Read Kahua 2 TESALONIKA 1 Bible Online

2 TESALONIKA 1 - Kahua bible

2 TESALONIKA 1

¹Igami, inê Paulo, mo Sailasi, mo Timoti, kami segesege tangagamu na haku na enoni i Tesalonika, mu tongesuria o Kirisito. Garu angarigamu God Vaemaka mo Jesu Kirisito na Araha.

²Igami kami nungirerua God Vaemana mo Jesu Kirisito na Araha karu takuigamu, komanigamu, ma karu korokoro tangagamu.

³Goamami igê na tongesuriha, i tuguhigami, vi gami visia koro God tare renigamu! I oto tangagami, vi gami katoa nga, renia garu ama ni raharaha nga na tongesuriha iami ma na hetakuiha iami.

⁴Tahema igami nogamami, kami tamasi ageage renigamu tangara na haku na enoni, ga tongesuria God. Igami kami tamasi ageage, renia vi igamu kamu ama ni gatagata nga, ma kamu ama ni tongesuri nga, henaka vi na enoni ka merongasigamu, ma ka hagamamasiaga apemi.

⁵Na marâ hato ngegana ka hagamonaria, vi God ki surira oto na enoni. Renia mu hatamigi na marâ hato ngegana, ki page ararigamu na Arahanga iana God, suria igamu kamu hatamia na mamasiaganiha renia.

⁶Suria God ki page katoa na tarana i oto. Tahema ngaia ki page hagaitangira na enoni, ga hagamamasiaga apemi.

⁷Ma ngaia ki page toregi râ na mamasiaganiha tenigamu, ma tenigami nikâ. Ngaia ki page katoa na tarana ngekana, matena na Araha o Jesu i page voravora me tenia na vavearo. Na angelo raramohaga hunira ka page takua,

⁸ma ki page gâga na gi, i vavata. Ma ngaia ki page arâ me, hanana i hagaitangira na enoni, ga usitenia God, ma ka marakorotenia na Taroha Koro renia na Araha o Jesu.

⁹Ma ngaia ki page hagaerasira hagetage tare ki bê ki arâ, suria ngaira ki asa iata, vi ge oga henia na Araha, ma ki asa iata, vi ge hatamia na bâbâhana koro ma raramohaga.

¹⁰Na marâ hato ngegana ka page vagavaga me mave igê na Tangiana ngekana, igê na matena na Araha i page aporo me igê, hanana na kariana hato ka kasia akê, ma na enoni hato, ga tongesuria, ka visia raha. Igamu nikâ kamu page oga henira na enoni, ga hagarahasia na Araha, renia mu bani tongesuria na marâ, mi bani tarohenia tangagamu.

¹¹Tahema igami kami nunginungi tare tangagamu. Igami kami nungia God iaka ki hagakorogamu, hanana mu girara mu mauri suria na obaniha iana. Igami kami nungia God, ki tamanigamu, hanana mu tanugi na ara ni marâ koro, mu obanigi, vi gamu tanugi, ma ki hagahatongigi na marâ, mu katogi suria mu tongesuria o Kirisito, renia God ki raramohaga hunia.

¹²Igê na tarana ngekana igamu kamu page kasia akê na Araha iaka o Jesu, ma ngaia ki page kasigamu akê. Ma na tarana ngekana ki page voravora me mave, suria God iaka ma na Araha o Jesu Kirisito karu koro era tangagamu.