Read Kahua JAKOBO 3 Bible Online

JAKOBO 3 - Kahua bible

JAKOBO 3

¹Goaku! Siana kamu rakorako na mane ni hagesuringa, renia mu girara, ga page surigami, na mane ni hagesuringa, teharira na enoni getera.

²Hagarako igia hato ka katogi na marâ, ga pe oto. Na enoni, i tamasi oto tare igê na tamasinga iana, ngaia ki koro teha, ma ki girara i hagaotoa marena bâkoro ngavê.

³Igia ka barogi na harata na hosi, hanana vi ga têtê viteaka, ma igia ka girara ga hagaotora, ka arâ i na agua mavê, igia ga obania.

⁴Takusia na haka nikâ. Henaka na haka ki raha, ma na matena i ramoramo na roga, na kere vote na gapariri ki girara i hagaotoa, ma na haka ki arâ tanga na anima na agua, na mane igê na gapariri i obania tanga.

⁵Na meana na enoni ki manga ngekê nikâ. Naka ma i sisite era, ma ngaia ki girara i tamasi paroparo bâraha. Takusia na bagabemu raha, i riki aha. Naka ma na kere vavatana na gi, ma na bagabemu raha ki girara i nonoro renia.

⁶Ma na meana na enoni ki manga na gi, ma ki vunu renigi na eraha. Ngaia ki gâga igê na apeka, ma ki hagatarêngenia na eraha i apeka hagenani. Ngaia marena ki torea na gi tenia na agua ni hagaitangiha, ma ki sungia na mêrihaka hagenani renia na gi iana.

⁷Na enoni ki girara i hagamanata, ma ki bani hagamanatara na ara ni marâ getigi: na marâ vasiga i mu, na manu, ma na marâ ga angoango, ma na siare.

⁸Ma ki asa na enoni, vi ge girara ge hagamanata na meana marena. Ngaia ki era, ma ki asa, vi ge hagaotoa, ma ki vunu renigi na marâ, ga girara ga meme renigi.

⁹Renia na meaka igia ka visia raha na Araha ma na Vaemaka. Ma nikâ renigi na meaka igia ka guharira na enoni getera, i hagavorara God suria na nununa ngaia marena!

¹⁰Na visiha raha ma na guhaguha karu huhura me tenia na harana gi tage ma na enoni. Goaku, siana kamu katokato vikana!

¹¹Na ve, i mamaki, ma na ve, i mahe, ki asa hagetage, vi garu banga hura me tenia na makuruha gi tage.

¹²Goaku, na apinige na fiki ki asa, vi ge girara ge hunguhungu renigi na guani na olive. Ma na varo na vaini ki asa, vi ge girara ge hunguhungu renigi na guani na fiki. Ma na ve, i marasiga ki asa, vi ge voravora renia na ve, i mamaki.

¹³Ta na enoni vari i pasimi ki tako mataha ma ki girara? Ngaia ki tuguhia, i paronga koro, ma ki tagara bâkoro, ki haritagi, ma ki takotako mataha.

¹⁴Ma ki manga mu hengari igê na parongami, ma kamu bagamangariaga, ma kamu maongo, siana hagetage kamu paroparo, ma kamu gavagava tenia na monariha.

¹⁵Na takoha, i manga ngekana, ki pe râ me tenia God. Ngaia ki râ me hete tenia na enoni. Ngaia ki pe koro, ma ki râ me tenia Satana.

¹⁶Suria matena na enoni ka hengari ma ka maogo, nikâ ngaira ka hevoavoa so mareta igê na ara ni marâ, ma nikâ ga katogi na ara ni marâ era.

¹⁷Ma na enoni, ga takotako mataha suria na obaniha iana God, ngaira ka matarotaro hagenago ma hemuri ka marape, ka haritagi, ma ka korokoro. Ngaira ka hetakuiheri bâkoro, ma ka tagara bâkoro tare. Ngaira ka pe ateate purupuru, ma ka pe hagahagaparu.

¹⁸Na enoni, ga tagara tanga na marapeha, ngaira ka tokorenigi haharitagi na maani, ga hunguhungu bâkoro renia na otoha.