Read Kahua HEBEREO 4 Bible Online

HEBEREO 4 - Kahua bible

HEBEREO 4

¹Hoi, i monari, na suruha iana God tangagia, vi ga bêbanu i pasina, ma ka mamaro henia, ki gâga mênga henigia. Ga hinaru, hanana siana ka bâbâ tihia ta na hitangimi igê na mamaroha ngekana.

²Suria igia ka bani rongoa na Taroha Koro mangara ngaira. Ngaira ka bani rongoa na taroha, ma ka pe tongesuria.

³Ma igia, igia na ani, ga tongesuria, igia ka page bêbanu, ma ka page mamaro henia God. Renia na Buka Apuna ki vi, “Inê kê mangariaga, ma kê tohe, kê vi: ‘I asa iata, vi ge page banu me i pasiku, ma ke mamaro heniê!’” God ki bani tamasi vikana, henaka i hato na tagaraha iana, haganega me tenia na matena, i hagavora igê na maveta.

⁴I tagua igê na Buka Apuna ki tamasi renia na pita na tangiana, ki vi, “God ki mamaro igê na pita na tangiana tenigi na tagaraha hato iana.”

⁵Ma na Buka Apuna ki vi nikâ: “I asa iata, vi ge page banu me i pasiku, ma ke mamaro heniê!”

⁶Na enoni, ga rongoa hagenago na Taroha Koro, ka pe banu râ i pasina God, ke mamaro henia, suria ngaira ka pe tongesuria. I vi, vi tani na enoni God ki hagamarumungenira, ka banu, ma ka mamaro i pasina.

⁷Tahema, i manga ga bani bâsia, vi God ki naka ta na tangiana getea, ga hêtana vi “Tangiana i ngekê”. Rako na harisi i hemuri me ngaia ki tamasi renia i harana o Tavite igê na tamasinga, igia ka bani rongoa, i vi, “Mu rongoa na tamasinga iana God i na tangiana i ngekê. Siana ka pungupungu na bêmi.”

⁸Manga o Josua, ma ki bêngenira banu na enoni, ka mamaro henia God, God ki asa, vi ge tamasi nikâ i hemuri renia ta na tangiana nikâ.

⁹Tahema na mamaroha ki gâga mênga tangara na kariana God, tagenana ma manga na mamaroha iana God igê na pita na tangiana.

¹⁰Suria na enoni, i bêbanu, ki mamaro henia God, ngaia ki page mamaro tenigi na tagaraha iana marena, tagenana manga God ki mamaro tenigi na tagaraha iana.

¹¹Hoi, ge uhungia nga, ke banu, ma ke mamaro henia God. Siana igia, na hitangika, ki guguruga mangara ngaira, i era ma, ki pe banu mangara ngaira.

¹²Suria na tamasinga iana God ki mauri ma ki tagara. Ngaia ki masi teharia na tatapa, i masi heri. Ngaia ki rete rukarerua na atarona ma na aitangihana na enoni. Ngaia ki rete rukarerua na surina ma na âvovona na surina. Ngaia ki surigi na teniha ma na takotako i obata na enoni.

¹³I asa ngavê ta na marâ, vi ge pinihi tenia God. Ngaia ki bâsigi na ara ni marâ hato. Ma ngaia ki page surigia igia hato.

¹⁴Hoita, ge ama ni têa gatagata nga na tongesuriha iaka. Suria igia ka nahunia na morana na mane ni vogasiha i teha i bani banu i pasina God. Ngaia ki no Jesu, o Karena God.

¹⁵Na mane ni vogasiha iaka i teha ki na ani, i hatahata manga igia, matena igia ka makumakusiga. Renia na mane ni vogasiha iaka i teha ka uhungia nogana igê na ara ni tarani, tagenana manga igia, ma ngaia ki asa, vi ge tasi.

¹⁶Tahema ge ramo, ke râ tanga na atohana God koro hunia. Ma i ngekana igia ka page tarahugi igê na takuiha ma na hetamaniha, suria ngaia ki korokoro tangagia, matena igia ka obania.