Read Kahua 2 TIMOTI 1 Bible Online

2 TIMOTI 1 - Kahua bible

2 TIMOTI 1

¹Inê Paulo. God ki bani ateê, kê aposotolo iana o Kirisito Jesu, ma ki bani hagatorangeniê, kê tarohenia na mêriha, God i bani surua tangagia. Ma igia ka nahunia na mêriha ngekana, matena igia ka obahaku henia o Kirisito Jesu.

²Inê kê sege tangago, Timoti, o kareku hetakui igê na tongesuriha. Inê kê nungirerua God Vaemana mo Kirisito Jesu, na Araha iaka, karu korokoro tangago, karu takuigo, ma karu vatego na marapeha.

³Inê kê visia koro God. Inê kê tagara tanga mangara na êvariku i nago, ma ki matarotaro na aitangihaku igê. Inê kê visia koro, matena gê takusigo tare igê na nunginungiha iaku igê na tangiani ma na bungiani.

⁴Inê kê takusigi na tavoni na maamu, ma kê obania bâraha, vi ve bâsigo, hanana ve vagevage bâraha.

⁵Inê kê takusia na tongesuriha koro iamu. Na tongesuriha ngekana ki gâga nikâ i pasina kiramu ka Loisa, ma i pasina nikâ kenamu ka Unise. Ma inê kê girara bâkoro, vi ngaia ki oga nikâ i pasimu.

⁶Tahema inê kê hagatakusigo, hanana vigo ama ni taua gatagata nga na votovoto. God ki bani vatego renia, matena gê têbuhigo.

⁷Suria na Higona Apu, God i bani vategia, ngaia ki pe katogia, ke magu. Na Higona Apu iana ki katogia hete, ka ramoramo, ma ka hetakui, ma ka girara ga bâbâ taraka.

⁸Tahema, siana ko maki, vi gu tarohenia na Araha iaka. Ma siana ko maki reniê inê nikâ, suria inê kê oga i ruma ni hagaitangiha, renia gê tongesuria na Araha, ma ka tage hatamia hete na mamasiaganiha renia na Taroha Koro, suria God ki hagaramonigo.

⁹Ngaia ki bani hagatahigia, ma ki bani unigia, ka vora re na kariana marena. Ngaia ki kato vikana, mareha vi surigi na marâ, igia mareka ka bani katogi, ma suria hete na katoha iana marena, ma suria ngaia ki koro tangagia. I nago kere vê noga ngaia ki bani naka na korohana ngekana henia o Kirisito Jesu,

¹⁰ma i ngekê ngaia ki bani naka mave tangagia, renia ngaia ki hagatorangenia me na Hagamauri iaka o Kirisito Jesu. Renia o Kirisito ki bani hagamagahurua na raramohana na mera, ma renia na Taroha Koro ngaia ki bani hagagiraragia renia na mêriha mora ma tarema.

¹¹God ki bani kasiê, kê aposotolo, hanana vigê tarohenia na Taroha Koro, ma kê hagesurira na enoni renia.

¹²Tahema inê kê hatamia na mamasiaganiha renigi na tarani ngegê. Ma ki henaka i manga ngekê, ma inê kê pe makumakusiga, suria inê kê girara, vi ngaia ki na ani, gê hagêguritogo renia, ma kê girara bâkoro, vi ngaia kani girara i marupea maninga na marâ, i bani hagatorê renia, mataro me na Tangiana na Suriha Raha.

¹³Go taua gatagata na hagesuringa monari, gê bani hagesurigo renia, suria ngaia ki na tara, i tuguhigo, vi go arâ suria. Ma ko gâga tonge igê na tongesuriha ma na hetakuiha. Igia ka nahunirerua, manga vi igia, ma ka obâbahaku henia o Kirisito Jesu.

¹⁴Go marupegi maninga na tarani koro, ga bani hagatorago renigi igê na raramohana na Higona Apu, i angarigia.

¹⁵Go bani girara, vi na enoni hato i na apanena i Asia ka bani hagarisiê, henirerua o Pigelo mo Homogenesi.

¹⁶Inê kê nungia na Araha, ki takuia na ahemata iana o Onesipore, suria ngaia ki hagaramoniê hagarako. Ngaia ki pe maki reniê, suria gê goga i ruma ni hagaitangiha.

¹⁷Ma na matena ngaia ki ata me i Roma, ngaia ki haganega ototo râ ki bâ reniê, mataro ki tarahuê.

¹⁸Inê kê nungia na Araha, ki takuia igê na Tangiana na Suriha Raha! Ma igo nogamu ko bani girara bâkoro, vi manga i he ngaia ki tamaniê bâraha, matena gê oga i hinua i Epeso.