Read Kahua 2 PETERO 2 Bible Online

2 PETERO 2 - Kahua bible

2 PETERO 2

¹I nago ka vora me na poropete ngarangara i pasita na enoni, ma ki tagenana ma na poropete ngarangara ka page voravora me i pasimi. Ngaira ka page toregi na hagesuringa hagaparu, ga hagaerasira na enoni, ma ka page hagaiga na Araha, vi pe hagatahira. Tahema ngaira ka parama, ma ka hagaerasira mareta.

²Henaka, ga rako na enoni, ga page amaka surigi na parongata era na poropete hagaparu, ma ka page tamasi erasia na Tarana na Monariha.

³Na mane ni hagesuringa ngarangara ngegana ka hagatage ma ka page tavotavo haga meni na sihonga babanga. I arihu me noga, God ki nanê, vi surira, ma ki bâbâ, vi hagaitangira!

⁴Renia God ki hagaitangira na angero, ga tasi, ma ki kasira igê na agua ni hagaitangiha. Ma i ngekana ka rakura igê na roto hono, ma ka naasia na Tangiana na Suriha Raha.

⁵God ki hagaitangira na enoni, ga bani oga i nago, ma ki hagatonomira ka me na enoni era i maveta renia na Maganuha Raha. Renia o Noa ki ateate renia na paronga koro, God ki hagatahia ma o Noa ma na enoni getera gi pi.

⁶God ki hagaitangirerua na hinua raha i Sotomo me Gomora, ma ki hagaerasirerua renia na gi, hanana vi igê na tarana ngekana ki hagabângenigi tangara na enoni era na marâ, ngaira ga page tarahugi.

⁷Ngaia ki hagatahia o Loti, renia ngaia ki na mane koro, ma ki era na obana renigi na parongata iera na enoni, ga pe koro.

⁸Renia na mane koro ngekana ki goga i pasita, ma na ara ni tangiana ngaia ki bâsigi ma ki rongogi na marâ era ma na tauhata bera, ga hagamamasiaga apena.

⁹Hoi, na Araha ki girara i hagatahira na enoni koro tenigi na mamasiaganiha iata, ma ki girara i hagaitangira na enoni era mataro me igê na Tangiana na Suriha Raha,

¹⁰ma ki hagaitangira bâraha ngavê na enoni, ga râ surigi na teniha era na apeta, ma ka ruhia God na Araha. Na mane ni hagesuringa babanga ngegana ka pe makuku, ma ka arâ surigi na teniha iata mareta. Ngaira ka pe hanetasira na angelo iana God, ma ka guharira.

¹¹Na angelo ka ramo ma ka raramohaga teharira na mane ni hagesuringa babanga ngegana, ma ngaira ka pe guharira, ma ka pe tugurira i maana na Araha.

¹²Ma na mane ngegana ka râ suri barisuta mangara na marâ vasiga i bemu. Na enoni ka hagavasi tangara, ma ka nahuira, suria ngaia nga ka na tarana ga vora tanga. Ngaira ka guharigi na marâ, ga pe rongo mataha tangara. Ka page nahuira mangara na marâ vasiga i bemu.

¹³Ga page vurira renia na mamasiaganiha, suria ngaira ka hagamamasiagara na enoni getera. Ngaira ki korokoro na apeta, matena ga tanugi i maata na enoni na marâ, ga râ surigi na teniha era na apeta. Ngaira ka hagamakigamu, ma ka hagaerasigamu. Ma i na matena, ga ngêngê henigamu, ngaira ka hagahagaparugamu, ma ka vagevage renigi na parongata ngegana.

¹⁴Ngaira ka obania ma, vi ga vagevage bera henira na gete. Ngaira ka obania, vi ga paronga era tare ki bê ki arâ. Ngaira ka hagamura na enoni, ga makumakusiga. Ngaira ka hagatage, ma ka obanigi ma na haga. Ma God ki page hagaitangira!

¹⁵Ngaira ka bani pania na tara koro ma ka hagatasia na tara. Ngaira ka bani râ suria na parongana o Balama, karena o Beore. Ngaia ki vanasigi na haga, na meni na eraha i tanugi.

¹⁶Ma ka ramonia, suria ngaia ki aharêngia na ramata. Ma na tonki, i bi, ki tamasi manga na enoni, ma ki urapusia na poropete, i tanugi na marâ bekabekaga.

¹⁷Ma na enoni ngegana ka mangara na ve banga, ga mamata, se ga manga na vaha, i ahegenigi na roga raha. God ki bani hagarêa na agua tangara igê na roto hono ngavê.

¹⁸Ngaira ka tamasi paroparo ma bekabekaga, ma renigi na teniha era na apeta ngaira ka hagamura na enoni, ga kahu gava ma tenira na enoni ahuroto.

¹⁹Ngaira ka surua tangara, vi ga aharupa, matena ngaira mareta ka bani vora na kare vurivuri iana na eraha, suria na enoni ki voravora renia na kare vurivuri iana na anima na marâ, i bani teharia bême.

²⁰Takusira na enoni, ga bani gavatenigi na eraha i maveta, suria ga girara na Araha ma na Hagamauri iaka o Jesu Kirisito. Ma hemuri na eraha ki hagamura nikâ, ma ki teharira. I na matena ngekana na enoni ngegana ka kahu era teharia i na matena i nago.

²¹I mareha vi ge kare aera ngavê, manga vi na enoni, ma ka pe bani girara hagenago na tara na paronga koro. Ma ki aera ngavê hete, manga vi ga bani girara hagenago na paronga koro, ma i hemuri ka kasia na ramata apuna, God i bani vatera renia.

²²I ararira na tamasinga ikê akê, “Na o ki ngê aporo na momâna, ma, “Manuhia na bo, ma ngaia ki aporo ki hurihuri.”