Read Kahua PILEMONE 1 Bible Online

PILEMONE 1 - Kahua bible

PILEMONE 1

¹Igamirua Paulo mo Timoti, na goaka igê na tongesuri. Inê Paulo kê oga i ruma ni hagaitangiha, renia gê tagara tanga o Kirisito Jesu. Inê be sege tangago, o Pilemone, na tamamami koro igê na tagaraha iamami,

²ma tanga na haku na enoni, ga tongesuri, ga rotu haku i pasimu, ma tanga ka Apia, na goaka igê na tongesuriha, ma tanga o Agiripa, i tagara bâraha henigia.

³Inê kê nunginungi, hanana God Vaemaka ma na Araha o Jesu Kirisito karu korokoro tangagamu, ma karu vategamu na marapeha.

⁴Pilemone koro, na ara ni matena gê nunginungi, inê kê takusigo tare, ma kê visia koro God iaka renigo.

⁵Renia inê kê rongoa, vi igo ko takuira bâraha na kare hato iana God, ma ko tongesuria gatagata na Araha o Jesu.

⁶Igia ka obahaku, suria igia ka tongesuria o Kirisito Jesu, ma inê kê nunginungi, hanana na tarana ngekê ke hagagiraragia ngavê renigi na ara ni marâ koro, igia ga girara, ga tanugi tanga o Kirisito.

⁷Na hetakuiha iamu, tamaku koro, ki hagakoro obaku bâraha, ma ki nganinganiê, suria igo ko hagakoro obata na kare hato iana God.

⁸Tahema, henaka inê kê nahunia ramoha, hanana vi ve bonasigo renia na marâ, i tuguhigo, renia igia ka tongesuria o Kirisito, ma inê kê pe obania, vi ve katokato vikana.

⁹Ma ki suria inê kê takuigo, tahema inê kê nungigo ma. Inê kê kato vikana, henaka vi inê o Paulo, ka na urusina o Kirisito Jesu. Ma i ngekê inê kê oga i ruma ni hagaitangiha, suria gê tarohenia.

¹⁰Manga ngekê, inê kê nungia ta na marâ suria o Onesimo tenigo, renia o Onesimo ki manga na kareku, suria i tongesuria o Kirisito, ma inê kê manga na vaemana, suria, matena gê oga i ruma ni hagaitangiha, inê kê hagesuria renia na tongesuriha.

¹¹I nago ngaia ki pe tamanigo, ma i ngekê ngaia ki kahu tamanigerua, igo menê.

¹²I ngekê inê kê hagatorangenia aporo vê tangago, ma kê angisia.

¹³Inê kê obania, manga vi ge oga so ma heniê ikê, matena gê oga i ruma ni hagaitangiha, suria gê tarohenia na taroha koro, hanana vi ge tamaniê urusigo.

¹⁴Ma inê kê pe obania, vi ve bonasigo, ku tamaniê. Inê kê obanigo hete, vi go katokato, manga vi igo maremu hete ko obania. Tahema be katoa ma na tarana go obaniê, vi gê tanua.

¹⁵Vari o Onesimo ki pe oga henigo suria râ ma vi na kere matena abubu, hanana vi ge oga henigo tare hete.

¹⁶Renia i ngekê ngaia ki pe vora renia ma vi na kare vurivuri iamu, ma ki vora renia nikâ hete na goamu hetakui, suria ngaia ki tongesuria o Kirisito manga igo. Inê kê takuia bâraha, ma igo ko takuia ngavê, renia ngaia ki na kare vurivuri iamu, ma nikâ ki na goamu, suria ngaia ki tongesuria na Araha manga igo!

¹⁷Suria igo ko visiê, vi na tamamu, tahema go unia aporo banu i pasimu, tagenana manga vi go uniê banu inê i pasimu.

¹⁸Manga vi ngaia, ma ki erasigo, se i hagaba tenigo, go vivi tangê, kê barua vê tangago.

¹⁹Hoi, i ngekê be segea renia na rimaku mareku be sege vikê: Inê, Paulo, be barua vê tangago! (I pe arari, vi ve visia vê, igo ko bani girara, igo ko hagaba tangê renia na mêriha haoru na tongesuriha iamu.)

²⁰Tahema, goaku igê na tongesuriha, go takuiê, ma ko korokoro tangê, manga hanana i marisimu, suria go tongesuria na Araha. Go hagakoro obaku igê na tarana, i ararigo, suria go tongesuria o Kirisito manga inê.

²¹Matena gê segea na marâ ngekê, inê kê bani girara, vi igo ko page katoa na marâ, gê nungia tenigo, ma kê bani girara nikâ, vi igo ko page katoa na marâ, i teharia na marâ, gê nungia tenigo.

²²Ma ta na marâ nikâ: go girara, ki nanê na kiboru tangê, renia inê kê hinarua, vi God ki page aganarigi na nunginungiha iami hato, ma ki page hagamarumungeniê, kê vatugigamu vê nikâ.

²³O Epaparasi ki oga heniê i ruma ni hagaitangiha, renia i tarohenia o Kirisito Jesu, ngaia ki vi “Mauru Koro” tangagamu,

²⁴ma nikâ o Mareko, mo Arisitako, mo Temasi, mo Luka, na tamaku igê na tagaraha.

²⁵Inê kê nungia na Araha o Jesu Kirisito, ke korokoro tangagamu hato.