Read Kahua 1 TIMOTI 6 Bible Online

1 TIMOTI 6 - Kahua bible

1 TIMOTI 6

¹Na enoni vurivuri hato ki tuguhira, viga hanetasira na araha iata, hanana siana ka page tamasi erasia God ma na hagesuringa na rotu iaka.

²Manga vi na enoni vurivuri, ma na araha iata ga tongesuri nogata, ki tuguhira na enoni vurivuri ngegana, siana viga ruhira, suria ngaira ka hegoata igê na tongesuriha. Ma ka tagara bâkoro ngavê hete tangara, renia ngaira ma na enoni, ga hagatagarahira tangara ngegana ngaira, ka obahaku igê na tongesuriha ma igê na hetakuiha. I tuguhigo, vigo hagesurira na enoni renigi na tarani ngegana, ma ko ateate renigi tangara.

³Ma na enoni, i hagesurira na enoni renia na hagesuringa, i totora getea, ma ki pe arâ surigi na tamasinga monari iana na Araha iaka o Jesu Kirisito, ma ki pe arâ suria na hagesuringa na rotu iaka,

⁴ngaia ki paroparo bâraha, ma ki hite ngavê. Ma igê na apena ki tâ igê na teniha i pe koro, hanana i merahetuguri, ma ki merahetamasi na enoni renigi na tamasinga. Ma na tarana ngekê ki katora na enoni, ka hengari, ka hehanehane, ka heguhaguha, ma ka hagatoraira heri,

⁵ma ka hetuguri tare, renia na enoni ngegana ka tugupu, ma ka bani kasia vê na monariha. Ngaira ka takusia ma, vi na rotu ki na tarana tanga na ruruguha ma na haga.

⁶I monari, na rotu ki katoa na enoni, ki ruruguha ngavê, manga vi ngaia ma ki takusia, vi na marâ, i nahunigi, ka arari noga tanga.

⁷Igia ka mevora me vari ta na marâ i maveta? Mareha vê! Na ta igia ka merâ tenia na maveta, matena ga meme? Mareha vê!

⁸Tahema manga igia, ma ka nahunigi na ngêra ma na gahu, ngekana ki uhu nga tangagia.

⁹Ma na enoni, ga tenia, vi ga ruruguha, ngaira ka votavota igê na heuhungiha, ma ka tutu igê na tu na teniha rako, ga bekabekaga, ma ka hagaerasira. Na teniha ngegana ka katora na enoni, ka era ngavê, manga na ruma, ga hogea ma ka sungia.

¹⁰Renia na teniha ni haga ki na hunani na ani mavê na eraha. Tani na enoni ka bani tenigi bâraha na haga, tahema ga bani kasia vê na tongesuriha, ma ka bani erasigi na aitangihata igê na tarani ga pe koro.

¹¹Ma igo, God ki bani atego, i tuguhigo, vigo hinarugi na tarani hato ngegana. Ko uhungia nga, hanana go katogi na marâ, ga koro ma ka oto i maana God, go hanetasia tare God, go hetakui, go piringiape, ma ko haritagi.

¹²Go uhungia nga, hanana go tehateha igê na tongesuriha, ma ko taua na mêriha mora ma tarema tangago maremu, na mena na tangoha iamu. Renia God ki bani unigo tanga na mêriha nga ngekê, matena igo ko visia mataha na tongesuriha iamu i maata na enoni rako.

¹³I maana God, i votogi na mêriha tangagi na ara ni marâ, ma i maana o Kirisito Jesu, i visia mataha i maana o Ponsio Pilato, vi o ti kani ngaia, inê kê bonasigo:

¹⁴hanana go marupea bâkoro na ramata ngekana, ki arâ maninga mataro me na Tangiana na Suriha Raha, i page arâ me igê na Araha o Jesu Kirisito.

¹⁵Igê na matena tanga God i page katoa, i arâ me, God koro ngaia nga ki ramata, ngaia ki na maneraha, i teha, ma na Araha, i teha.

¹⁶Ngaia getea ma ki asa, vi ge page me. Ngaia ki oga igê na marara, i asa ta na enoni, vi ge râ me hagarangia. I mareha ta na enoni, vi ge bani bâsia, ma ki mareha ta na enoni, vi ge girara ge bâsia. Ka visia raha, ma ka naka, ki marungigia tare. Monari.

¹⁷Go bonasira na enoni, ga ruruguha renigi na marâ ni maveta, hanana siana ka paroparo, ma siana ka hagêguritogo renigi na marâ mangagi na ruruguha, igia ka pe hagêguritogo renigi. Ma ko bonasira, ka hagêguritogo renia God hete, i mahatangenigi na ara ni marâ tangagia, hanana igia ka vagevage renigi.

¹⁸Go girarara, ka hekomani, ka ruruguha igê na tagaraha koro, ka mamahata, ma ka agana ka meratongani na enoni getera renigi na ruruguha iata.

¹⁹Igê na tarana ngekê ngaira ka page nakanaka haku tangara mareta na ruruguha, i hanira bâkoro tanga na matena i hemuri me. Ma vikana ngaira ka page girara ga nahunia na mêriha, na morana na mêriha.

²⁰Timoti, go marupea maninga na marâ, ga bani hagatorago renia. Go hinarura na enoni, ga pe hanetasia God igê na tamasinga iata, ma ka hetuguri bekabekaga renia na tamasinga, tani na enoni ka hêtana vi na “Giraraha”, ma ki mareha.

²¹Renia tani na enoni ka vi, vi ngaira ka nahunia na giraraha, tahema ngaira ka bani kasia na tarana na tongesuriha. Inê kê nungia God, ke korokoro tangagamu hato.