Read Kahua 1 TIMOTI 4 Bible Online

1 TIMOTI 4 - Kahua bible

1 TIMOTI 4

¹Na Higona Apu ki tamasi mataha, ki vi, i ta na matena i hemuri me tani na enoni ka page kasia na tongesuriha monari. Ngaira ka page têtê viteata na ataro, ga hagahagaparu, ma ka page arâ surigi na hagesuringa iata Satana ma na kariana.

²Na hagesuringa ngegana ka arâ me tenira na enoni ni hagaparunga, ga babanga era, ma ki bono na osuta. Na tasi ka angarigi na aitangihata.

³Na hagesuringa iata na enoni ngegana ka vi, vi na tarana na êragiha ki na marâ i era, ma ki apu nikâ, vi ge ngaugi tani na ngêra. Ma God ki bani hagavoragi na ngêra ngegana, hanana vi na enoni, ga tongesuri, ma ka bani girara na monariha, ka ngaugi, i murina ga visira koro God renigi.

⁴Na ara ni marâ, God i bani hagavoragi, ka koro. Siana ka kikitenia ta na marâ. Ma ki tuguhigia, ga taugi na marâ hato ngegana, ma ka visia koro God renigi.

⁵Renia na tamasinga iana God ma na nunginungiha ka katogi na marâ hato ngegana, ka hagakoro obana God.

⁶Manga go hagesurira na goaka igê na tongesuriha renigi na marâ, gê bani visigi ngegana, igo ko page vora re na kariana koro o Kirisito Jesu. Go hagangêa na ataromu renigi na tamasinga na tongesuriha ma na morana na hagesuringa, go bani râ surigi.

⁷Go usisitenigi hagetage na sihonga, ga rêrapusia God, ma ka ata ni rongo mavê. Go ama ni uhungia nga, ko hagagatagatania na mêriha iamu, ki arâ suria God.

⁸Manga viga hagagatagatania na mauriha i apeka, i koro ma. Ma ki manga ga hagagatagatania na maurihaka, i râ suria na tongesuriha, ki koro teha ngavê igê na ara ni tarani, renia i koro tangarerua na mêriha i ngekê ma na mêriha i hemuri me.

⁹Na tarana ngekê ki monari ngavê! Ga taua, ma ka tongesuria gatagata.

¹⁰Tahema igia ka ama ni uhungia nga, ma ka tagara ramo, suria igia ka hagêguritogo renia God mamauri, na Hagamauri iata na enoni hato, ma ngaira nga ka na enoni, ga tongesuri.

¹¹Go bonasira na enoni renigi na tarani ngegana, ma ko hagesurira renigi.

¹²Siana ta na enoni ki ruhigo, suria vi igo ka na mane haoru, ma ko hagabângenigi nga na parongamu koro tangara na enoni, ga tongesuri, hanana ga amake surigo igê na tamasinga iamu, igê na tauhamu, igê na hetakuiha iamu, igê na tongesuriha iamu, ma igê na mêrihamu matarotaro.

¹³Go tâtâ nga igê na tomaniana na Buka Apuna tangara na enoni, igê na ateateha ma na hagesuringa, mataro me na matena, gê arâ me igê.

¹⁴Siana ko hagêrahusia na votovoto iana God i pasimu. Ngaia ki bani vatego na votovoto ngekana, matena na poropete ka tamasi hurigo, ma na maneraha igê na rotu ka têbuhigo.

¹⁵Go katogi na marâ ngegana, ma ko tâtâ nga igê, hanana na enoni hato ka girara, vi na tagaraha iamu ki tavoraha bâkoro.

¹⁶Go bâsigo maremu, ma ko hagaotogo maremu suria na hagesuringa iamu. Go ama ni katogi nga na tarani ngegana suria, manga vigo katogi igo ko page hagatahigo maremu, ma nikâ go page hagatahira na enoni, ga karingago, ma ka tê viteamu.