Read Kahua TITO 3 Bible Online

TITO 3 - Kahua bible

TITO 3

¹Go hagatakusira na kariamu, vi i tuguhira, viga rongogi na viteata na maneraha ma na enoni, ga araha. I tuguhira, viga têtê viteata, ma ka agana, ka tanugi na ara ni tarani ga koro.

²Go vi tangara, siana ka tamasi erasia ta na enoni, ma ka haritagi hete, ka takotako rugu, ma ka korokoro tangara na enoni hato.

³Suria i nago igia nogaka ka bagatatako, ga guguruga, ma ka tasitasi. Na ataka ma vê na teniha era ma na vagevageha bera ka marungigia nogaka i nago. Igê na ogaha iaka i nago igia ka bagaparongaka, ma ka hengari. Na enoni getera ka kitenigia, ma igia ka kitenira nogaka.

⁴Ma i hemuri ki râ me na korohana ma na takuiha iana God, na Hagamauri iaka.

⁵Ma ngaia ki hagatahigia. Ngaia ki kato vikana, mareha vi suria igia mareka ka bani katogi na tarani koro, ma suria hete ngaia ki takuigia. Ngaia ki hagatahigia renia na Higona Apu, i vategia, ka vora me haoru, ma ka nahunia na mauriha haoru renia na manuha apuna.

⁶Suria God ki vategia nga na Higona Apu renia o Jesu Kirisito, na Hagamauri iaka,

⁷hanana igia ka korokoro ma ka ototo i maana God renia na korohana, ma ka nahunia na mauriha mora ma tarema, igia ga naasia.

⁸Na tarani ngegana ka monari ngavê. Inê kê obanigo, vigo togotogo tare igê na tarani ngegana, hanana na enoni, ga tongesuria God, ka uhungia nga, ka tanugi tare na tagaraha koro. Na tarani ngegana ka koro, ma ka tamanira na enoni.

⁹Siana kamu hetamasi purua ma renigi na marâ bekabekaga, se vi renigi na atata na raraha iata na êvarita na enoni. Siana kamu hekorekore, ma siana kamu hetuguri renigi na Ramata i na Buka Apuna. Na tarani ngegana ka pe tamanira na enoni. Ngaigi ka na tarani bekabekaga ma.

¹⁰Go kanukanua hagerua na mane, i katogi na vogasiha, ma i hemuri ko naka vê marena.

¹¹Renia igo ko bani girara, vi na enoni ngekana ki era ngavê, ma na bagatarihana ki hagabângenia, vi ngaia ki tasi.

¹²Matena gê hagatorangenia o Aretema se o Tigiko tangago, go uhungia nga, ko arâ me tangê i hinua i Nikopoli, suria inê kê girara vi igê na matena na roraroga ahuru, inê kê page gâga i ngekana.

¹³Go uhungia nga, ko tamanirerua o Sena, na mane ni hagesuringa renigi na ramata, mo Apolo, hanana garu haganega na râha iaterua, ma ko girararerua, hanana garu nahunigi na ara ni marâ, garu obanigi.

¹⁴Go hagesurira na kariaka, hanana ga tanugi na tagaraha koro, hanana ga nahunigi na marâ, ga obanigi, vi ga mauri renigi. Siana ka gâga purua ma.

¹⁵Igami hato ikê kami visia “Mauru Koro” tangago. Go hagarongora na goaka igê na tongesuriha, vi igami kami visia “Mauru Koro” tangara. Inê kê nungia God, ke korokoro tangagamu hato.