Read Kahua HEBEREO 10 Bible Online

HEBEREO 10 - Kahua bible

HEBEREO 10

¹Na Ramata iata na Siu ka na nununi ma, se na mamarugani ma na marâ, ga monari. Ngaira ka pe katogi, ke rongo mataha na marâ, ga koro, ga page arâ me. Igê na ara ni harisi, ki bê ki arâ, ka tagarenigi na vogasiha, ga tagenani ma. Manga i he renigi na vogasiha ngegana na Ramata ka girara, ga katora na enoni, ga rahesia God, ka korokoro teha?

²Manga vi na enoni, ga rahesia God, ma ka matarotaro ngavê tenigi na tasi, ngaira ki asa iata, ge takusia, vi na tasi ki gâga mênga i pasita i murina na vogasiha, i hagetage togo ma. Tahema na ara ni vogasiha ka hatohato.

³Bâ, na vogasiha ka na marâ tanga ga hagatakusira na enoni renigi na tasi iata, i na ara ni harisi, ki bê ki arâ.

⁴Na gaputa na puruka ma na goti ki asa ngavê, vi ge tananigi râ na tasi.

⁵Tahema, matena o Kirisito ki sugia ma, vi ge arâ me i maveta, ngaia ki vi tanga God, ki vi: “Igo ko pe obanigi na vogasiha ma na votovoto, ma ko hagarêa hete na apeku.

⁶Igo ko pe vagevage renigi na vogasiha ni puruka, ga sungigi hagenani igê na bea ni vogasiha. Igo ko pe vagevage renigi na vogasiha renigi na ani mavê na marâ, ga tagarenigi tanga na bonoteniha ni tasi.

⁷Tahema inê kê vi, ‘God, inê ikê, hanana gê katoa na obaniha iamu, manga ga bani sege reniê igê na Buka ni Ramata.’”

⁸Hagenago ngaia ki vi: “Igo ko pe obanigi, ma ko pe vagevage renigi na vogasiha ma na votovoto, se na vogasiha ni puruka, ga sungigi igê na bea ni vogasiha, ma na vogasiha renigi na ani mavê na marâ, ga tagarenigi tanga na bonoteniha ni tasi.” Ngaia ki tamasi vikana, henaka vi na enoni ka tagarenigi na vogasiha hato ngegana suria na Ramata igê na Buka Apuna.

⁹Ma hemuri ngaia ki vi: “God, inê ikê, hanana gê katoa na obaniha iamu.” Tahema God ki hatungigi vê na ara ni bani vogasiha, ma ki urusigi renia na vogasiha iana o Kirisito.

¹⁰Renia o Jesu Kirisito ki katoa na obaniha iana God, tahema igia hato ka matarotaro ngavê tenigi na tasi, suria ngaia ki vogasi renia na apena ngaia so marena manga na vogasiha hagetage togo ma.

¹¹Na ara ni mane ni vogasiha iata na Siu ki rêra haraga, matena i katogi na tagaraha iana i na ara ni tangiani, ma ki tagarenigi na vogasiha, ga hetagenani ma, hagarako, ma na vogasiha ngegana ki asa hagetage, vi ge tananigi râ na tasi.

¹²Bâ, o Kirisito ki tagarenia na vogasiha gi tage togo ma tanga na bonoteniha ni tasi. Na vogasiha ngekana ki korokoro tare, ki bê ki arâ. Ma hemuri ngaia ki gâga so henia God igê na atohana na Araha.

¹³I ngekana ngaia ki gâga karia na matena, God i page katora igê na merongana, ka voravora re na êguga iana.

¹⁴Hoi, renia na vogasiha gi tage togo ma ngaia ki bani katora na enoni, ga matarotaro tenigi na tasi, ka koro teha ngavê tare ma tarema.

¹⁵Ma na Higona Apu ki tamasi mataha tangagia nikâ. Hagenago ngaia ki vi:

¹⁶“Hoi, na Araha ki vi, ‘Na suruheri, gê page naka henira i na matena i muri me, ki manga ikê: Inê be nakagi na ramata iaku igê na aitangihata, ma be segegi i obata.’”

¹⁷Ma hemuri ngaia ki vi, “Inê be bonotenigi na tasi iata ma na parongata era.”

¹⁸Manga ngekê, manga vi na tasi, ma ka hatohato, na vogasiha tanga na bonoteniha ni tasi ki hatohato nikâ.

¹⁹Hoi, goaku igê na tongesuriha, renia na mera iana o Jesu igia ka asitatara ngavê, hanana vi ga bêbanu igê na Agua Apuna Ngavê.

²⁰Ngaia ki tangahia tangagia na tara haoru tanga na mauriha, suria ngaia ki banu igê na gahu i ruma ni rotu, i vivi igê na apena.

²¹Na mane ni vogasiha iaka, i bâsuria na ruma iana God, ngaia ki raha teha.

²²Hoi, ga guruguru hagarangia God, matena ga nganganihaga igê na monariha ma na tongesuriha, ma ka matarotaro tenigi na tasi, ga bani tananigi râ, ma ka bani mamanu igê na ve marava.

²³Ga taugi gatagata na marâ, ga naasigi, ma ka tongesurigi, suria igia ka girara, ga hagêguritogo renia God, i hagamonaria tare na suruha iana.

²⁴Ga heanumasige heri, ka hetamaniheri, hanana ga hagabângenigi na hetakuiha ma na tagaraha koro.

²⁵Igia, siana ka naka vê na tarana, ga hakuhaku igê, mangara tani na enoni. Ga kanukanugia heri, tare, igê na matena i ngekê nga hete, matena mu bâsia, i hagarangi me noga na Tangiana iana na Araha.

²⁶Manga vi igia, ma ke bani girara na monariha renia God, ma ke ama ni tasitasi nga, ma ke girara, vi igia ke tasi, ki mareha ngavê vi ta na vogasiha, hanana vi ge girara, ge tananigi râ na tasi.

²⁷I gâga ma hete na maguha renia na marâ, i page voravora me: na Suriha Raha ma na anguruna na gi, ga page erasira ngavê na enoni, ga urapusia God!

²⁸Na enoni, i aharê igê na Ramata iana o Moise, ka nahuia ki meme, manga vi na vererua, se vi na vera oru, ma ka hagatanga monari renia, ma ki asa hagetage, vi ge takia.

²⁹Hoi, ma ki tanu hega na mane, i ruhia o Karena God, kani pe hagahigasia na gapu na suruheri, God i tanania ki matarotaro renia, i tamasi erasia na Higona Apu, i votoa na koroha? Mu takotako maninga: na hagaitangiha, i araria, ki era ngavê.

³⁰Renia igia ka bani girara na ani, i vi, “Inê kê page naka na siva. Inê kê page barua.” Ma ngaia ki vi nikâ, ki vi, “Na Araha God ki page surira ma ki page hagaitangira na kariana.”

³¹E, i ama ni era ngavê tangago, manga vi God mamauri, ma ki hagaitangigo!

³²Mu takusia aporo na bevoana i nago, matena God i mavesigi moramora igê na aitangihami ma kamu hatamigi bâraha na mamasiaganiha. Ma ki henaka i manga ngekana, ma igamu kamu pe koke.

³³Tani na mateni ka guharigamu i maata na enoni, ma ka katogamu bera. Ma tani na mateni mu takira na tamami, ga katora bera igê na tarana ngekana.

³⁴Igamu kamu mamasiaga henira na tamami, ga oga i ruma ni hagaitangiha, ma na matena ga tavogi râ hato tenigamu na nahuninga iami, igamu kamu obâbakoro ma renigi, suria mu bani girara, vi igamu kamu nahunia mênga ta na marâ tangagamu maremi, i koro teha ngavê, ma ki gâga tare ma tare ma.

³⁵Siana kamu makumakusiga, suria na mena, i tâ tangagamu, ki raha teha.

³⁶I tuguhigamu, vi gamu piringiape, hanana mu katoa na obaniha iana God, ma kamu taugi na marâ, i surugi.

³⁷Renia na Buka Apuna ki vi: “Na kere matena abubu ki gâga mênga, ma na ani, ga naasia, ki page arâ me. Ngaia ki asa, vi ge hagarihu.

³⁸Na kariaku, ga koro ma ka oto i maaku, ngaira ka page mauri, manga vi ga hagêguritogo reniê. Ma ki manga ta na hitangita, ma ki murisigeê, ngaia ki asa, vi ge hagakoro obaku.”

³⁹Igia ka pe mangara na tamata na enoni, ga aharo getera ma ka pe tahi. Ma igia hete ka na tamata na enoni, ga tongesuri ma ki tahi.