Read Kahua HEBEREO 5 Bible Online

HEBEREO 5 - Kahua bible

HEBEREO 5

¹I berarogata na enoni ka atea na ara ni mane ni vogasiha i teha hanana vi urusira na enoni i maana God, hanana i tagarenigi na votovoto ma na vogasiha ni bonoteniha ni tasi.

²Suria ngaia marena nogana ki tasitasi igê na tarani rako mangara na enoni, ngaia ki girara i piringiape henira na enoni, ga bono ani, ma ka tasitasi.

³Ma suria ngaia ki tasitasi, tahema ki tuguhia, i vogasi, mareha vi meni ma na tasi iata na enoni, ma meni nikâ hete na tasi iana marena.

⁴I asa na enoni, vi ge atea marena, vi ngaia ki mane ni vogasiha i teha. God ngaia getea ma ki atea na mane ki mane ni vogasiha i teha, manga i atea o Aroni.

⁵O Kirisito ki manga ngekana nogana. Ngaia ki pe atea so marena, hanana vi ge mane ni vogasiha i teha. Ma God hete kani vi tanga, ki vi, “O Kareku kani igo. I ngekê inê kê aparago.”

⁶I tagua igê na Buka Apuna ngaia ki vi nikâ, “Igo ko page vora re na mane ni vogasiha tare ma tarema, urusina o Melekisiteke.”

⁷Matena o Jesu ki oga i maveta ikê, ngaia ki avarasia God, i girara i hagatahia tenia na mera. Matena i avarasia God, ngaia ki ngerengere raha, ma ki angiangi. Suria ngaia ki haritagi, ma ki tê viteana God, tahema God ki aganarigi na nunginungiha iana.

⁸Ma ki henaka, ngaia ki no Karena God, ma renigi na mamasiaganiha iana ngaia ki hagesuri, hanana i têtê vita.

⁹Matena ngaia ki koro teha igê na tarana ngekê, ngaia ki vora renia na hunana na tahinga tangara na enoni hato, ga tê viteana, ma na tahinga ngekana ki asa, vi ge page hato.

¹⁰Ma God ki kasia, ki vora re na mane ni vogasiha i teha, urusina o Melekisiteke.

¹¹Na marâ rako ka tuguhigami, vi gami visigi renia na tarana ngekê. Ma ki bara, vi gami hagararingenigi tangagamu, suria igamu ki bono na bêmi, hanana vi gamu rongorongo giraragi.

¹²Kere vê ki râ me, ki ararigamu, vi gamu bani vora re na enoni ni hagesuringa. Ma kamu bâ, igamu kamu obania mênga vi ta na enoni ke hagesurigamu renigi na ani hagenago na taroha iana God. Igamu na enoni raha ki marisimi, vi gamu ngêngê na ngêra apini, ma kamu bâ, age, igamu kamu sususu mênga.

¹³Na enoni, i sususu mênga, ngaia ki na kere kare sisite, i bono ani, ma ki pe girara, vi na ta ki koro, se i pe koro.

¹⁴Ma na ngêra apini ki marisita hete na enoni raha. Ngaira ka bani hagatagarahigi na takotako iata. Tahema ngaira ka girara, vi na ta ki koro, ma na ta ki era.