Read Kahua 1 JOANE 2 Bible Online

1 JOANE 2 - Kahua bible

1 JOANE 2

¹Kariaku hetakui, inê kê segea na marâ ngekana tangagamu, hanana vi siana kamu tasitasi. Manga vi ta na enoni, ma ki tasi, igia ka nahunia o Jesu Kirisito, i paronga koro ma ki oto tare, hanana i tamanigia i pasina Vaemana.

²Mo Kirisito ngaia marena ki kasi mena renigi na tasi iaka. Tahema God ki bonotenigi na tasi iaka. Ngaia ki bonotenigi na tasi iaka igia, ma nikâ na tasi iata na enoni hato.

³Manga vi igia, ma ka arâ surigi na ramata iana God, igia ka girara ga aitangisia bâkoro, suria igia ka na kariana God.

⁴Manga vi ta na enoni, ma ki vi ngaia, “Inê na kariana; inê kê aitangisia,” ma ki mareha vi ge râ surigi na ramata iana, ngaia nga ki hagaparu, ma ki pe nahunia na monariha.

⁵Ma na matena ta na enoni ki têtê viteana, ngaia ki takuia koro teha ngavê God. Tahema igia ka girara bâkoro, vi igia ka obahaku henia God.

⁶Manga vi ta na enoni, ma ki vi ngaia, “Inê kê obahaku henia God,” ki tuguhia, i amaka suria maninga na parongana o Jesu Kirisito.

⁷Goaku hetakui, i mareha vi na ramata haoru, kani ve sege tangagamu renia ngekê. Ngaia ki na bani ramata, megamu kamu bani rongoa, matena mu têa moramora igê na tongesuriha. Na bani ramata ki na tamasinga, igamu kamu bani rongoa noga.

⁸Henaka vi ngaia ki na bani ramata, ma na tarana gê sege tangagamu renia, ki manga na ramata haoru, ma na ramata ngekana ki monari, suria o Kirisito ki bani paronga me suria, ma igamu kamu paronga suria nogami. Renia na roto hono ki bani hato noga, ma na morana na marara ki bani mave noga.

⁹Manga vi ta na enoni, ma ki vi, vi ngaia ki oga igê na marara, ma ki merongasia na tamana, ngaia ki gâga mênga hete igê na mengo.

¹⁰Ma na enoni, i takuia na tamana, ngaia ki oga igê na marara. Manga ngekana, ngaia ki asa, vi ge taripurupuru se vi ge hagatasia ta na enoni getea.

¹¹Ma na enoni, i merongasia na tamana, ki gâga igê na mengo. Ngaia ki râ igê na roto hono, ma ki pe girara, vi i he kani arâ igê, suria ngaia ki pe bâbâ, renia i mengo.

¹²Kare hetakui, inê kê sege tangagamu, suria God ki bani bonotenigi na tasi iami renia o Kirisito.

¹³Vaemani kare, inê kê sege tangagamu, suria igamu kamu girara o va ani, i bani oga me kerevê noga tenia na haganegana. Mane haoru, inê kê sege tangagamu, suria igamu kamu bani teharia noga Satana.

¹⁴Kare hetakui, inê kê sege tangagamu, suria igamu kamu girara God Vaemana. Vaemani kare, inê kê sege tangagamu, suria igamu kamu girara o va ani, i bani oga me kerevê noga tenia na haganegana. Mane haoru, inê kê sege tangagamu, suria igamu kamu ramo; igamu kamu tê viteana maninga God i obami, ma kamu bani teharia noga Satana.

¹⁵Siana kamu makuania na maveta, se vi ta na eraha igê na maveta. Manga mu makuania na eraha i maveta, igê na aitangihami igamu ki mareha vi gamu takuia God Vaemana.

¹⁶Na ara ni eraha i maveta, na teniha igê na aitangihana na enoni, na marâ, na enoni ga bâsigi ma ka tenigi, ma na marâ hato i maveta ikê, na enoni ga paroparo renigi, na marâ hato ngegana ka mareha vi ge râ me tenia God Vaemana. Ngaigi hato ka râ me hete tenia na maveta.

¹⁷Na maveta ma na ara ni marâ i maveta, na enoni ga tenigi ka magahuru noga, ma ki mauri tare na enoni, i arâ suria na obaniha iana God.

¹⁸Kariaku hetakui, i ngekê ki na matena na hagahatongina na maveta! Ga bani hagarongogamu noga, vi page arâ me na Merongana o Kirisito, ma i na matena i ngekê ka bani vora me rako na merongana o Kirisito. Tahema igia ka girara, vi na hagahatongina na maveta ki hagarangi me noga.

¹⁹Na enoni ngegana ngaira ka mareha vi na tamaka monari. Tahema ngaira ka bani râ panigia. Manga vi ngaira, ma ke vora re na tamaka monari, vikê ngaira ke gâga mênga henigia. Ma ngaira ka bani râ, hanana vi igia ka girara bâkoro, vi mareha ngavê na vere tage na hitangita, vi ge vora re na tamaka monari.

²⁰Mo Kirisito ki bani monegamu renia na Higona Apu. Manga ngekana, igamu hato kamu girara na monariha.

²¹Tahema inê kê sege tangagamu, suria mareha vi igamu kamu pe girara na monariha, ma kê sege tangagamu, suria hete mu girara na monariha, ma nikâ renia igamu kamu girara, vi na hagaparunga ki asa, vi ge râ me tenia na monariha.

²²Hoita, ti ki hagaparu? Ngaia nga ka na enoni, i visia, vi o Jesu ki mareha vi o Kirisito. Ngaia nga ki na Merongana o Kirisito. Ngaia ki pe tongesurirerua God Vaemana mo Karena.

²³Suria na enoni, i pe tongesuria o Karena, ngaia ki pe tongesuria nikâ o Vaemana. Na enoni, i tongesuria o Karena, ngaia ki tongesuria nikâ o Vaemana.

²⁴Mu girara maninga, hanana i gâga tonge i obami na tamasinga, mu bani rongoa, matena mu têa moramora igê na tongesuriha. Manga i goga tonge i obami na tamasinga, mu bani rongoa, matena mu têa moramora igê na tongesuriha, igamu nikâ kamu obahaku tare henirerua o Karena ma o Vaemana.

²⁵Ma o Kirisito nogana ki bani surua, vi vategia na marâ ikê: na mauriha mora ma tarema.

²⁶Inê kê sege tangamu renia na tarana ngekê, suria ga gâga na enoni, ga uhungia, vi ga hagaparugamu.

²⁷Megamu, o Kirisito ki bani monegamu renia na Higona Apu. Ma na matena na Higona Apu ki angarigamu, igamu kamu pe obania ta na enoni, vi ge hagasurigamu. Suria na Higona Apu ki hagesurigamu renigi na ara ni marâ, ma na hagesuringa iana ki monari, i mareha vi ge hagaparu. Mu amaka suria na hagesuringa iana na Higona Apu, ma kamu obahaku henia o Kirisito.

²⁸Hoita, kariaku hetakui, mu obâbahaku henia o Kirisito, hanana igia ka ramoramo igê na matena, i page arâ me igê, ma ka pe magutenia, se vi ge maki igê na matena, i page arâ me igê.

²⁹Igamu kamu girara, o Kirisito ki paronga koro ma ki oto tare. Megamu kamu girara nikâ, na enoni, i paronga koro ma ki ototo, ngaia ki na karena God.