Read Kahua HEBEREO 3 Bible Online

HEBEREO 3 - Kahua bible

HEBEREO 3

¹Goaku igê na tongesuriha, God ki bani ategamu nogami, ma ki bani unigamu tanga na mêriha mora i pasina. Mu takusia o Jesu. God ki hagatora, ki mane ni vogasiha i teha igê na rotu iaka.

²Renia ngaia ki têa bâkoro tare na viteana God, i hagatora, tagenana manga o Moise i têa bâkoro tare na viteana God igê na tagaraha iana igê na ruma hagenani iana God.

³Na mane, i torea na ruma, ka visia raha teharia na ruma, i torea. I tagenana ma ga visia raha o Jesu teharia o Moise.

⁴I monari, na ara ni ruma na enoni ka tagarahigi, ma God ki na ani, i tagarahigi na ara ni marâ hato.

⁵Mo Moise ki têa bâkoro tare na viteana God igê na tagaraha iana igê na ruma hagenani iana God. Ngaia ki na kariana igê, ma ki hagananê renigi na marâ, God i page visigi.

⁶Mo Kirisito ki têa bâkoro tare na viteana God, suria ngaia ki no Karena, i araha igê na ruma iana o Vaemana. Igia nga ka na ruma iana, manga vi igia, ma ka ama ni ramoramo nga, ma ka ama ni hagêguritogo nga renigi na marâ, ga naasigi.

⁷Hoi, na Higona Apu ki tamasi vikê: “Mu rongoa nga na tamasinga iana God i na tangiana i ngekê.

⁸Siana ka pungupungu na bêmi, manga i nago mu urapusia God, matena mu oga igê na bagamasusu raha ma kamu uhungia igê.

⁹Suria God ki vi, ‘I ngekana na êvarimi ka uhungiê ma ka rapasiê, henaka vi ngaira ka bani bâsigi na marâ, gê bani katogi me surigi na harisi tangahuru ge he.

¹⁰Tahema inê kê mangariaga tangara na enoni ngegana, ma kê vi, Na takotako iata ka arâ tasi tare. Ngaira ka pe giraragi na tauhaku.

¹¹Inê kê mangariaga, ma kê tohe, kê vi: I asa iata, vi ge page banu me i pasiku, ma ke mamaro heniê!’”

¹²Goaku igê na tongesuriha, mu bâbâ maninga, hanana siana ta na hitangimi ki pania na God mamauri renigi na parongana era, ma ki pe tongesuria.

¹³Hanana siana na tasi ki katoa na hitangimi, ki pungupungu na bêna, ma ki tuguhigamu hete, mu hetamaniheri i na ara ni tangiani suria na matena, igia ga nahunia mênga igê na “tangiana i ngekê”, na Buka Apuna i tamasi renia.

¹⁴Manga vi igia hato, ma ka obâbahaku henia o Kirisito, ki tuguhigia, viga ama ni nganganihaga nga igê na tongesuriha manga i nago, matena ga tongesuri moramora, ma ki tuguhigia, siana ka rumakaka.

¹⁵Na Buka Apuna ki vi vikê: “Mu rongoa na tamasinga iana God i na tangiana i ngekê. Siana ka pungupungu na bêmi, manga i nago mu urapusia God.”

¹⁶Ti ki rongoa na tamasinga iana God, ma ki urapusia? Ngaira hato nga nga na enoni, i bêngenira hura o Moise tenia i Esipito surigi na harisi tangahuru ge he.

¹⁷God ki mangariaga tanga ti? Ngaia ki mangariaga tangara na enoni, ga tasi, ma ka aihu ka me igê na bagamasusu.

¹⁸Matena God i tohe, ki vi, “I asa iata, vi ge page banu me i pasiku, ma ke mamaro heniê”, ngaia ki tamasi renia ti? Ngaia ki tamasi renira na enoni, ga urapusia.

¹⁹Hoi, igia ka girara, vi na enoni ki asa, vi ge banu i pasina, suria ngaira ka pe tongesuri.