Read Kahua HEBEREO 13 Bible Online

HEBEREO 13 - Kahua bible

HEBEREO 13

¹Mu ama ni hetakuiheri nga, manga hanana i marisimi vi na ahegoata, mu obahaku henia o Kirisito.

²Mu unira banu i pasimi na mahuara. Tani ka bani kato vikana, ma ka unira banu na angelo, ma ngaira ka pe girara, vi ngaira ka na angelo.

³Mu takusira na ani, ga oga i ruma ni hagaitangiha, ge vora re, vi igamu ma kamu oga henira. Mu takusira na enoni, ga hatamigi na mamasiaganiha, ge vora re, vi igamu ma kamu hatamigi na mamasiaganiha henira.

⁴Na enoni hato ki tuguhira, viga hanetasia na êragiha, ma na ara ni arua ki tuguhira, viga tototo surira heri. God ki page surira ki hagaitangira na ani, ga paronga iera, ma na ani, ga gamogamo.

⁵Siana na vanasiha ni haga ki marungigamu. Ma ka togâni hete na aitangihami na marâ, mu nahunigi. Suria God ki bani vi, “Inê ki asa, vi ve nakagamu vê. Inê ki asa, vi ve panigamu.”

⁶Hoi, ge ramo, ke vi, “Na Araha ki tamaniê. I asa, be magu! I asa na enoni, vi ge erasiê.”

⁷Mu takusira na maneraha iami i nago, ga tarohenia na taroha iana God tangagamu. Mu takusia aporo, vi manga i he kani ngaira ga mauri, ma ka me, ma kamu amaka surira igê na tongesuriha iata.

⁸O Jesu Kirisito ki tagenana tare, i na nora, i rikini, i gomaha, ma tare ma tarema.

⁹Siana ka hagabekasigamu, ma ka hagatasigamu na hagesuringa, na ani ga tora getigi, ma ka rongo hihitaga. I monari, na korohana ma na hetamaniha nga iana God ka hagagatagatanigi na aitangihaka, mareha suria vi igia ka râ surigi na ramata renigi na ngêra. Na enoni, ga râ surigi na ramata ngegana, ngaira ka pe tarahaua na hetamaniha tenigi.

¹⁰Na mane ni vogasiha ga tagara i ruma ni rotu iata na Siu, ki apu tangara, vi ge ngaua na vogasiha igê na bea ni vogasiha iaka.

¹¹Na mane ni vogasiha iata na Siu i teha ki migibanu na gaputa na puruka igê na Kiboru Apuna Ngavê, hanana i tagarenia manga na vogasiha tanga na bonoteniha ni tasi. Ma na gahuata na puruka, se na sipi ga sungigi i na apanena hura na hinua.

¹²Tahema o Jesu nikâ ki me i metara na maa ni para na hinua, hanana renia na gapuna marena ngaia ki tananira na enoni tenigi na tasi.

¹³Hoi, nikâ, ge râ i pasina i metara na hinua, ma ke mamasiaga henia.

¹⁴Renia ikê i maveta igia ka pe nahunia rârâ na agua, i girara i gâga tare; ma ka garia hete na agua, na ani i page voravora me.

¹⁵Hoi, ga visia raha God tare, suria na tarana ngekê ki na vogasiha iaka renia o Jesu tanga God. Ge visia koro tare God igê na ringeka raha.

¹⁶I tuguhigamu, mu korokoro tangara na enoni, ma kamu hetamaniheri, suria na tarani ngegana ka na vogasiha, ga hagakoro obana God.

¹⁷Mu têtê viteata na maneraha iami, ma kamu arâ surigi na tamasinga iata. Ngaira ka marupegamu tare, igê na tangiani ma na bungiani, renia God ki page surira meni na tagaraha iata. Manga igamu, ma kamu têtê viteata, ngaira ka obâbakoro renigi na tagaraha iata. Ma ki manga i mareha, ngaira ka page oba era renigi, ma na tarana ngekana ki pe tamanigamu.

¹⁸Mu ama ni nungia nga God tangagami. Igami kami bani girara, vi igami kami koro i maana God, renia igami kami uhungia tare, kami katogi na marâ, ga oto.

¹⁹Inê kê nungigamu ngavê, hanana mu nungia God, ki hagatorangeniê aporo me tangagamu rêrê ma.

²⁰Tenira na enoni, ga me, God ki bani hagamêria aporo na Araha iaka o Jesu, ki vora na maneraha ngavê, i bâsurira na sipi renia na mera iana, i hagagatagatania na suruheri, i gâga hagahu.

²¹Inê kê nungia God, i votoa na marapeha, ki vategamu na ara ni marâ koro hato, mu obanigi, hanana mu arâ suria na obaniha iana. Ma kê nungia nikâ, ki katogia renia o Jesu Kirisito, hanana ga hagakoro obana. Ka visia raha o Kirisito tare ma tarema. Monari.

²²Goaku igê na tongesuriha, inê kê nungigamu nga, kamu piringiape, matena mu karinga na taroha ngekê, na taroha gê obania, vi gê kanukanugamu renia. Renia na leta ngekê, gê segea tangagamu, ki pe borahu ngavê.

²³Inê be hagarongogamu renia o Timoti, na goaka igê na tongesuriha. Ngaia ka bani kasia hura tenia na ruma ni hagaitangiha. Manga vi arâ me rêrê, inê kê page merâ, matena gê vatugigamu igê.

²⁴Visia “Mauru Koro” tangara na maneraha hato iami, ma tangara hato na kariana God. Na goami igê na tongesuriha i Itali ka visia “Mauru Koro” tangagamu.

²⁵Inê kê nungia God, ki korokoro tangamu hato.