Read Kahua 2 TIMOTI 3 Bible Online

2 TIMOTI 3 - Kahua bible

2 TIMOTI 3

¹Go takusigi maninga na marâ igê: igê na hagahatungina na maveta ka page voravora me na tangiani ni mamasiaganiha.

²Renia na enoni ka page hemasesi, ka page vanasigi na haga, ka page ruhira na enoni, ma ka page paroparo. Ngaira ka page guhaguha, ma ka page guguruga tangara na enata. Ka page era na obata, ma ka page arâ suri barisuta mareta ma.

³Ngaira ki asa vige page hekomaniheri, ma ki asa, vi ge page takotako rugu. Ngaira ka page tamasi erasira na enoni ma ka page heariha ramo tare. Ngaira ka page kikitenigi na marâ koro.

⁴Ngaira ka page hakuhaku mara pageva. Ngaira ka page hagareke tara, ma ka page hagaerasira mareta, renia ga paroparo. Ngaira ka page arâ surigi na teniha iata mareta, mareha vi God hete.

⁵Ngaira ka page rotu hagaparu ma, ma igê na mêrihata ngaira ka page kitenia na rotu monari. Go hinarura na mane ngegana.

⁶Tani na hitangita ka arâ i pasita na enoni, ma ka hagatora parerera na gete, ga bonobonoga, ga hataera renigi na tasi iata ma na teniha era, ga marungira.

⁷Na gete ngegana ka uhungia tare, vi ga hagesuringenia na monariha, ma ki asa iata, vi ge râ suria na monariha.

⁸Tagenana ma mangarerua o Jane mo Jabere garu urapusia o Moise, na mane ngegana ka pe girara, vi ge takotako bâkoro, ma ka erasia na tongesuriha.

⁹Ma ki page meme na tauhata, suria na enoni hato ka page girarara, vi ngaira ka bekabekaga. Na tarana ngekana ki bani vora me tangarerua o Jane mo Jabere nikâ.

¹⁰Ma igo ko bani râ suria na hagesuringa iaku, ma suria na parongaku, ma suria na katoha iaku tanga na mêrihaku. Igo ko bani bâsigi na tongesuriha iaku, na marapeha iaku, na hetakuiha iaku, ma na togeaganiha iaku.

¹¹Igo ko bani girara, vi manga i he na enoni ka bani merongasiê, ma ka hagamamasiagê. Igo ko bani giraragi na ara ni marâ hato, ga tarahuê i Antioko, ma i Ikonio, ma i Lisitara. Na enoni i ngekana ka merongasiê bâraha. Ma na Araha ki hagatahiê tenigi na tarani hato ngegana.

¹²I monari, ga page merongasira na ara ni enoni, ga obania, vi ga mauri bâkoro, ma ka ototo i maana God, ma ka obâbahaku henia o Kirisito Jesu.

¹³Na mane era ma na enoni ni hagaparunga ka page era tare, mataro me ka era ngavê. Ngaira ka page hagaparura na enoni getera, ma ngaira so mareta.

¹⁴Ma igo, ki tuguhigo, vigo taua gatagata tare na hagesuringa monari, ga bani hagesurigo renia. Ma ki tuguhigo, vigo nganganihaga igê na tongesuriha, suria igo ko bani girarara na ani, ga bani hagesurigo renia.

¹⁵Ma ki haganega me tenia na matena go sisite, igo ko bani girara na Buka Apuna. Ma na Buka Apuna ki girara i vatego na takotako koro, i bêngenigo tanga na tahinga, manga vi go tongesuria o Kirisito Jesu.

¹⁶Suria God ki angarira na enoni, matena ga segea na Buka Apuna. Ma na Buka Apu ki koro tanga ga hagesurira na enoni renia na monariha, tanga ga rêrapusigi na hagesuringa hagaparu, tanga ga hagaotora na enoni, ga râ tasi, ma tanga ga hagesurira na enoni, hanana ga paronga koro ma ka ototo.

¹⁷Tahema na mane, i tagara tanga God, ki giraragi bâkoro na ara ni marâ tanga na tagaraha iana, ma ki girara bâkoro i tanugi na ani mavê na tagaraha koro.