Read Kahua 2 PETERO 3 Bible Online

2 PETERO 3 - Kahua bible

2 PETERO 3

¹Goaku hetakui! Ikê na ruata na leta, gê segea tangagamu. Igê na leta gi rua ngegê inê kê uhungia, vi gê hagaritegi na takotako koro iami, suria gê hagatakusigamu renigi na tarani ngegana.

²Inê be hagatakusigamu renigi na tamasinga iata na poropete koro i nago, ma renia na ramata iana na Araha ma na Hagamauri, na aposotolo ga bani hagarongogamu renia.

³Na ani gi tage i ararigamu, vi gamu girara: i na tangiani ngegana ka page voravora me na enoni, ga arâ suri barisuta mareta. Ngaira ka page rurusigamu,

⁴ma ka page vivi: “Ngaia ki surua, vi page arâ me, iê? Ngaia i he? Na êvarika ka bani me, ma na ara ni marâ hato ka tagenani ma, tagenana manga i nago, i haganega me tenia na haganegahana na maveta!”

⁵Ma ngaira ka usi, vi ge takusia na tarana ikê akê: i nago kere vê noga God ki tamasi, ma karu vora me na vavearo ma na ano. Na ano ki vora me tenia na ve ma renia na ve.

⁶Ma nikâ na ve, na ve na Maganuha Raha, ki bani erasia hagetage na bani ano.

⁷Ma God ki vi nikâ, na vavearo ma na ano i na matena i ngekê karu tâ tanga na gi, ki page aerasirerua. Garu tâ tanga na tangiana, matena ga page surira ma ka page erasira ngavê igê na enoni era.

⁸Goaku hetakui, mu takusia bâkoro na tarana ngekana! I berarogaterua na tangiana gi tage ma na rehagaro na harisi karu tagenaterua ma i maana na Araha.

⁹Tani na enoni ka takusia, vi na Araha ki pe hagamonarigi rêrê na suruha iana. Ma ki mareha ge monari. Ngaia ki piringiape henigamu, suria i pe obania, vi ge erasia ta na enoni, ma ki obanira ma, vi ga urisi parongata.

¹⁰Ma na Tangiana iana na Araha ki page arâ me manga na mane hanago. Igê na Tangiana ngekana na vavearo ki page magahuru, ma ki page rongo raha, ma na higu ka page tetete, ma ka page magahuru na ano ma na ara ni marâ hato, ga oga i rarona.

¹¹Renia ga erasigi ngavê na ara ni marâ hato igê na tarana ngekana, na ta ki tuguhigamu, vi gamu tanua? I tuguhigamu, vi gamu paronga koro suria na tamasinga iana God,

¹²matena mu naasia na Tangiana iana God, ma kamu uhungia maninga, hanana vi na Tangiana iana God ki arâ me rêrê. Igê na Tangiana iana God, ma kamu uhungia maninga, hanana vi na Tangiana iana God ki arâ me rêrê. Igê na Tangiana ngekana na vavearo ki page tetete ngavê, ma na higu ka page makaka renia na gi.

¹³Ma God ki bani sururerua na vavearo haoru ma na ano haoru, ma i ngekana ki page gâga ma na koroha. Ma igia ka naasirerua.

¹⁴Hoita, goaku. Matena mu naasia na Tangiana ngekana, mu uhungia tare nga, kamu paronga koro ma kamu matarotaro i maana God, ma kamu gâga igê na marapeha iana God.

¹⁵Mu takusia na piringiapeha iana na Araha. Ngaia ki naka tangagamu na matena, mu girara mu tahitahi igê. Renia na tarana ngekana o Paulo, na goaka koro, ki bani segea tangagamu suria na takoha iana God.

¹⁶Na marâ ngekê ki segea igê na ara ni leta iana, matena i tamasi renia na tarana ngekê. Tani na marâ igê na leta iana ka bara sisite tangagia, vi ge rongogiraragi. Ma na enoni ga bonobonoga ma ka tangahepe ka ramatenigi bera, ma ka hagaparu, mangagi na ani getigi na tomatoma i na Buka Apuna. Tahema ngaira ka erasira mareta.

¹⁷Ma igamu, na goaku, kamu bani girara na tarana ngekana. Hoi, mu bâsigamu, siana ka hagamugamu ma ka hagaparugamu na enoni era, ma siana ka hagavotarigamu tenigi na atohami, mu gatagata igê.

¹⁸I koro, karu raharaha tare na koroha ma na giraraha renia na Araha ma na Hagamauri iaka o Jesu Kirisito. Ge visia raha i ngekê tare ma tarema! Monari.