Read Kahua 1 PETERO 1 Bible Online

1 PETERO 1 - Kahua bible

1 PETERO 1

¹Inê Petero, na aposotolo iana o Jesu Kirisito. Inê kê sege tangagamu na kariana God, mu mahuara, ma kamu totoko surigi na apanini i Ponto, i Galasia, i Kapatosia, i Asia me Bitinia.

²God Vaemaka ki bani ategamu suria na katoha iana marena, hanana vigamu voravora re na enoni koro renia na Higona Apu, ma kamu têtê viteana o Jesu Kirisito, ma kamu matarotaro renia na gapuna. Inê kê obania, garu tehateha i pasimi na hetamaniha iana God ma na marapeha.

³Ge visia raha God, na Vaemana na Araha iaka o Jesu Kirisito. Renia ngaia ki takuigia bâraha, ngaia ki vategia na mauriha haoru, suria ngaia ki bani hagamêria aporo o Jesu Kirisito tenia na mera. Manga ngekana, igia ka nahunia na naasiha monari.

⁴Tahema igia ka naasia, vi ge nahunigi na ruruguha koro era, God i bani nakagi tangara na kariana. Ngaia ki bani nakagi tangagamu i pasina. Tahema i asa, vi ge page kakaga, se vi ge page era, se vi ge page magahuru.

⁵Ngaigi ngegana ka tangagamu, suria igamu kamu tongesuria God raramohaga hunia, i anumasigamu, matena mu naasia na vuripusiami, God i page vategamu i na matena, i page aporo me igê na Araha.

⁶Mu vagevage renia na tarana ngekê, naka ma i rugurugu na obami i na kere matena i ngekê renigi na ara ni mamasiaganiha, mu hatamigi.

⁷Na mamasiaganiha ngegana ka hagamonaria na tongesuriha iami, vi monari. Mu takusia na golo. Ngaia ki girara i aera. Ma na enoni ka uhungia renia na gi, hanana vi korokoro na golo. Hoita, na tongesuriha iami ki teharia na golo. Ma ki koro nikâ, viga uhungia, hanana i korokoro tare. Manga ngekana, ka page visigamu koro, ma ka page visigamu raha, ma ka page kasigamu akê igê na tangiana, i page arâ me igê o Jesu Kirisito.

⁸Mu takuia, henaka vigamu pe bâsia. Mu tongesuria, henaka vigamu pe bâsia i na matena i ngekê. Tahema i koro era na obami renia na vagevageha raha. Ma na tamasinga ki asa, vi ge hagatea na vagevageha iami,

⁹renia mu tavoa noga na mena na tongesuriha iami: ngaia ka na tahingani na ataromi.

¹⁰Na poropete ka garia maninga na tahinga ngekana, ma ka naasia bâraha, ma ngaira ka bani takusia, vi na votovoto ngekana God ki vategamu.

¹¹Ngaira ka uhungia, vi ga tarahua, vi i na keta kani page arâ me igê, ma ki arâ me marata. Renia na Higona Apu iana o Kirisito, i angarira, ki usia na matena ngekana tangara, matena i tamasi renigi na mamasiaganiha o Kirisito i page hatamigi, ma renia na arahanga, i page tarahua.

¹²God ki bani hagagirara na poropete ngegana, vi na tagaraha iata ki mareha vi tanga na koroha iata mareta, ma tangagamu igamu hete, suria ga tamasi renigi na morani na marâ, mu bani rongogi. Na mane tora tamasinga renia na Taroha Koro ka visigi tangagamu na marâ, ga monari ngegana. Ngaira ka tamasi igê na raramohana na Higona Apu, i râ me tenia God. Na angelo ka obania bâraha, vi ga rongorongo giraragi nogata na marâ, ga monari ngegê.

¹³Mu nananê tange na tagaraha. Mu bâbâ, ma kamu takusigi ma na marâ koro, i page vategamu renigi o Jesu Kirisito i na matena, i page arâ me igê nikâ.

¹⁴Mu têtê viteana God, ma siana na teniha iami ka raharaha tangagamu manga i nago, matena mu hite mênga.

¹⁵God ki bani ategamu. Ngaia ki koro ma ki oto. Tahema i tuguhigamu nogami, vi gamu paronga koro, ma kamu ototo igê na ara ni marâ, mu tanugi.

¹⁶Renia na Buka Apuna ki vi, “I ararigamu, vigamu korokoro ma kamu ototo, suria inê kê koro ma kê oto.”

¹⁷Igamu kamu hêtana God vi “Vaemamami”, matena mu rahesia. Ngaia ki na ani, i surira tagenata na enoni hato surigi na parongata hegitigi. Manga ngekê, mu hanetasia igê na mêriha iami i maveta ikê mataro me na matena, mu meme igê.

¹⁸Renia mu bani girara vi na vuriha, ki vuripusigamu tenigi na tarani na mêriha purua iata na êvarimi. Ga pe vuripusigamu renia na siliva, se vi na golo. Na taraterua ngegana karu girara garu soso.

¹⁹Ma na mena raha, i vuripusigamu, ngaia ki na mera iana o Kirisito, i manga na karena sipi, i matarotaro ma ki komaga bâkoro.

²⁰God ki bani atea i nago, matena na maveta ki mamênga, ma igê na tangiani kere me ngegê ngaia ki hagabângenia, vi o Kirisito ki hagatahigamu.

²¹Renia o Kirisito igamu kamu tongesuria God, i bani hagamêria tenia na mera, ma ki bani atea, ki Araha. Manga ngekana, tahema God ki hagagatagatanigi na tongesuriha iami ma na naasiha iami.

²²Hoi, igamu kamu bani hagamatarotarogamu maremi, suria mu tongesuria na Taroha Koro, ma kamu katogi na tagaraha mora. Ma nikâ igamu kamu takuira maninga na tamami, ga tongesuria o Kirisito. Igamu kamu hetakuiheri igê na mêrihami hagenani.

²³Igamu kamu bani vora me nikâ. O Vaemami ki mareha vige me, ma ki asa hagetage, vi ge me. Igamu kamu bani vora me renia na tamasinga mamauri ma tarema iana God.

²⁴Suria na Buka Apuna ki vi, “Na enoni hato ka manga na rauga, ma na ara ni bâkorohata ka manga na takani. I meme na rauga, ma na takana ki votavota.

²⁵Ma na tamasinga iana na Araha ki gâga tarema.” Na tamasinga ngekê ki na Taroha Koro, mu bani rongoa.