Read Kahua HEBEREO 8 Bible Online

HEBEREO 8 - Kahua bible

HEBEREO 8

¹Ikê nga na tarana igia ka tamasi renia: na mane ni vogasiha iaka i teha ki na ani, i oga so henia God, na Araha raha teha, igê na atohana.

²Ngaia ki tagara manga na mane ni vogasiha i teha igê na morana na agua apuna teha ngavê, i vi mareha vi na ruma na gahu, na enoni ga torea, ma na Araha hete.

³Na ara ni mane ni vogasiha ga teha ka atera, hanana ga tagarenigi na votovoto ma na vogasiha tanga God. Tahema na mane ni vogasiha iaka i teha ki tuguhia, i tagarenia nogana ta na marâ.

⁴Manga vi ngaia, ma ke oga i maveta ikê, ngaia ki asa, vi ge vora re na mane ni vogasiha, suria ga oga na mane ni vogasiha, ga tagarenigi na votovoto surigi na Ramata iata na Siu.

⁵Na tagaraha, ga katoa na mane ni vogasiha ngegana, ki na nununa râ ma, ma ki hagamamarugania râ ma na marâ i pasina God. Na marâ ngekana God ki bani visia tanga o Moise, matena i sugi torea na ruma na gahu. Renia God ki vi tanga, ki vi, “Go hagatogo suria, hanana go katogi na ara ni marâ suria na tarana, go bâsia igê na hungana.”

⁶Ma kamu bâ, God ki atea o Jesu tanga na tagaraha manga na mane ni vogasiha. Ma na tagaraha ngekana ki teharia na tagaraha iata na mane ni vogasiha getera, tagenana manga na suruheri haoru, o Jesu i naka i berarogata God ma na enoni, ki koro teharia na bani suruheri, suria i surigi na marâ, ga koro teharigi na marâ i na bani suruheri.

⁷Hoi, manga i mareha ta na marâ, vi ge era igê na ani hagenago na suruheri, tanu hega kani viga obania me nikâ na ruata?

⁸Ma God ki ramonira na kariana, ki vi: “Inê na Araha, kê vi vikê: I page arâ me na bevoana, matena inê kê page naka igê na suruheri haoru, henira na Isiraelita, henira na raraha iana o Juta.

⁹Ngaia ki page totora hegitigi tenia na suruheri, gê bani naka henira na êvarita, matena gê bêngenira hura tenia i Esipito. Ngaira ka pe râ surigi na suruheri, gê nakagi henira. Tahema inê kê pe gagêmaga renira. Inê na Araha kê vi.

¹⁰Hoi, na suruheri, gê page naka henira na Isiraelita i na matena i muri me, ki manga ikê: Inê na Araha kê tamasi, kê vi: Inê be nakagi na ramata iaku igê na aitangihata, ma be segegi i obata. Inê nga ki na God iata, ma ngaira nga ka na kariaku.

¹¹Ma na enoni ki hato, vi ge page hagesuria na tamana so i hinua. Ma ki hato, vi ge page vi tanga na goana, ke vi, ‘Gu hagesuringenia na Araha.’ Suria na ara ni enoni hato ka page aitangisiê, na kare, na enoni purua ma na enoni raha.

¹²Matena ga aharê igê na ramata, inê be hagatogo surira, ma be bonotenigi na tasi iata.”

¹³Suria God ki tamasi renia na suruheri haoru, ngaia ki visia vi na ani hagenago na suruheri ki êvariga, ma na ara ni bani marâ hato ga êvariga, ka page magahuru rêrê.