Read Kahua JOSUA 9 Bible Online

JOSUA 9 - Kahua bible

JOSUA 9

¹Na maneraha hato kereso i Jotano, igê na hungani ma na barani, igê na tarasini kereso ki râ ki tariha i Libanone, ngaira ka rongoa, vi na Isiraelita ka teha. Ngaira ngegana ka na maneraha iata na Hitita, na Amorita, na Kananita, na Perisita, na Gavita ma na Jebusita.

²Ngaira hato ngegana ka harikato ma ka hakura na mane ni me hato iata, hanana viga meraheariha o Josua ma na Isiraelita.

³Na ai ni hinua i Gibeone ngaira nogata ka na Gavita. Ngaira ka bani rongogi na tarani, i katogi o Josua renirerua na hinua i Jeriko me Ai.

⁴Ngaira ka kato, viga hagaparua o Josua. Ngaira ka tora na suarita ma ka hagarutangira na tonki iata renigi na bani anga ma na anga ni vaini ga abagi.

⁵Ngaira ka tuguni kakaga ma ka santele kakaga, ga bani agiagigi. Na bereti na suarita ki ngangataga ma ki gagahuruga.

⁶Hoi, ngaira ka râ tanga na tênga iata na Isiraelita i Gilegale. Ngaira ka vi tangara o Josua ma na Isiraelita, ka vi: “Igami kami râ me tenia na agua i hagatê. Igami kami obanigamu, vigamu katoa na suruheri henigami.”

⁷Na Isiraelita ka hagatera, ka vi: “Tanu hega ki tuguhigami, vigami katoa na suruheri henigami? I pasimi ki hagarangi ma vari!”

⁸Ngaira ka vi tanga o Josua, ka vi: “Igami kami nanê, vi na ta ko hagatoragami renia!” O Josua ki hagatera, ki vi: “Ti kani igamu? I pasimi kani i he?”

⁹Ngaira ka aramia, ka vi: “Igami kami râ me hagatê ngavê, suria mi rongo tarohana na Araha God iami. Igami kami rongogi na tarani i katogi i Esipito,

¹⁰ma na tarani i katogi tangarerua na maneraha iata na Amorita i na apanena akê i Jotano: o Sigone na maneraha i Gesebone mo Ogo na maneraha i Basani i oga i Asatarote.

¹¹Na enoni raha ma na enoni hato ga oga i pasimami ka vi tangagami, kami tora suarimami, hanana vigami arâ me, kami bâsigo. Ngaira ka vi tangagami, vi tuguhigami, vigami nanê ma, vi na ta ko hagatoragami renia, ma kami nungigo, ko katoa na suruheri henigami.

¹²Bâsigi na bereti iamami. Matena mi pania na hinua iamami tanga mi râ me kami bâsigo, na bereti ngegê ka mahanahana mêngagi. Gu bâ! I ngekê ngaigi ki ngangataga ma ki gagahuruga.

¹³Na anga ni vaini ngegê ka haoru mêngagi, matena mi hagavunusigi. Gu bâ! Ngaigi ki aharihari. Na tuguni ma na santele iamami ki kakaga, suria mi râ borahu.”

¹⁴Na Isiraelita ka ngê haku henira renigi na ngêra iata na ai ni Gibeone, ma ka pe girara hagenago tenia na Araha.

¹⁵O Josua ki naka na suruheri ni hetamaniha henira na ai ni Gibeone ma ki pe nahuira. Na enoni raha iata na Isiraelita ka tohe, viga hagahigasia na suruheri.

¹⁶Na tangiani gi oru i murina ga katoa hato na suruheri, na Isiraelita ka kahu tahetara, vi i pasita na ai ni Gibeone ki hagarangi me ma.

¹⁷Vikê na Isiraelita ka mumurira. I murini na tangiani gi oru ngaira ka ata râ i hinua iata na enoni ngegana: i Gibeone, i Kepira, i Berota me Kiriate Jearimi.

¹⁸Ma na Isiraelita ki bara tangara, vige nahuira, suria na enoni raha iata ka tohe renia na Araha God iata na Isiraelita, matena ga naka na suruheri henira. Na enoni hato ka hagahunira na enoni raha iata renia na tarana ngekana.

¹⁹Na enoni raha ka aramira, ka vi: “Igami kami tohe renia na Araha God iata na Isiraelita, matena mi naka na suruheri henira. Tahema ki bara tangagami, vigami nahuira ke me.

²⁰Igia ki tuguhigia, viga nakara mavê, suria igami kami bani tohe vikana. Manga i mareha, God ki page hagaitangigia.

²¹Hoi, nakara mavê, hanana ga papapario ma ka titi ve tangagia.” Nga na katoha iata na enoni raha ngegana.

²²O Josua ki unira me na ai ni Gibeone, ma ki hagatera, ki vi: “Tanu hega kanimu hagabekasigami? Tanu hega kanimu vi, vi i pasimi ki hagatê ngave? I pasimi ki hagarangi me ma!

²³Suria mu kato vikana, God ki page hagaitangigamu. Igamu ma na raraha iami, kamu voravora tare re na kare vurivuri. Mu page papapario ma kamu page titi ve tanga na ruma ni rotu iana na God iata na Isiraelita.”

²⁴Ngaira ka arami, ka vi: “Igami kami kato vikana, suria igami kami tahetara, vi i monari, vi na Araha God iami ki bani bonasia o Moise na kariana koro, ki haganahunigamu renia na agua hagenani, ma ki bonasigamu, kamu mutera na enoni hato igê, matena mu sugarira. Igami kami kato vikana, suria igami magutenigamu ngavê. Igami kami magu vigami me.

²⁵Hoi, igami kami oga i ruguhamu. Gu katogami igê na tarana go takusia vi i oto tangagami.”

²⁶Vikana o Josua ki katora vikê: Ngaia ki anumasira ma ki manimanira na Israelita vi siana ka mutera.

²⁷Henaka, ma ngaia ki katora ka vora re na kare vurivuri, hanana ga papapario ma ka titi ve tangara na Isiraelita ma tanga na bea ni vogasiha iana na Araha. Mataro me i ngekê ngaira ka ama ni tagara nga vikana igê na agua, na Araha ki atea hanana viga hagarahe igê tanga.