka tâ i ngekana rârâ ma ki bungi. Ki makomakoga na bêta, suria ga hetaki.

⁷O Josua ki vi: “Araha God, tanu hega ko bêngenigami tarê me i ve i Jotano? Go obania vari, vigo tagarenigami tangara na Amorita? I ararigami hete, vigami oga mavê i na apanena tarê i ve i Jotano.

⁸Bâ, na merongamami ka sugarira na mane ni me iamami. Na ta be visia?

⁹Na Kananita ma na enoni hato igê na agua ka page rongoa. Ngaira ka page gâga rihuigami ma ka page mutegami hato ngavê. Na ta ko page katoa, hanana vi na enoni ngegana siana ka tamasi erasigo?”

¹⁰Na Araha ki aramia o Josua, ki vi: “Aharaga! Siana ko tâ vikana i ano!

¹¹Na Isiraelita ka bani tasi. Ngaira ka aharêngia na ramata iaku tangara. Ngaira ka tora tangara mareta tani na marâ, gê bonasira, viga susu hagamakakagi. Ngaira ka hanagogi, ka hagaiga pusigi ma ka hakugi henigi na nahuninga iata mareta.

¹²Tahema na merongata ka sugarira bê aporo na Isiraelita. Ngaira ka gavatenira, suria na katoha iata ki apariri bê me tangara mareta. I asa be ngahisigamu nikâ, manga vi igamu ma kamu pe susu hagamakakagi na mârâ, gê hagapêpugamu renigi.

¹³Aharaga! Hagamatarotarora na enoni ma ku hagananêra ka arâ me i maaku. Go vi tangara, ka nanê i gomaha, suria inênga na Araha God iata na Isiraelita inê kê obania ve vi vikê tangara: ‘Isiraelita, igamu kamu nahunigi tani na marâ, gê bani bonasigamu vigamu susu hagamakakagi. Manga igamu ma kamu pe kasigi râ, igamu ki bara vigamu teharira na merongami.’

¹⁴Hoi, gu vi tangara, vi i gomaha ki tuguhira, ga page arâ me tatage i maaku na varo ninuni iata hehegitigi na Isiraelita. Na varo ninuni gê page atea, ki page arâ me tatage na ara ni hagosi ninuni. Na hagosi ninuni gê page atea, ka page arâ me tatage na ara ni ahemata. Na ahemata gê page atea, ka page arâ me tatage na ara ni mane.

¹⁵Na mane gê page atea ma ki nahunigi na marâ, gê bonasigamu vigamu susu hagamakakagi, hoi, mu nahuia ki meme ma kamu sungia henira na ahemata iana ma henigi na ara ni nahuniga hato iana, suria ngaia ki hagamakira ngavê na Isiraelita ma ki aharêngia na suruheri iaku.”

¹⁶Igê na mahogotana i tangi me, o Josua ki merarâ tatage na ara ni varo ninuni iata hehegitigi na Isiraelita i maana na Araha. Na Araha ki atea na varo ninuni iana o Juta.

¹⁷O Josua ki merarâ me tatage na ara ni hagosi ninuni tenia na varo ninuni iana o Juta. Na Araha ki atea na hagosi ninuni iana o Seraga. Hemuri o Josua ki merarâ me tatage na ara ni ahemata tenia na hagosi ninuni iana o Seraga. Na Araha ki atea na ahemata iana o Sabati.

¹⁸Hemuri o Josua ki merarâ tatage na ara ni mane tenia na ahemata iana o Sabati. Na Araha ki atea o Agane, o karena o Kanami mo vesina o Sabati.

¹⁹O Josua ki vi tanga, ki vi: “Goaku, gu tamasi igê na monariha ikê i maana na Araha God iata na Isiraelita! Gu ranganigo maremu! Visia me na marâ go erasia! Siana ko pinihia teniê!”

²⁰O Agane ki arami, ki vi: “I monari. Inê kê haritohea na Araha God iata na Isiraelita. Ngaia ki manga ikê.

²¹I berarogani na marâ mi henahuraugi, inê kê bâsigi na tuguni bâkoro era ni Babilonia, na kilo gi rua na siliva, ma na guana na golo na apapagana na kilo. Inê kê obanigi bâraha. Tahema inê kê toregi. Igo ko girara go tarahugi gê ahunigi i rarona na ruma na gahu iaku. Na siliva ki tâ matakere so i porona na kiru.”

²²Vikê o Josua ki hagatorangenira tani na mane tanga na ruma na gahu. Ngaira ka tango râ ma ka tarahugi na marâ ngegana, i ahunigi i ngekana. Na siliva ki tâ matakere so i porona na kiru.

²³Ngaira ka migihura tenia na ruma na gahu, ka migirâ tangara o Josua ma na Isiraelita hato, ma ka nakagi so i maana na Araha.

²⁴O Josua ma na Isiraelita hato ka ranguia o Agane ma ka tora râ tanga na maruguna i Agore henigi na siliva, na golo, na tuguni ma henira o karena, ka karena, na puruka, na tonki, na goti ma na sipi iana, ma henigi na ruma na gahu iana ma na ara ni nahuninga hato iana.

²⁵O Josua ki hagatea, ki vi: “Tanu hega go hagaratemami? Hoi, i ngekê na Araha ki page hagaitangigo!” Na enoni hato ka arihahunia o Agane. Ngaira ka arihahunira ma ka sungira na ahemata iana henigi na nahuninga iana.

²⁶Ngaira ka uria renigi na hê rako era. Na hê ngegana ka gâga mêngagi mataro me i ngekê. Tahema ka hêtana na agua ngekana vi Maruguna ni Bagabevoani. Ma na mangariaganiha iana na Araha ki kahu hato.