Read Kahua JAKOBO 2 Bible Online

JAKOBO 2 - Kahua bible

JAKOBO 2

¹Goaku, igamu kamu tongesuria na Araha iaka o Jesu Kirisito, na Araha raramohaga hunia. Siana hagetage ka arâ hegitigi na marâ, mu katogi tangara na enoni, suria tani ka ruruguha, ma tani ka matareha.

²Ata ni vi ma: manga vi na mane gi rua, ma karu râ me igê na ruma ni hekarigiana. Ma ta na hitangiterua ki rêni bâkoro, ma ki tuguni bâkoro. Ma na ruata na mane ki matareha, ma ki tuguni kakaga.

³Vikê igamu kamu hagahigasia bâraha na mane, i tuguni bâkoro, ma kamu vi tanga, kamu vi, “Gu oga so ikê igê na âgâga koro.” Ma tanga na mane, i matareha, kamu vi, “Gu ura ikana”, se, “Oga so i ano hagarangia na atohaku.”

⁴Manga ngekana, igamu kamu tasi, suria mu voasigamu hegitigi so maremi ma na marâ, mu surirerua renia, ki mareha vi oto.

⁵Goaku koro, mu rongo! God ki atera na enoni matareha i maveta, ka ruruguha igê na tongesuriha, ma ka nahunia na Arahanga, God i bani surua tangara na enoni, ga takuia.

⁶Ma kamu ruhira na enoni matareha! O ti kaniga hagamamasiaga apemi ma ka toregamu igê na tamasinga? Na enoni rurugua nogata!

⁷Ngaira ka na ani, ga tamasi erasigi na ata kirisitiano, na ata, God i bani vategamu renigi.

⁸Igamu kamu page paronga oto, manga vi gamu arâ suria na ramata iana na Araha, na ramata mu tarahua igê na Buka Apuna, i vi, “Takuira na enoni getera manga igamu maremi.”

⁹Ma ki manga mu voasira na enoni, suria vi ga bâ hegitigi, igamu kamu tasi, ma na Ramata ki surigamu ki hagaitangigamu, suria igamu kamu aharê igê na ramata.

¹⁰Renia i manga vi na enoni, ma ki henaka i aharê igê na ani gi tage togo ma na ramata, ngaia ki aharêngigi na ramata hato.

¹¹Renia God ki vi, “Siana ko gamogamo”, ma nikâ i vi, “Siana ko nahu enoni.” Henaka vi igamu kamu pe gamogamo vari, igamu kamu aharê igê na ramata, manga vi gamu nahunahu enoni.

¹²Mu tamasi, ma kamu paronga mangara na enoni, i page surira na ramata, na ramata, i rupasira na enoni.

¹³Renia God ki pe takia na enoni, i pe nahunia na hetakiha. Ma na takiha ki teharia na suriha.

¹⁴Goaku! Na ta kani koro tanga na mane, i vivi, “Inê kê nahunia na tongesuriha”, ma ki manga i pe paronga suria na tongesuriha iana? Ki hega, na tongesuriha ngekana ki girara, i hagatahia?

¹⁵Ata ni vi ma: manga vi na goaka, ma ka pe nahunigi na gahu, ma nikâ ga magê.

¹⁶Ma ki hega, mu tamanira vari, igê na matena mu vi tangara, kamu vivi, “Mauru koro! Mu hagesuru, ma kamu ngêngê masu,” manga vi gamu pe vatera na marâ, hanana vi ge mauri renigi?

¹⁷Na tongesuriha ki tagenana ma: manga vi ga pe hagamonaria na tongesuriha igê na tagaraha, na tongesuriha ki meme.

¹⁸Ma ta na enoni ki vivi vari, “Igo ko nahunia na tongesuriha, ma inê kê katogi na tagaraha na tongesuriha.” Menê kê arami, kê vivi, “Manga i he kanigo nahunia na tongesuriha, i mareha henigi na tagaraha? Inê kê hagabâsigo renia na tongesuriha iaku igê na tagaraha iaku.”

¹⁹Mu tongesuria vari vi God ki gi tage togo ma iê? Koro! Satana nikâ ki tongesuriha, ma ki magu, ki tatata.

²⁰Mu bonobonoga! Mu obania vari, vi gamu rongorongogirara na tongesuriha, i mareha henigi na tagaraha, ki na marâ purua ma?

²¹Takusia o Abaramo, na êvarika. Manga i he kani koro ma ki oto i maana God? Surigi na tagaraha iana. Renia ngaia ki vogasi renia o Isako na karena.

²²Mu pe bâsia? Na tongesuriha iana ma na tagaraha iana karu râ haku. Na tongesuriha iana ki voravora koro teha renigi na tagaraha iana.

²³Ma ki monari na tamasinga igê na Buka Apuna, i vi, “O Abaramo ki tongesuria God, ma suria na tongesuriha iana tahema God ki visia, vi ngaia ka na mane koro.” Ma God ki visia, ki vi: “Goaku Abaramo.”

²⁴Hoita, mu bâsia, na enoni ki korokoro ma ki ototo i maana God renigi na tagaraha iana, mareha vi renia ma na tongesuriha iana.

²⁵I tagenana ma ka Ragaba, na êra. Ngaia ki koro ma ki oto i maana God renigi na tagaraha iana. Suria ngaia ki unira banu i pasina na mane tora tamasinga iata na Siu, ma ki tamanira, ka gava ka râ suria na tara getea.

²⁶Manga vi na atarona na enoni, ma ke pe gâga henia na apena, vikê na apena ke me. Tahema, manga vi na tongesuriha, ma ki mareha henigi na tagaraha, na tongesuriha ki meme nogana.