Read Kahua JAKOBO 5 Bible Online

JAKOBO 5 - Kahua bible

JAKOBO 5

¹Hoita, mu rongoê, igamu na enoni ruruguha! I ararigamu, vigamu angiangi bâraha ngavê renigi na marâ era, ga page tarahugamu!

²Na ruruguha iami ka bani kakaga, ma na hasihasi ka bani ngêgi na gahu iami.

³Na golo ma na siliva iami ka bani hegahegaraga. Ma na hehegani ngegana ka page tamasi pusigamu, ma ka page ngaugi na hasigomi manga na gi. Igamu kamu bani hakugi na ruruguha, matena i meme noga na maveta.

⁴Igamu kamu pe vurira na mane, ga tagara i mu iami. Mu rongogi na tamasinga iata pusigamu, suria gamu pe vurira. Ma God, na Araha raramohaga hunia, ki rongogi na ringeta na enoni, ga nakanaka na harisi iami!

⁵Na mêrihami i maveta ka vunu renigi na ruruguha raha, ma na vagevageha raha iami maremi. Igamu kamu katogamu maremi, kamu binibinikaga mangara na puruka igê na tangiana, ga nanahuigamu igê.

⁶Igamu kamu bani erasira, ma kamu bani nahuira na enoni koro, ma ngaira ka pe ura pusigamu.

⁷Goaku, mu piringiape mataro me na matena, i arâ me igê na Araha. Mu takusia na mane, i tagara i mu. Ngaia ki piringiape, matena i gâga karia na mu iana mataro me na matena, i mariri igê na harisi koro iana. Ngaia ki piringiape, ma ki naasia na arana boro, ma na rangi ni hagahisi.

⁸Igamu nogami ki ararigamu, mu piringiape! Mu ramoramo, suria i hagarangi me noga na tangiana, i page arâ me igê na Araha.

⁹Goaku, siana kamu tamasi ngurunguru renigamu heri, hanana God ki pe surigamu. Na Araha ni suriha ki sugi banu me noga!

¹⁰Goaku, mu takusira aporo na poropete, ga tamasi urusia na Araha. Ngaira ka hagabângenia na piringiapeha, matena ga hatamia na mamasiaganiha.

¹¹Igia ka visira, vi ga hagâvo, renia ga gatagata nga tare, mataro me igê na hatongina na mamasiaganiha iata. Igamu kamu bani girara vi o Jobo, ki piringiape, ma kamu bani girara na marâ, i katoa God tanga, matena i hato na mamasiaganiha iana. Suria na Araha ki teha i pasina na takiha ma na hetakiha.

¹²Goaku, siana hagetage kamu tohetohe, matena mu katoa na suruha renia ta na marâ. Siana kamu tohetohe renia na vavearo, se vi renia na maveta, se vi renia na ani mavê na marâ getea. Manga mu tako kamu vi “Ua”, mu vivi nga “Ua”. Ma ki manga mu tako kamu vi “Mareha”, mu vivi nga “Mareha”, hanana God ki pe surigamu ki hagaitangigamu.

¹³Ta na hitangimi vari i takotako bâraha? Ngaia ki araria, i nunginungi. Ta na enoni vari ki vagevage? Ngaia ki araria, i kiki.

¹⁴Ta na hitangimi vari ki maeha? Ngaia ki araria, i unira na maneraha igê na rotu, ma ngaira ka page nunginungi tanga, ma ka page monea igê na raramohana na Araha.

¹⁵Manga na enoni, ga nunginungi, ma ka nganganihaga igê na tongesuriha nikâ, na enoni maeha ki page komaga renia. Na Araha ki page hagakomaga, ma ki page bonotenigi na tasi iana.

¹⁶Tahema igamu ma na tamami kamu visigi mataha heri na tasi iami, ma kamu nunginungi tangagamu heri, hanana mu page komaga. Na nunginungiha iana na enoni koro ki raramohaga hunia renia na mena iana God.

¹⁷O Elia ki na enoni manga igia. Ngaia ki nunginungi bâraha, hanana vi siana ki rangirangi. Ma ki mareha, vi ge rangi surigi na harisi gi oru ma na hageha ge ono.

¹⁸Ma hemuri ki nungi nikâ, ma ki kahu rangi aporo, ma ka kahu akê koro aporo na ngêra i mu.

¹⁹Goaku! Manga na hitangimi, ma ki aharê tenia na monariha, ma na tamana ki hagaporosia tanga na monariha,

²⁰mu takusia maninga: na anima na enoni, i hagaporosia na enoni era tenigi na parongana iera, ngaia ki page hagatahia na atarona na enoni era ngekê tenia na mera, ma igê na tarana ngekê God ki bonotenigi rako era na tasi.