Read Kahua HEBEREO 7 Bible Online

HEBEREO 7 - Kahua bible

HEBEREO 7

¹O Melekisiteke ngekê ki na maneraha i Saleme, ma ki mane ni vogasiha iana God raha teha ma raramohaga hunia. Matena o Abaramo ki aporo me tenia na hearihatana, i nahuira igê na maneraha gi he ka me, o Melekisiteke ki râ vurusia, ma ki nungia God, ki mahata tanga o Abaramo.

²O Abaramo ki vatea na ara ni tangahuruta na marâ, i nahunigi. (Na ata Melekisiteke ki tonga na girarana gi rua. Na ani hagenago ki vi “Maneraha ni otoha i maana God”. Ma na ruata ki vi “Maneraha ni marapeha”, suria i maneraha i Saleme.)

³Igia ka pe girara ngavê ta na marâ renia o vaemana, se vi renia kenana, se vi renira na êvarina. Igia ka pe girara ngavê, vi ngaia ki vora, se i mareha, se vi ngaia ki me, se i mareha. Ngaia ki manga o Karena God: ngaia ki ama ni mane ni vogasiha nga tare ma tarema.

⁴Mu bâ, ngaia ki na mane, i raha teha. O Abaramo, na êvarika hagenago, ki vatea na tangahuruta tenigi na ara ni marâ hato, i henahuraugi.

⁵Na Ramata i na Buka Apuna ka bonasira na raraha iana o Levi, ga mane ni vogasiha viga tavotavo na tangahuruta na marâ tenira na Isiraelita, i vi, vi ga tavotavo tenira na kariata, henaka vi ngaira nogata ka na raraha iana o Abaramo.

⁶O Melekisiteke ki mareha vi na raraha iana o Levi, ma ngaia ki tavo na tangahuruta na marâ tenia o Abaramo, ma ki nungia God, ki mahata tanga o Abaramo, i nahunigi na suruha iana God.

⁷I pe araria, vi ge hagakita: na ani, i mahata, ki teharia na ani, i tavotavo.

⁸Tangara na mane ni vogasiha ga tavotavo na tangahuruta na marâ, ngaira ka na mane, ga me. Ma tanga o Melekisiteke, i tavotavo na tangahuruta na marâ, ngaia ki na ani, i mauri, suria na Buka Apuna ki visia vikana.

⁹Tahema ki araria, viga vivi: matena o Abaramo ki vuria na tangahuruta na marâ, o Levi ma na raraha iana, (ga tavotavo na tangahuruta na marâ), ngaira ka vurivuri nogata.

¹⁰Renia o Levi, i mamênga, vi ge voravora me, matena o Melekisiteke ki râ vurusia o Abaramo, ki vuri nogana, suria o Abaramo, na êvarina, ki urusira na raraha iana marena.

¹¹God ki vatera na Isiraelita na Ramata henira na raraha iana o Levi, ga vora na mane ni vogasiha. Manga na raraha iana o Levi, ga vora re na mane ni vogasiha, ma ka tagara koro ngavê, tanu hega kaniga obania, vi na ani i totora getea râ na mane ni vogasiha vi urusia o Melekisiteke, mareha vi na urusina o Aroni?

¹²Suria manga vi go urusia na mane ni vogasiha renia na ani, i tora getea râ na mane, go urusia nga nikâ na ramata, i râ henia.

¹³Ma na tarani ngegana ka tamasi renia na Araha iaka. Ngaia ki mareha vi na raraha iana o Levi. Na raraha iana ki tora getea, ma ki mareha na hitangita na raraha iana, vi ge vogasi igê na bea ni vogasiha manga na mane ni vogasiha, i vogasi.

¹⁴Igia hato ka bani girara bâkoro, vi ngaia ki na raraha iana o Juta. Ma o Moise ki pe tamasi renia na raraha ngekana, matena i tamasi renira na mane ni vogasiha.

¹⁵Na tarana ngekê ki kahu rongo mataha ngavê, matena igia ka bâsia, i voravora me na mane ni vogasiha, na ani i tora getea, na ani i manga o Melekisiteke.

¹⁶Ngaia ki vora re na mane ni vogasiha, mareha vi surigi na ramata ma na tauha iata na enoni, ma ki vora re na mane ni vogasiha suria hete na raramohana na mauriha, i asa, vi ge page hato.

¹⁷Renia na Buka Apuna ki vi, “Igo ko page voravora re na mane ni vogasiha tare ma tarema, urusina o Melekisiteke.”

¹⁸Na bani ramata ka naka vê, suria i mameaga, ma ki pe tagara koro.

¹⁹Na Ramata iana o Moise ki asa, vi ge katoa ta na marâ, ke koro teha ngavê. Ma i ngekê na naasiha, i koro teharia, ki bani urusia, ma nasiha ngekana ki katogia, ka guru hagarangia God.

²⁰Ma nikâ God ki tohe. Ma ki pe tohe, matena na raraha iana o Levi ka vora re na mane ni vogasiha.

²¹Mo Jesu ngaia ki vora re na mane ni vogasiha, renia God ki tohe, matena i vi, “Inê na Araha kê bani tohe, ma ki asa, vi ve page urusi parongaku. ‘Igo ko page voravora re na mane ni vogasiha tare ma tare ma.’”

²²Renia na tohenga ngekê God ki katoa o Jesu, ki vora re na hagatangamonariha renia na suruheri haoru, i koro teharia ngavê na bani suruheri.

²³Na ani, i tora getea nikâ na marâ, ki manga ikê: na raraha iana o Levi, ga mane ni vogasiha, ka rako, suria ngaira ka heheurisige, suria ga meme.

²⁴Mo Jesu ngaia ki mauri tare ma tarema. Tahema ngaia ki pe hagatarêngenia tanga ta na mane na tagaraha iana manga na mane ni vogasiha.

²⁵Tahema, i ngekê ma tare, ki bê ki arâ ngaia ki girara i hagatahira na enoni, ga guru râ hagarangia God renia ngaia, suria ngaia ki mauri tare, hanana i tamanigia i pasina God.

²⁶Hoita, o Jesu ngaia nga ki na mane ni vogasiha i teha, na ani igia ga obania. Ngaia ki koro, ma ki oto tare i maana God; mareha vi ta na marâ era, se vi na tasi ke oga i pasina. Ngaia ki tora getea tenira na enoni tasi, ma God ki kasia akê, ki araha henia.

²⁷Ngaia ki pe mangara na ani getera na mane ni vogasiha ga teha. Na ani ngegana ki tuguhira, viga tagarenigi na vogasiha, i na ara ni tangiani, ki bê ki arâ, hagenago renigi na tasi iata mareta, ma hemuri renigi na tasi iata na enoni. Ma ngaia ki mareha. Ngaia ki tagarenia na vogasiha gi tage togo ma, ma hagetage togo ma, matena ngaia ki tagarenia marena manga na vogasiha.

²⁸Na Ramata iana o Moise ki atera na mane ni vogasiha ga teha, na mane, ga girara ga tasitasi. Ma renia na tohenga iana, i murina na Ramata, God ki atea o Karena, ki mane ni vogasiha i teha ki gâga tarema, ma ki koro teha igê na ara ni tarani.