Read Kahua HEBEREO 2 Bible Online

HEBEREO 2 - Kahua bible

HEBEREO 2

¹Tahema i tuguhigia, vi ga taua gatagata ngavê na taroha monari, ga bani rongoa, hanana siana ka ahaharê.

²Na taroha, na angelo ka torea me tenia God, ki tuguhira na enoni hato. Tahema na ara ni enoni, ga pe arâ suria, se ga aharê igê, ki tarahura na hagaitangiha, na ani i ararira.

³Manga i he igia ka girara, vi ga tahitahi tenigi na hagaitangiha, manga vi igia ma ka pe karinga maninga na taroha na tahinga, na ani i teha ngekana? Na Araha ngaia marena ki haganega ki tarohenia na tahinga ngekana, ma na ani, ga rongoa, ka hagatarêngenia tangagia, ma ka hagatanga monari renia, vi i monari.

⁴Ma henira na enoni ngegana God ki hagatanga monari nikâ renia na tahinga ngekana, suria i hagabângenigi na raramohana, na tagaraha raha, ma rako na ani getigi na mena. Ma nikâ ngaia ki votongenigi na votovoto iana na Higona Apu suria na katoha iana.

⁵Igami kami tamasi renia na ani i muri me na maveta. God ki pe kasira na angelo, hanana vi ga marungia na maveta ngekana.

⁶Ma i tagua igê na Buka Apuna, ki vi: “God, na ta ki na enoni? Suria igo ko takusia. Na ta ki na enoni? Suria igo ko marupea.

⁷Igo ko katoa, ki pe raha teharira na angelo igê na kere matena abubu. Igo ko kasia akê, ma ko vatea re na raramohana, ki araha.

⁸Ma ko katoa, ki marungira na ara ni marâ hato.” I vi, vi God ki katoa na enoni, “Ki marungira na ara ni marâ hato.” I vi, vi na ara ni marâ hato, ma ki mareha vi ge tihia ta na marâ. Ma igia ka pe bâsia na enoni, vi ge marungira na ara ni marâ hato i ngekê.

⁹Igia ka bâsia ma hete o Jesu! Suria na kere matena abubu ngaia ki pe raha teharira na angelo. Ma God ki kasia akê, ma ki vatea re na raramohana, ki araha, i ngekê, suria ngaia ki me. God igê na korohana, ngaia ki kato vikana, hanana vi o Jesu ki hagatahira na enoni hato renia na mera iana.

¹⁰God ki hagavorara, ma ki têra na ara ni marâ hato, ka oga tanga ngaia marena. Ma ki oto tanga God, vi katoa o Jesu, ki korokoro teha ngavê renigi na mamasiaganiha, hanana i merabanu rako na kariana God igê na arahanga iana i pasina God. Renia o Jesu ngaia ki na ani, i bêngenira tanga na tahinga.

¹¹Ngaia ki tananira na enoni tenigi na tasi iata. Ma ngaia ma na ani, i katora ka matarotaro, ngaira hato ka nahunia o Vaemata gi tage togo ma. Tahema o Jesu ki pe maki, vi ge visira, vi na goana.

¹²Suria ngaia ki vi, “God, inê be tarohenigo tangara na goaku. Inê be kiki tangago henira na enoni hato, ga rahesigo.”

¹³Ngaia ki vi nikâ, “Inê be hagêguritogo renia God.” Ma ki vi nikâ, “Inê akê henira na kare, God i bani vateê renira.”

¹⁴Hoi, suria na kare, i visira, ngaira ka na enoni monari, ga tonga na hasigota ma na gaputa, o Jesu marena ki vora enoni mangara ngaira. Ngaia ki kato vikana, hanana vi renia na mera iana ngaia ki hagaerasia hagatage Satana, i araha tanga na mera,

¹⁵ma hanana i rupasira na enoni, ga vora re na kare vurivuri iana na mera igê na mêrihata hagenani, suria ngaira ka magutenia na mera.

¹⁶I rongo mataha, vi ngaia ki pe tamanira na angelo. Ma na Buka Apuna ki vi hete, “Ngaia ki tamanira na raraha iana o Abaramo.”

¹⁷Tahema ki tuguhia, vi voravora mangara na goana igê na ara ni tarani, hanana i tagara tanga God manga na mane ni vogasiha i teha i takuira na enoni, ma ka hagêguritogo renia, hanana i kasikasi meni na tasi iata.

¹⁸Ma i ngekê ngaia ki girara, i tamanira na enoni, i tarahura na heuhungiha, suria ngaia marena ki bani hatamigi na heuhungiha ma na mamasiaganiha.