Read Kahua HEBEREO 6 Bible Online

HEBEREO 6 - Kahua bible

HEBEREO 6

¹Hoi, ge naka vê na ani hagenago na taroha iana God, ma ke râ suria na hagesuringa, i ararira na enoni raha. I pe ararigami, vi gami hagesurigamu nikâ renigi na ani, ga râ hagenago na marâ. Suria igamu kamu bani girara, vi i tuguhigamu, vi gamu urisi parongami era, ma kamu tongesuria God.

²Igamu kamu bani girara na hagesuringa renia na batesimo, ma renia na têbuhiana na enoni. Igamu kamu bani hagesuringenia nikâ, vi na enoni, ga me, ka page mauri aporo, ma renia nikâ na suriha, ki asa, vi ge page hato.

³Hoi, nika ge râ nga! Igia ka page katoa na tarana ngekana, manga vi God ma ki hagamarumu.

⁴Suria na enoni ka kasia na tongesuriha, ma ka tasitasi nikâ, tahema ki asa, vi ge katora, ke urusi parongata aporo nikâ. God ki bani mavesigi na aitangihata. God ki bani vatera na votovoto iana, ma na Higona Apu ki angarira.

⁵Ngaira ka bani hatamia na korohana God renia na tarohana, ma ngaira ka bani hatamia na raramohana, i na matena i mamênga me.

⁶Ma kamu bâ, ngaira ka kasia na tongesuriha, ma ka tasitasi nikâ. Ma ki asa, vi ge katora, ke urusi parongata aporo nikâ, suria ngaira ka rapusia nikâ o Karena God igê na kuruse, ma ka hagamakia nikâ i maata na enoni.

⁷God ki hagakoroa na mu, i rangisia tare, ma ki ganora tangara na enoni, ga tagarahia.

⁸Ma igê na mu ga akê ma igê na tone ma na rauga era, ngaia ki na mako era. Ma God ki sugia ma, vi ge hagaerasia, ma ke sungia.

⁹Goaku igê na tongesuriha, henaka vi igami kami tamasi vikana, ma igami kami girara nga, vi na marâ, i koro teha, ki oga tangagamu: ngaia ki na tahinga iami.

¹⁰God ki asa, vi ge pe oto. Ngaia ki asa, vi ge bonotenigi na tagaraha koro, mu katogi tangara na kariana, suria igamu kamu takuia. Ngaira ka na tamami, mu bani tamanira me i nago ma i ngekê, ki bê ki arâ.

¹¹Ma na marâ, igami kami obania ngavê, ki manga ikê: igamu, na ara ni hitangimi, mu ama ni nganganihaga nga, mataro me na hatongina, mataro me na matena mu nahunigi igê na marâ, mu naasigi.

¹²Siana kamu rumakaka, ma kamu amaka surira hete na enoni, ga tongesuri, ma ka piringiape. Manga ngekana, ka girara ga taugi na marâ, God i bani surugi.

¹³Matena God i suru tanga o Abaramo, ngaia ki tohe, hanana vi hagamonaria na suruha iana. Suria ngaia ki teharira na ara ni marâ hato, tahema ngaia ki tohe renia so marena, matena i suru.

¹⁴Ngaia ki vi, “Inê kê suru tangago, vi inê be korokoro tangago, ma be vatego, ka rakorako na raraha iamu.”

¹⁵O Abaramo ki piringiape. Tahema i tarahua na marâ, God i bani surua tanga.

¹⁶Matena na enoni ki tohetohe, ngaia ki tohetohe renia na ani, i raha teharia marena, ma na tohenga ki hatungigi na tamasinga i berarogata na enoni.

¹⁷Tahema God ki hagagatagatania na suruha iana renia na tohenga. Ngaia ki obania, vi na enoni ga page tarahugi na marâ, i surugi tangara, ka girara maninga ngavê, vi ngaia ki asa hagetage, vi ge urusia na katoha iana.

¹⁸God ki katorerua na tarana gi rua: i surusuru, ma ki tohetohe. Ma na tarana gi rua ngegana ki asa, vi ge urusirerua, se vi ge hagaparu renirerua. Tahema na tarana gi rua ngegana karu kanukanugia bâraha, hanana vi ga ama ni naasigi nga na marâ, God i bani surugi tangagia, matena igia ka rukuruku i pasina.

¹⁹Na naasiha ki manga na huna tanga na mêrihaka. Ngaia ki gatagata, ma igia ka takotako togo renia. Ngaia ki banu igê na agua, i apuna ngavê, i pasina God, i murina banu na gahu.

²⁰O Jesu ki bani banu igê renigia, ma ki hagenago taraka. Ngaia ki voravora re na mane ni vogasiha i teha tare ma tarema, urusina o Melekisiteke.