Read Kahua 1 PETERO 4 Bible Online

1 PETERO 4 - Kahua bible

1 PETERO 4

¹O Kirisito ki hatamia na mamasiaganiha igê na apena. Tahema igamu nikâ, i koro, kamu hagagatagatanigamu maremi renia na takotako iana. Suria na enoni, i hatamia na mamasiaganiha igê na apena, ngaia ki hatohato tenia na tasi.

²Tenia na matena i ngekê ki tuguhigamu, mu paronga suria na obaniha iana God, matena mu gâga mênga i maveta. Siana kamu paronga surigi na teniha era.

³I nago igamu kamu bani paronga bâraha mangara na enoni, ga pe tongesuria God. Mu bani paronga iera. Mu bani amaka surigi na teniha era iami. I bani ruguhigamu tare na tonoha. Mu bani mâmâ bera, matena mu magoto. Mu bani totono bâraha. Ma ta na marâ nikâ: mu bani vogasira na ataro.

⁴Ma i na matena i ngekê, na enoni, ga pe tongesuria o Kirisito, ka konetenigamu, renia mu pe hakunira igê na parongata, i pe koro ma ki era manga i nago. Tahema ngaira ka visigamu bera.

⁵Ma God ki page surira, renia ngaia ki nanê, hanana vi surira na enoni, ga mauri, ma na enoni, ga me.

⁶Tahema na Taroha Koro ki tarahura nikâ na enoni, ga me. Ma God ki bani surira na ani ngegana, matena ga gâga mênga i maveta, renia ngaia ki surira na enoni hato. Ma na Taroha Koro ki tarahura, hanana vi ga mauri manga God renia na Higona Apu.

⁷I hagarangi me noga na hagahatongini na ara ni marâ hato. I koro, kamu hagarêgamu maremi maninga, ma kamu bâbâ, hanana mu nunginungi.

⁸Mu hetakuiheri maninga teharigi na ara ni marâ, mu katogi, suria na hetakuiha ki ahunigi rako na tasi.

⁹Mu unigamu banu heri, ma siana kamu tamasi ngurunguru renia.

¹⁰God ki bani vatea na ara ni hitangimi na votovoto iana. Na votovoto iana God ka râ hegitigi. Ma na ara ni hitangimi, i koro, ki marupea na votovoto, God i vatea renia, ma ki tamanira na enoni getera renia.

¹¹Manga na enoni ma ki ateate, i koro, ki ateate igê na tamasinga iana God. Manga na enoni, ma ki tamanira na enoni getera, i koro, ki tamanira igê na ramoha, God i vatea renia, hanana igamu kamu visia raha God renia o Jesu Kirisito igê na ara ni marâ hato, suria ngaia ki na Araha raramohaga hunia tare ma tarema. Monari.

¹²Kariaku hetakui, siana kamu konekone, matena na mamasiaganiha ma na eraha ka uhungigamu, suria na tarani ngegana ka bani tâ me tangagamu.

¹³I koro, kamu vagevage, suria mu hatamia na mamasiaganiha henia o Kirisito, hanana mu page vagevage teha i na matena, i arâ me igê na Araha.

¹⁴Mu babarisi, manga vi na enoni ka guharigamu, renia igamu ka na kariana o Kirisito. Na girarana na tarana ngekê ki na Higona Apu raramohaga hunia, na Higona Apu iana God, i bani angarigamu.

¹⁵Siana na hitangimi ki hatamia na mamasiaganiha, suria vi nahu enoni, se vi hanago, se vi manero, se vi parênigi na tagaraha iata na enoni getera.

¹⁶Ma ki manga mu hatamia na mamasiaganiha, suria vi igamu ka na enoni kirisitiano, siana hagetage vi gamu maki renia, ma kamu visia raha hete God, suria ga hêtami renia na atana o Kirisito.

¹⁷Na Suriha Raha ki haganega noga. Ma God ki surira i nago na kariana. Manga vi ga surigia i nago igia, manga i he kaniga page surira na enoni, ga pe tongesuria na Taroha Koro iana God?

¹⁸Renia na Buka Apuna ki vi, “Manga i bara tanga na enoni koro, vi ge tahi, manga i he kani girara vi voravora renia na enoni, i pe tongesuria na Taroha Koro, ma ki era na parongana?”

¹⁹Hoita, na enoni, ga hatamia na mamasiaganiha suria na obaniha iana God, i koro, ka ama ni tagara koro nga, ma ka tangatanga pupu renia God, ma ka hagêguritogo renia God, i bani hagavorara, ma ki hagamonaria tare na suruha iana.