Read Kahua 2 TIMOTI 2 Bible Online

2 TIMOTI 2 - Kahua bible

2 TIMOTI 2

¹Ma igo, o kareku igê na tongesuriha, go ramoramo renia na hetamaniha iana God, igia ka nahunia, matena igia ka obahaku henia o Kirisito Jesu.

²Go taua gatagata na hagesuringa, go bani rongoê, gê ateate renia i maata na enoni rako, ma ko hagatorara na mane renia, na mane go tako togo renira, ma ka girara ga hagesurira na enoni getera nikâ.

³Go meramamasiaga manga na mane koro ni me iana o Kirisito Jesu.

⁴Na mane ni me ki gagêmaga, suria i obania ma, vi hagakoro obana na araha ni me iana. Manga ngekana, ngaia ki pe takotako renigi na ani mavê na tagaraha iata na enoni.

⁵Na mane, i tangotango igê na hemêmêsiana, ki asa, vi ge tehateha, manga vi ngaia, ma ki pe arâ surigi manga vi hanana, ma i ngekana ki asa, vi ge nahunia na mena.

⁶Na mane, i bani tagara bâraha i mu, ki araria, i nahunia na nagona na mu.

⁷Go takotako renigi na marâ, gê visigi tangago, suria na Araha ki page hagagirarago renigi na marâ hato.

⁸Takusia o Jesu Kirisito. God ki bani hagamêria aporo tenia na mera. Ngaia ki na raraha iana o Tavite, manga i visia na Taroha Koro, gê ateate renia.

⁹Suria inê kê ateate renia na Taroha Koro, inê kê hatamia na mamasiaganiha, ma ka rakuê renigi na seni, manga vi inê ka na mane era. Ma ki asa, vi ge rakua na tamasinga iana God renigi na seni.

¹⁰Tahema inê kê agana, kê kasikasi manavaku tare renira na kariana God, hanana vi ngaira nikâ ka page nahunia na tahinga, o Kirisito Jesu i vategia henia na vagevageha tare ma tarema.

¹¹I monari na tamasinga, i vi: “Manga vi igia, ma ka bani meme henia, igia ka page mauri henia nikâ.

¹²Manga vi igia, ma ka pe makumakusiga, igia ka page araha henia. Manga vi igia, ma ka hagaiga pusigia mareka renia ngaia, ngaia nikâ ki page hagaiga pusia marena renigia igia.

¹³Manga vi igia, ma ka hagêguri baranga, ngaia ki hagêguri togo tare, suria i asa, vi ge hagaparu.”

¹⁴Go hagatakusira tare na kariamu renia na tarana ngekê, ma ko haganunura nga i maana God, hanana vi siana ka hetuguri renigi na tamasinga. Manga ngekê, ki pe koro, renia i erasira ma na enoni, ga rongogi.

¹⁵Go uhungia nga, hanana vi na tagaraha iamu ki hagakoro obana ngavê God. Go tagara manga na enoni tagara, i pe maki renigi na tagaraha iana, ma ko hagesurira ototo na enoni renia na tamasinga iana God renia na monariha.

¹⁶Go hinarugi na tamasinga bekabekaga, ga hagatasira na enoni, ma ka okera râ tatage tenia God.

¹⁷Na hagesuringa iata ki page manga na garu, i sugasuga. Na hitangita na enoni, ga hagesuri manga ngekana, ngairerua ka no Himeneo mo Pileto.

¹⁸Ngairerua karu bani kasia na monariha, ma karu erasia na tongesuriha iata tani na enoni, suria ngairerua karu vi, vi na mêriha aporo iaka ki bani oga.

¹⁹God ki bani hagêrasia gatagata na hunana, ma ki asa, vi ge angingi. Ma ka bani segegi so igê na tamasinga igê: “Na Araha ki aitangisira na kariana,” ma, “Na enoni, i vi, vi ngaia ki na kariana na Araha, ki tuguhia, i murisigegi na tasi.”

²⁰I rarona na ruma raha ka oga igê na ataka mavê na marâ, ga ngêngê igê: tani ka tagarahigi renia na siliva ma na golo; ma tani ka tagarahigi renia na apinige ma na mako; tani ka nakagi vê tangagi na tangiani raha, ma tani ka ngêngê igê i na ara ni tangiani.

²¹Manga vi na enoni, ma ki manuhia marena ki matarotaro tenigi na marâ era ngegana, ngaia ki manga na apira na golo se na siliva, i nanê tare tanga God. Ngaia ki na kariana koro na Araha, ma ki nanê tare tangagi na ara ni tagaraha koro, na Araha i bonasia renigi.

²²Go hinarugi na teniha era iata na enoni haoru. Gu uhungia nga, ko ototo i maana God, ma i maata na enoni. Go ama ni tongesuria nga o Kirisito. Ko ama ni takusira nga na enoni getera. Ko haritagi. Ko katokato vikana henira na enoni, ga avarasia maninga na Araha.

²³Ma ko hinarugi na tamasinga ga bekabekaga ma ka bonobonoga. Igo ko bani giraragi na tamasinga ngegana, ka katora na enoni, ka hemangari.

²⁴Na kariana na Araha ki tuguhia, siana ki bagamangamangariaga. Ki tuguhia, i korokoro hete tangara na enoni hato, ma ki tuguhia, i voravora re na mane ni hagesuringa, i korokoro ma ki piringiape,

²⁵ma ki haritagi, ki hagaotora na enoni, matena ga rêrapusia. Vari God ki page vatera, ka urisi parongata, hanana ga girara na monariha.

²⁶Manga ngekana, ngaira ka page takotako koro aporo, ma ka page taratara tenia na tu iana Satana, i bani tura, ma ki bani katora, ka tê viteana.